അഞ്ചരക്കണ്ടി: കണ്ണൂർ അഞ്ചരക്കണ്ടി മെഡിക്കൽ കോളേജ് കോവിഡ്​ ആശുപത്രിക്കായി ഏറ്റെടുത്തതോടെ പ്രതിസന്ധിയിലായത് ജീവനക്കാരും മെഡിക്കൽ വിദ്യാർഥികളും. ചൊവ്വാഴ്ച ദിവസമാണ് ആശുപത്രി പൂർണമായും ഏറ്റെടുത്ത് കലക്​ടർ ഉത്തരവിറക്കിയത്. ഇതോടെ ആശുപത്രിയിലെ ഡോക്​ടർമാർ അടക്കമുള്ള ജീവനക്കാരും വിദ്യാർഥികളുമാണ് പ്രയാസത്തിലായത്. ആശുപത്രി പൂർണമായും ഏറ്റെടുത്ത കാര്യങ്ങൾ സംബന്ധിച്ച് സംസാരിക്കുന്നതിനായി ബുധനാഴ്ച കലക്​ടർ മെഡിക്കൽ കോളേജിൽ എത്തുമെന്നറിയിച്ചിരുന്നു. എന്നാൽ, അദ്ദേഹം എത്തിയില്ല. ഇതേതുടർന്ന്​ ജീവനക്കാരും വിദ്യാർഥികളും ആശുപത്രിക്ക്​ മുന്നിൽ പ്രതിഷേധവുമായെത്തി. ഇതേതുടർന്ന് സംഭവസ്ഥലത്തെത്തിയ ചക്കരക്കല്ല് പൊലീസി​ൻെറ നേതൃത്വത്തിൽ ഇവരുമായി ചർച്ച നടത്തി.

സർക്കാറി​ൻെറ നേരത്തെയുള്ള തീരുമാനപ്രകാരം കോളേജിലെ നിശ്ചിത വാർഡുകൾ മാത്രമാണ് കോവിഡ്​ ചികിത്സക്ക് ഏറ്റെടുക്കുക എന്നായിരുന്നു. എന്നാൽ, പിന്നീട് വന്ന നിർദേശത്തിൽ മുഴുവൻ വാർഡുകളും കോവിഡ് ചികിത്സക്കായി ഏറ്റെടുക്കുക എന്ന രീതിയിലായിരുന്നു. ഇങ്ങനെ ഏറ്റെടുക്കുേമ്പോൾ നിലവിലുള്ള ജീവനക്കാരെയും ഡോക്​ടർമാരെയും എങ്ങനെ പരിഗണിക്കുമെന്ന് വ്യക്തമാക്കാത്തതാണ് ജീവനക്കാർക്കിടയിൽ കടുത്ത ആശങ്കക്കിടയാക്കിയത്.

ഡോക്​ർമാർ ഉൾപ്പെടെയുള്ള 500ൽ കൂടുതലായി വരുന്ന ജീവനക്കാർ, 25 പി.ജി വിദ്യാർഥികൾ, ഹൗസ് സർജൻസി കോഴ്​സ്​ പൂർത്തിയാക്കുന്ന 50 മെഡിക്കൽ വിദ്യാർഥികൾ, ഫാർമസി, നഴ്​സിങ്​, ഇൻ്റേൺഷിപ് തുടങ്ങി വിവിധ കോഴ്​സുകൾ പൂർത്തിയാക്കുന്നവരടക്കമുള്ളവരുടെ പഠനവും ഇതോടെ ആശങ്കയിലായി. കോവിഡി​ൻെറ ആദ്യഘട്ടത്തിൽ കലക്​ടർ മെഡിക്കൽ കോളേജ് ആശുപത്രിയായി ഏറ്റെടുത്തിരുന്നു. ഏറ്റെടുത്ത എട്ടുമാസ കാലയളവിൽ ആശുപത്രി ജീവനക്കാർക്ക് ജോലിയും ശമ്പളവും കിട്ടിയിരുന്നില്ല. ഈ സ്ഥിതി ഇത്തവണയും ഉണ്ടാവുമെന്ന പേടിയിലാണ് ഡോക്​ടർമാരും ജീവനക്കാരും. ഇതിൽ വ്യക്​തതവരുത്താനാണ്​ കലക്​ടർ ബുധനാഴ്​ച എത്തുമെന്നറിയിച്ചത്​. എന്നാൽ, അദ്ദേഹം ചർച്ചക്കെത്താതിരുന്നത്​ ഏവരുടെയും ആശങ്ക ഇരട്ടിയാക്കിയിരിക്കുകയാണ്​.