കണ്ണൂർ:പ്രതിസന്ധിയുടെ പടവുകൾ ചവിട്ടിക്കയറിയ ഒരു പൊതുവിദ്യാലയം ഉയിർത്തെഴുന്നേറ്റതിന്റെ കഥയാണ്‌ മാങ്ങാട്‌ എൽപി സ്‌കൂളിന്‌ പറയാനുള്ളത്‌. എന്തു വിലകൊടുത്തും നാടിന്റെ ഹൃദയമായ പൊതുവിദ്യാലയത്തെ സംരക്ഷിക്കുമെന്ന മാനേജ്‌മെന്റിന്റെയും നാടിന്റെയും നിശ്‌ചയദാർഢ്യമാണ്‌ ദേശീയപാതയ്‌ക്ക്‌ സമീപം തലയെടുപ്പോടെ നിൽക്കുന്നത്‌. പൊതുവിദ്യാഭ്യാസത്തിന്റെ മികവ്‌ കൂട്ടുന്ന പ്രവർത്തനങ്ങളുമായി സ്‌കൂളിന്റെ പുതിയകെട്ടിടം വ്യാഴാഴ്‌ച വൈകിട്ട്‌ മന്ത്രി വി ശിവൻകുട്ടി ഉദ്‌ഘാടനംചെയ്യും.
1893ൽ കളരിയായി തുടങ്ങിയ സ്ഥാപനത്തെ മാങ്ങാട്‌ അരയാലയിലെ കണ്ടമ്പേത്ത്‌ കൃഷ്‌ണൻ എഴുത്തച്ഛനാണ്‌ എഴുത്തുപള്ളിക്കൂടമാക്കിയത്‌. വിദ്യാസമ്പന്നനും ജ്യോതിഷിയുമായ എഴുത്തച്ഛൻ നരോത്ത്‌പറമ്പിൽ സ്ഥാപിച്ച വിദ്യാലയം 1930ന്‌ ശേഷമാണ്‌ ദേശീയപാതയ്ക്ക്‌ സമീപത്തേക്ക്‌ മാറിയത്‌. അദ്ദേഹത്തിന്റെ പിൻമുറക്കാരനായ സി കെ കൃഷ്‌ണൻ നമ്പ്യാരുടെ മക്കളാണ്‌ നിലവിൽ സ്‌കൂൾ മാനേജ്‌മെന്റ്‌.

2022ൽ ദേശീയപാത വികസനത്തിന്റെ ഭാഗമായി സ്‌കൂളിന്റെ സ്ഥലം ഏറ്റെടുത്തപ്പോൾ അഞ്ച്‌ ക്ലാസ്‌ മുറികൾ നഷ്‌ടമായി. സ്‌കൂൾ പ്രവർത്തനങ്ങൾ എങ്ങനെ മുന്നോട്ടുപോവുമെന്ന ആശങ്കയുയർന്നെങ്കിലും നാടിന്റെ കൂട്ടായ്‌മ തുണച്ചു. അന്നുമുതൽ മാങ്ങാട്‌ നൂറുൽ ഹിദായത്ത്‌ കമ്മിറ്റി മദ്രസയിലാണ്‌ സ്‌കൂൾ ഭാഗികമായി പ്രവർത്തിച്ചത്‌. കഴിഞ്ഞ ഒക്‌ടോബർ മുതൽ മാർച്ച്‌ 31 വരെ പൂർണമായും സ്‌കൂൾ മദ്രസയിലേക്ക്‌ മാറി.
ദേശീയപാതയ്‌ക്ക്‌ സ്ഥലം ഏറ്റെടുത്തപ്പോൾ സ്‌കൂളിലെ പ്രധാനകെട്ടിടം മാത്രമാണ്‌ ബാക്കിയായത്‌. ആ കെട്ടിടമുൾപ്പടെ പൊളിച്ച്‌ പുതിയ രണ്ടു നില കെട്ടിടം മാനേജ്‌മെന്റ്‌ നിർമിച്ചു. പ്രധാനാധ്യാപകൻ ടി ദിലീപനും വിദ്യാലയ വികസനസമിതിയുംചേർന്ന്‌ പ്രവർത്തനങ്ങൾ ഏകോപിപ്പിച്ചു. നിലവിൽ പത്തു ക്ലാസ് മുറിയും ലാബുമടങ്ങുന്ന പുതിയ കെട്ടിടത്തിലാണ്‌ പ്രവർത്തിക്കുന്നത്‌. എൽകെജി മുതൽ അഞ്ചുവരെ 160 കുട്ടികൾ പഠിക്കുന്നുണ്ട്‌.

പാടിയോട്ടുചാൽ:ഹാൻഡ്‌ബോളിലെ വയക്കര പെരുമ വേറെ ലെവലാണ്‌. ദേശീയതലത്തിൽ വയക്കരയുടെ പേര്‌ നാലുപതിറ്റാണ്ടായി ഉയർത്തിനിർത്താൻ ഒട്ടേറെ കായികപ്രതിഭകളുടെ കഠിനാധ്വാനമുണ്ട്‌. 1985ൽ പി ദാമോദരനെന്ന കായികാധ്യാപകന്റെ വരവോടെയാണ് വയക്കര ഗവ. ഹയർസെക്കൻഡറി സ്‌കൂൾ കൈപ്പന്തുകളിയുടെ ലോകം കീഴടക്കാൻ തുടങ്ങിയത്. സംസ്ഥാന ജൂനിയർ ഹാൻഡ്ബോൾ ചാമ്പ്യൻഷിപ്പിൽ സ്ഥിരം ചാമ്പ്യന്മാരും ഇവർതന്നെ. സൈനിക ടീമുകളായ ബാംഗ്ലൂർ എം.ഇ.ജി, ഊട്ടി എം.ആർ.സി, ഗോവ സിഗ്നൽസ്, ബാംഗ്ലൂർ എ.ഒ.സി, നാഗ്പുർ ഗാർഡ്‌സ്, വിശാഖപട്ടണം സി.ഐ.എസ്എഫ്, ഇന്ത്യൻ നേവി, ഇന്ത്യൻ റെയിൽവേ എന്നിവിടങ്ങളിൽ വയക്കരയുടെ കുട്ടികൾ ഇടംനേടി. സർക്കാർ സർവീസിൽ കയറിയവരും അനേകം. 2006-–- 07 ൽ മാത്രം ദേശീയ മത്സരങ്ങൾക്കായി കേരളത്തിനുവേണ്ടി ഇറങ്ങിയ വയക്കരക്കാർ 111 പേരാണ്. ജൂനിയർ നാഷണൽ മീറ്റിൽ പങ്കെടുക്കുന്ന സംസ്ഥാന ടീമിൽ വർഷങ്ങളായി പകുതിയിലധികം പേരും ഇവിടുത്തെ കുട്ടികൾ.കോമൺവെൽത്ത് ഗെയിംസ്, ഏഷ്യൻ ജൂനിയർ ചാമ്പ്യൻഷിപ്പ്, സാഫ് ഗെയിംസ്, ഏഷ്യൻ ഗെയിംസ് എന്നിവയിൽ വയക്കരയുടെ കൈയൊപ്പുണ്ട്‌. ലോക സർവകലാശാലാ ചാമ്പ്യൻഷിപ്പിൽ ഇന്ത്യൻ ടീമിന്റെ വൈസ് ക്യാപ്റ്റൻ ഉൾപ്പെടെയുള്ളവർ വയക്കരയുടെ താരങ്ങൾ. ജൂനിയർ ഗേൾസ് ചാമ്പ്യൻഷിപ്പിൽ 1995 മുതൽ തുടർച്ചയായി 11 തവണ ഒന്നാംസ്ഥാനം. 1989 മുതൽ സബ് ജൂനിയർ ഗേൾസ് ചാമ്പ്യൻഷിപ്പിൽ തുടർച്ചയായി ഒന്നാംസ്ഥാനം. സ്കൂളിൽ എം.എൽ.എ ഫണ്ടിൽനിന്നും ഒന്നരക്കോടി രൂപ മുടക്കി ഇൻഡോർ സ്റ്റേഡിയവും നിർമിച്ചു. സംസ്ഥാനബജറ്റിൽ മൂന്നുകോടിയും അനുവദിച്ചു. പെൺകുട്ടികൾക്ക് ഹോസ്റ്റലുണ്ട്. മുമ്പുണ്ടായിരുന്ന ഡേബോർഡിങ്‌ കേന്ദ്രം പുനസ്ഥാപിച്ചു കിട്ടണമെന്നാണ് ഇവരുടെ ആവശ്യം.
റിട്ട. കായികാധ്യാപകൻ പി ദാമോദരൻ, കോച്ച് കെ ധനേഷ്, സ്കൂൾ കായികാധ്യാപകൻ ഇ.വി പ്രമോദ്കുമാർ, മുൻ ഹാൻഡ്ബോൾ താരവും റിട്ട. ആർമി ഉദ്യോഗസ്ഥനുമായ ടി രാമകൃഷ്ണൻ എന്നിവരാണ് പരിശീലകർ.

കണ്ണൂർ: ജില്ലയിൽ അഞ്ച്‌ ആയുഷ് സ്ഥാപനങ്ങൾക്ക് കൂടി ഗുണനിലവാര മാനദണ്ഡമായ നാഷണൽ അക്രഡിറ്റേഷൻ ബോർഡ്‌ ഓഫ്‌ ഹോസ്‌പിറ്റൽസ്‌ (എൻ എ ബി എച്ച്‌) അംഗീകാരം.പട്ടുവം, കതിരൂർ, കാങ്കോൽ ആയുർവേദ ഡിസ്പൻസറികൾ കല്യാശേരി, മട്ടന്നൂർ ഹോമിയോ ഡിസ്പൻസറികൾ എന്നിവക്കാണ് ദേശീയ സർട്ടിഫിക്കേഷൻ.ജില്ലയിൽ ആയുഷ് ഹെൽത്ത് ആൻഡ്‌ വെൽനസ്‌ സെന്ററായി ഉയർത്തിയ 57 സ്ഥാപനങ്ങളിൽ 13 എണ്ണത്തിനാണ് ആദ്യ ഘട്ടത്തിൽ അംഗീകാരം ലഭിച്ചത്.പ്രാഥമിക ആരോഗ്യ സേവനം പരമാവധി നൽകുക, ആരോഗ്യ പദ്ധതികൾ നടപ്പാക്കുക, രോഗ പ്രതിരോധ പ്രവർത്തനം നടത്തുക എന്നിവയാണ്‌ ആയുഷ് സെന്ററുകളുടെ ഉത്തരവാദിത്വം.