പേരാവൂർ: ബഹുനില കെട്ടിട നിർമാണത്തിന്റെ ഭാഗമായുള്ള അസൗകര്യങ്ങൾ ചൂണ്ടിക്കാട്ടി പേരാവൂർ താലൂക്കാസ്പത്രിയിലെ പ്രസവ ചികിത്സാ വിഭാഗവും ബന്ധപ്പെട്ട ഡോക്ടർമാരേയും ഇരിട്ടി താലൂക്കാസ്പത്രിയിലേക്ക് മാറ്റാൻ നീക്കം. താത്കാലികമായി പ്രസവവും അനുബന്ധ ചികിത്സയും ഇരിട്ടിയിലേക്ക് മാറ്റാനും പിന്നീട് സ്ഥിരമായി ഇരിട്ടിയിൽ നിലനിർത്താനുമാണ് ആരോഗ്യവകുപ്പ് നീക്കം നടത്തുന്നത്. ഇതിനെതിരെ പ്രതിഷേധം ഉയർന്നിട്ടുണ്ട്.

ആസ്പത്രിക്ക് ആധുനിക സൗകര്യങ്ങളോടെ കിഫ്ബി ഫണ്ടിൽ ബഹുനില കെട്ടിടം നിർമിക്കുന്ന സ്ഥലത്തുള്ള പഴയ കെട്ടിടത്തിലാണ് നിലവിൽ പ്രസവ വാർഡും അനുബന്ധ ചികിത്സയും നടത്തുന്നത്.പുതിയ രൂപരേഖ പ്രകാരം ഈ കെട്ടിടം പൊളിച്ചു നീക്കിയാൽ മാത്രമേ ബഹുനില കെട്ടിട നിർമാണം തുടങ്ങാൻ സാധിക്കൂ. പ്രസവ വാർഡ് നിലവിലെ ഐ.പി. വിഭാഗം കെട്ടിടത്തിലേക്ക് മാറ്റാൻ സാധിക്കുമെങ്കിലും അതിനുള്ള നടപടികൾ ആസ്പത്രിയുടെ ഭരണ ചുമതലയുള്ള ബ്ലോക്ക് പഞ്ചായത്ത് സ്വീകരിക്കുന്നില്ലെന്നാണ് ആക്ഷേപം.

ആരോഗ്യവകുപ്പിന്റെ പുതിയ തീരുമാന പ്രകാരം ഓരോ ജില്ലയിലും ‘ഡെലിവറി പോയിന്റുകൾ’ ഒരുക്കാൻ പദ്ധതിയുണ്ട്. കണ്ണൂർ ജില്ലയിൽ ഇത്തരത്തിൽ ആറ് പോയിന്റുകൾ ഒരുക്കുന്നതിൽ ഒന്ന് ഇരിട്ടിയിലാണ്. ഡെലിവറി പോയിന്റുകളിൽ പേരാവൂരിനെ ഉൾപ്പെടുത്തിയിട്ടുമില്ല . ഏഴ് ഗൈനക്കോളജിസ്റ്റ്, നാല് അനസ്‌തേഷ്യ, അഞ്ച് പീഡിയാട്രീഷന്മാർ എന്നിവരുടെ സേവനം ലഭ്യമാക്കുന്നതാണ് ഒരോ ഡെലിവറി പോയിന്റുകളും. പേരാവൂർ താലൂക്കാസ്പത്രിയിലെ പ്രസവ ചികിത്സാ വിഭാഗം ഇരിട്ടിയിലേക്ക് മാറ്റുകയാണെങ്കിൽ മൂന്ന് ഗൈനക്കോളജിസ്റ്റും ഒരു അനസ്‌ത്യേഷിസ്റ്റും ഒരു പീഡിയാട്രീഷനും പേരാവൂരിന് നഷ്ടമാകും. പേരാവൂർ ബ്ലോക്കിലെയും ആറളം ഫാം പുനരധിവാസ കേന്ദ്രത്തിലെയും നൂറുക്കണക്കിനാളുകളുടെ ആശ്രയമാണ് പേരാവൂർ താലൂക്കാസ്പത്രി. 14 ഡോക്ടർമാരുടെ സേവനം ലഭ്യമാകേണ്ട ഈ ആസ്പത്രിയിൽ നിലവിൽ ആറു ഡോക്ടർമാരുടെ ഒഴിവുകളുണ്ട്. ഇതു കാരണം ഒ.പിയും അത്യാഹിത വിഭാഗവും പ്രതിസന്ധിയിലാണ്. ഇതിനിടയിലാണ് പ്രസവ ചികിത്സാ വിഭാഗം ഇരിട്ടിയിലേക്ക് മാറ്റാനുള്ള നീക്കം നടക്കുന്നത്.