കണ്ണൂർ: കോവിഡ്‌ രണ്ടാം തരംഗം രൂക്ഷമായ സാഹചര്യത്തിൽ മെഡിക്കൽ ഓക്‌സിജൻ ഉൽപ്പാദനം വർധിപ്പിക്കാൻ ധർമ്മശാല ബാൽകോ എയർ പ്രൊഡക്ട്‌സ്‌. കണ്ണൂർ, കാസർകോട്‌ ജില്ലകളിൽ ബാൽകോയാണ്‌ ഓക്‌സിജൻ സിലിൻഡറുകൾ വിതരണം ചെയ്യുന്നത്‌. രണ്ടു ജില്ലകളിലേക്കുമായി ശരാശരി 600 സിലിൻഡർ ഓക്‌സിജനാണ്‌ ഇപ്പോൾ പ്രതിദിനം ആവശ്യമായി വരുന്നത്‌. ഇതിൽ 300 സിലിൻഡറുകളാണ്‌ ധർമ്മശാലയിലെ പ്ലാന്റിൽ ഉൽപ്പാദിപ്പിക്കുന്നത്‌. ബാക്കി കോഴിക്കോട്‌, പാലക്കാട്‌ എന്നിവിടങ്ങളിൽ നിന്നെത്തിച്ച്‌ വിതരണം ചെയ്യുകയാണ്‌. പ്രതിദിന ഉൽപ്പാദനം 500 സിലിൻഡറായി വർധിപ്പിക്കാൻ സംവിധാനമൊരുക്കിയിട്ടുണ്ട്‌. രണ്ടു ദിവസത്തിനകം കൂടുതൽ ഉൽപ്പാദനം ആരംഭിക്കാൻ കഴിയുമെന്ന്‌ സി.ഇ.ഒ. ദിലീപ്‌.പി. നായർ  പറഞ്ഞു. വർധിച്ചുവരുന്ന ആവശ്യം കണക്കിലെടുത്ത്‌ ഉൽപ്പാദനം ആയിരം സിലിൻഡറായി വർധിപ്പിക്കാനുള്ള നടപടികളും യുദ്ധകാലാടിസ്ഥാനത്തിൽ മുന്നോട്ടുപോവുകയാണ്‌.

എയർ സെപ്പറേഷൻ സംവിധാനത്തിലൂടെ വായുവിൽനിന്ന്‌ ഓക്‌സിജൻ ഉൽപ്പാദിപ്പിക്കുന്ന പ്ലാന്റാണ്‌ ബാൽകോയിലുള്ളത്‌. കൂറ്റൻ ടാങ്കിൽ ദ്രവീകൃത ഓക്‌സിജൻ ശേഖരിച്ച്‌ സിലിൻഡറുകൾ നിറയ്‌ക്കാനുള്ള സൗകര്യമാണ്‌ പുതുതായി ഒരുക്കുന്നത്‌. ഇത് പൂർത്തിയാകുന്നതോടെ കണ്ണൂർ, കാസർകോട്‌ ജില്ലകളിൽ ചെറിയ ആശുപത്രികളിൽ പോലും ഓക്‌സിജൻ ലഭ്യതയ്‌ക്ക്‌ പ്രയാസമുണ്ടാവില്ലെന്നും ദിലീപ്‌.പി. നായർ പറഞ്ഞു. മംഗളൂരുവിൽ നിന്നാണ്‌ കാസർകോട്‌ ജില്ലയിലേക്കാവശ്യമായ സിലിൻഡറുൾ എത്തിച്ചിരുന്നത്‌. എന്നാൽ, കാസർകോട്ടേക്ക്‌ ഓക്‌സിജൻ എത്തിക്കുന്നതിന്‌ കർണാടകം നിയന്ത്രണം ഏർപ്പെടുത്തിയതോടെ വീണ്ടും എത്തിച്ചു തുടങ്ങി. തിങ്കളാഴ്‌ച രാവിലെ 40 സിലിൻഡറുകളും ഉച്ചയ്ക്ക്‌ ശേഷം 25 സിലിൻഡറുകളും അയച്ചു.