Breaking News

ദേവസ്വം വകുപ്പില്‍ ദളിത് വിഭാഗത്തില്‍ നിന്ന് ആദ്യമന്ത്രി; രാഷ്ട്രീയ മാനങ്ങളോടെ കെ. രാധാകൃഷ്ണന്റെ മന്ത്രിസ്ഥാനം

Published

3 years ago

May 19, 2021

newshunt webdesk

Share our post

100

തിരുവനന്തപുരം: പതിനഞ്ചാം കേരള നിയമസഭയിലെ മന്ത്രിമാരുടെയും വകുപ്പുകളുടെയും വിവരങ്ങള്‍ പ്രഖ്യാപിക്കപ്പെട്ടു. ചേലക്കര എം.എല്‍.എയും മുന്‍ മന്ത്രിയും സ്പീക്കറുമായിരുന്ന കെ. രാധാകൃഷ്ണനാണ് രണ്ടാം പിണറായി മന്ത്രിസഭയില്‍ ദേവസ്വം – പിന്നോക്ക – പാര്‍ലമെന്ററി കാര്യ വിഭാഗ മന്ത്രിയായി പ്രഖ്യാപിക്കപ്പെട്ടിരിക്കുന്നത്.

കേരളത്തിന്റെ ചരിത്രത്തില്‍ ആദ്യമായാണ് ദളിത് വിഭാഗത്തില്‍ നിന്നുള്ള ഒരാള്‍ ദേവസ്വം വകുപ്പിന്റെ ചുമതല വഹിക്കുന്നത് എന്ന പ്രത്യേകത കൂടി ഈ പ്രഖ്യാപനത്തിലുണ്ട്. ഒന്നാം പിണറായി മന്ത്രിസഭയുടെ കാലത്ത് ശബരിമല യുവതീ പ്രവേശനവുമായി ബന്ധപ്പെട്ട സര്‍ക്കാര്‍ നിലപാടുകളുടെ പേരില്‍ സംഘപരിവാര്‍ സംഘടനങ്ങളും സവര്‍ണ സമുദായ സംഘടനകളും ദേവസ്വം വകുപ്പിനെതിരെ പരസ്യമായി രംഗത്ത് വരികയും സമരങ്ങള്‍ സംഘടിപ്പിക്കുകയും ചെയ്തിരുന്നു.

ദേവസ്വം വകുപ്പില്‍ നേരത്തെ നടന്ന ദളിത് നിയമനങ്ങള്‍ പോലും ഏറെ ചര്‍ച്ച ചെയ്യപ്പെട്ട സംസ്ഥാനമാണ് കേരളം. അത്തരമൊരു പശ്ചാത്തലത്തില്‍ പിന്നോക്ക വിഭാഗ വകുപ്പും ദേവസ്വം വകുപ്പും ഒരേ മന്ത്രി കൈകാര്യം ചെയ്യുന്നുവെന്ന ഈ പ്രഖ്യാപനം ചരിത്രപരമാകുകയാണ്.

ഇടുക്കി ജില്ലയിലെ പുള്ളിക്കാനത്തെ ഒരു തോട്ടം തൊഴിലാളി കുടുബത്തില്‍ 1964 മാര്‍ച്ച് 24 നാണ് കെ. രാധാകൃഷ്ണന്‍ ജനിച്ചത്. പിന്നീട് കുടുംബം തൃശ്ശൂരിലേക്ക് മാറുകയായിരുന്നു. ദാരിദ്ര്യവും ബുദ്ധിമുട്ടുകളും നിറഞ്ഞതായിരുന്നു കെ. രാധാകൃഷ്ണന്റെ ബാല്യകാല ജീവിതം. ചേലക്കര എസ്.എം.ടി.ജി.എച്ച്.എസ് സ്‌കൂളിലായിരുന്നു ഹൈസ്‌കൂള്‍ വിദ്യാഭ്യാസം. വടക്കാഞ്ചേരി ശ്രീ. വ്യാസ കോളേജിലും ശ്രീ കേരള വര്‍മ്മ കോളേജിലുമായി തുടര്‍ പഠനം നടത്തി. കോളേജ് പഠന കാലത്ത് എസ്.എഫ്.ഐയിലൂടെയാണ് രാഷ്ട്രീയത്തിലേക്ക് കടന്നുവന്നത്.

കോണ്‍ഗ്രസ് മണ്ഡലമായിരുന്ന ചേലക്കരയില്‍ നിന്നാണ് 1996 ല്‍ ആദ്യമായി രാധാകൃഷ്ണന്‍ ജനവിധി തേടുന്നത്. നായനാര്‍ മന്ത്രിസഭയിലെ പട്ടികജാതി – പട്ടിക വര്‍ഗക്ഷേമമന്ത്രിയായി. 2001, 2006, 2011 തെരഞ്ഞെടുപ്പുകളിലും ചേലക്കരയില്‍ നിന്നും വന്‍ഭൂരിപക്ഷത്തോടെ വിജയിച്ചു. 2001 ല്‍ ചീഫ് വിപ്പായി. 2006 ല്‍ ഹാട്രിക്ക് വിജയത്തോടെ നിയമസഭാ സ്പീക്കര്‍ ആയി. 2016 ലെ തെരഞ്ഞെടുപ്പില്‍ നിന്ന് വിട്ടുന്ന അദ്ദേഹം പിന്നീട് സംഘടനരംഗത്ത് സജീവമാവുകയായിരുന്നു. സി.പി.എം തൃശൂര്‍ ജില്ല സെക്രട്ടറിയായി പ്രവര്‍ത്തിച്ചു. ഇതിനിടെ പാര്‍ട്ടിയുടെ കേന്ദ്രകമ്മിറ്റിയിലും അംഗമായി.

ഇക്കഴിഞ്ഞ നിയസമഭാ തെരഞ്ഞെടുപ്പില്‍ വീണ്ടും ചേലക്കരയില്‍ നിന്ന് ജനവിധി തേടി വലിയ ഭൂരിപക്ഷത്തോടെ വിജയിക്കുകയും ഇപ്പോള്‍ വീണ്ടും മന്ത്രിയാവുകയും ചെയ്ത അദ്ദേഹം രണ്ടാം പിണറായി മന്ത്രിസഭയിലെ മുതിര്‍ന്ന അംഗങ്ങളില്‍ ഒരാള്‍ കൂടിയാണ്.

Share our post

100

Breaking News

മട്ടന്നൂരിൽ സിനിമാ തിയേറ്ററിന്റെ മേൽക്കൂര തകർന്ന് നാലു പേർക്ക് പരിക്ക്

Published

14 hours ago

November 9, 2024

NH newsdesk

Share our post

അപകടം വാട്ടർടാങ്ക് തകർന്നത് മൂലം

മട്ടന്നൂർ: മട്ടന്നൂരിൽ സിനിമാ തിയേറ്ററിന്റെ മേൽക്കൂരയുടെ ഒരു ഭാഗം തകർന്ന് വീണ് സിനിമ കാണുകയായിരുന്ന നാലു പേർക്ക് പരിക്കേറ്റു. തിയേറ്റർ ഹാളിന് മുകളിലുള്ള വാട്ടർടാങ്ക് തകർന്നാണ് അപകടമുണ്ടായത്. ശനിയാഴ്ച വൈകീട്ട് ആറോടെ മട്ടന്നൂർ സഹിനാ സിനിമാസിലാണ് അപകടം.പരിക്കേറ്റ നായാട്ടുപാറ കുന്നോത്ത് സ്വദേശി വിജിൽ(30), സുനിത്ത് നാരായണൻ (36),കൂത്തുപറമ്പ് സ്വദേശി ശരത്ത് (29) സുബിഷ(25), എന്നിവരെ കണ്ണൂരിലെ സ്വകാര്യ ആസ്പത്രിയിൽ പ്രവേശിപ്പിച്ചു.തിയേറ്ററിലെ പ്രധാന ഹാളിന് മുകൾഭാഗത്തുള്ള വാട്ടർടാങ്ക് തകർന്നതിനെ തുടർന്നാണ് അപകടമുണ്ടായത്. വലിയ സ്ലാബും കെട്ടിടാവശിഷ്ടങ്ങളും വെള്ളവും സിനിമ കണ്ടിരിക്കുന്നവരുടെ മേലേക്ക് വീഴുകയായിരുന്നു. ദേഹത്ത് സ്ലാബ് വീണാണ് വിജിലിന് തലയ്ക്ക് ഉൾപ്പടെ സാരമായി പരിക്കേറ്റത്.

Share our post

Breaking News

എ.ഡി.എം നവീന്‍ബാബുവിന്റെ മരണം; പി.പി. ദിവ്യയ്ക്ക് ജാമ്യം

Published

2 days ago

November 8, 2024

NH newsdesk

Share our post

തലശ്ശേരി: കണ്ണൂര്‍ എ.ഡി.എം. കെ. നവീന്‍ബാബുവിന്റെ മരണവുമായി ബന്ധപ്പെട്ട് റിമാന്‍ഡില്‍ കഴിയുന്ന ജില്ലാ പഞ്ചായത്ത് മുന്‍ പ്രസിഡന്റ് പി.പി. ദിവ്യയ്ക്ക് ജാമ്യം. ജില്ലാ സെഷന്‍സ് ജഡ്ജി കെ.ടി. നിസാര്‍ അഹമ്മദാണ് ജാമ്യം അനുവദിച്ചത്. ജില്ല വിടാൻ പാടില്ല, എല്ലാ തിങ്കളാഴ്ചയും അന്വേഷണ ഉദ്യോഗസ്ഥന് മുന്നിൽ ഹാജരാകണം എന്നീ ഉപാധികളിലാണ് ജാമ്യം അനുവദിച്ചിരിക്കുന്നത്.

ദിവ്യ അന്വേഷണവുമായി സഹകരിച്ചില്ലെന്നും ജാമ്യം അനുവദിക്കരുതെന്നും പ്രോസിക്യൂഷന്‍ ആവശ്യപ്പെട്ടിരുന്നു. ജാമ്യം അനുവദിക്കരുതെന്ന് നവീന്‍ബാബുവിന്റെ കുടുംബവും ആവശ്യപ്പെട്ടു. എന്നാല്‍, അന്വേഷണത്തിന്റെ ഏതുഘട്ടത്തിലും സഹകരിക്കുമെന്നായിരുന്നു ദിവ്യയുടെ അഭിഭാഷകന്റെ വാദം.

Share our post

Breaking News

കൊല്ലം കലക്ടറേറ്റ് ബോംബ് സ്ഫോടനം: മൂന്ന് പ്രതികൾക്കും ജീവപര്യന്തം

Published

3 days ago

November 7, 2024

NH newsdesk

Share our post

കൊല്ലം: കലക്ടറേറ്റ് വളപ്പിൽ മുൻസിഫ് കോടതിക്കു സമീപം ബോംബ് സ്ഫോടനം നടത്തിയ കേസിൽ മൂന്നു പ്രതിക്കും ജീവപര്യന്തം. കൊല്ലം പ്രിൻസിപ്പൽ സെഷൻസ് കോടതിയാണ് ശിക്ഷ വിധിച്ചത്. ബേസ് മൂവ്മെന്റ് പ്രവർത്തകരായ മധുര നെല്ലൂർ ഇസ്മയിൽപുരം നാലാം തെരുവിൽ അബ്ബാസ് അലി (33, ലൈബ്രറി അലി), വിശ്വനാഥ് നഗർ സ്വദേശി ഷംസുൻ കരിംരാജ (28, കരീം), മധുര നെൽപ്പട്ട കെ പുതുർ കരിംഷാ മസ്ജിദിനു സമീപം ഒന്നാംതെരുവിൽ ദാവൂദ് സുലൈമാൻ (28, ദാവൂദ്) എന്നിവരാണ് പ്രതികൾ.

നാലാം പ്രതിയെ തെളിവുകൾ ഇല്ലാത്തതിനാൽ വിട്ടയച്ചിരുന്നു. അഞ്ചാംപ്രതി മുഹമ്മദ്‌ അയൂബിനെ മാപ്പുസാക്ഷിയാക്കി. 2016 ജൂൺ 15നു പകൽ 10.45ന്‌ ആയിരുന്നു സ്‌ഫോടനം. ഐഇഡി (ഇംപ്രവൈസ്‌ഡ്‌ എക്‌സ്‌പ്ലോസീവ്‌ ഡിവൈസ്‌) ബോംബ്‌ ടിഫിൻ ബോക്‌സിൽ കവർചെയ്‌ത്‌ കലക്ടറേറ്റ്‌ വളപ്പിൽ കിടന്ന ജീപ്പിൽ വയ്‌ക്കുകയായിരുന്നു. തമിഴ്നാട്‌ കീഴവേളിയിൽ അബ്ബാസ് അലി നടത്തിയിരുന്ന ദാറുൾ ഇലം ലൈബ്രറിയിലാണ്‌ ബേസ് മൂവ്മെന്റ് ഭീകരവാദ സംഘടനയ്ക്ക് രൂപം നൽകിയത്‌. മറ്റു പ്രതികളെ ആകർഷിക്കാൻ ബിൻലാദന്റെ ആശയങ്ങൾ പ്രചരിപ്പിച്ചു. രാജ്യത്ത്‌ കോടതികൾ പ്രവർത്തിക്കുന്ന ഇടങ്ങളിൽ ബോംബ് സ്ഫോടനം നടത്തി ഭീകരാന്തരീക്ഷം സൃഷ്ടിക്കുകയായിരുന്നു ലക്ഷ്യം. മലപ്പുറം കലക്ടറേറ്റ്, നെല്ലൂർ, ചിറ്റൂർ, മൈസൂർ എന്നിവിടങ്ങളിലും സ്ഫോടനം നടത്തി.

അബ്ബാസ് അലിയുടെ വീട്ടിൽ ബോംബ് നിർമിച്ചശേഷം മധുരയിൽനിന്ന് തെങ്കാശി ബസിൽ കയറി കൊല്ലം കലക്ടറേറ്റ് വളപ്പിൽ എത്തിയ രണ്ടാം പ്രതി ഷംസുൻ കരിംരാജ ബോംബ് സ്ഥാപിച്ചു എന്നാണ് പ്രോസിക്യൂഷൻ കേസ്. സ്ഫോടനത്തിന് രണ്ടാഴ്ച മുമ്പ്‌ കരിംരാജ കലക്ടറേറ്റിൽ എത്തി ദൃശ്യങ്ങൾ പകർത്തിയിരുന്നു. സ്ഫോടനത്തിന്റെ ഉത്തരവാദിത്വം ബേസ് മൂവ്മെന്റ് ഏറ്റെടുക്കുന്നതായി മൂന്നാം പ്രതി ദാവൂദ് സുലൈമാൻ ആന്ധ്രയിൽനിന്ന് സമൂഹമാധ്യമങ്ങളിലൂടെ സന്ദേശം പ്രചരിപ്പിച്ചു. കൊല്ലം വെസ്റ്റ് പൊലീസ് രജിസ്റ്റർ ചെയ്‌ത കേസ്‌ കൊല്ലം അസിസ്റ്റന്റ് പൊലീസ് കമീഷണറാണ്‌ അന്വേഷിച്ചത്‌. അതിനിടെ മൈസൂർ സ്‌ഫോടനക്കേസ് അനേഷിച്ച എൻ.ഐ.എ ഹൈദരാബാദ് യൂണിറ്റ്‌ ഉദ്യോഗസ്ഥർ 2016 നവംബർ 28ന്‌ പ്രതികളെ അറസ്റ്റ് ചെയ്തു.

ജില്ലാ ഗവ. പ്ലീഡർ ആർ സേതുനാഥ്‌ ആണ് പ്രോസിക്യൂഷനുവേണ്ടി ഹാജരായത്. പബ്ലിക് പ്രോസിക്യൂട്ടർ സിസിൻ ജി മുണ്ടയ്‌ക്കൽ, അഭിഭാഷകരായ മിലൻ മറിയം മാത്യു, പി ബി സുനിൽ, എസ് പി പാർഥസാരഥി, ബി ആമിന എന്നിവരും പ്രോസിക്യൂഷനുവേണ്ടി ഹാജരായി. കൊല്ലം എസിപിയായിരുന്ന ജോർജ് കോശിയാണ്‌ കുറ്റപത്രം സമർപ്പിച്ചത്.

Share our post