തിരുവനന്തപുരം : അനധികൃത കയ്യേറ്റങ്ങൾ തടയുന്നതിന് ആരോഗ്യവകുപ്പിന് കീഴിലെ എല്ലാ സ്ഥാപനങ്ങളും ചുറ്റുമതിൽ കെട്ടി സംരക്ഷിക്കാൻ ആരോഗ്യ വകുപ്പ് ഡയറക്ടറുടെ ഉത്തരവിറങ്ങി.ആരോഗ്യവകുപ്പിന് അധീനതയിലുള്ള പല സ്ഥാപനങ്ങളിലും ചുറ്റുമതിൽ ഇല്ലാത്തതിനാൽ കയ്യേറ്റങ്ങൾ നടക്കുന്നതാണ് ഭൂരിഭാഗം കോടതിക്കേസുകൾക്കും കാരണമാവുന്നത് എന്ന സാഹചര്യത്തിലാണ് ആരോഗ്യവകുപ്പിന്റെ സുപ്രധാന നടപടി.

ഉത്തരവിലെ നിർദ്ദേശങ്ങൾ

1.ആസ്പത്രി മാനേജ്‌മെന്റ് കമ്മിറ്റിയുടെ(HMC) ശ്രദ്ധയിൽപ്പെടുത്തി ചുറ്റുമതിൽ ഇല്ലാത്ത സ്ഥാപനങ്ങളിൽ വസ്തു അളന്ന് തിട്ടപ്പെടുത്തി ആസ്പത്രിയും പരിസരവും സംരക്ഷിക്കണം.

2.ആസ്പത്രി കോമ്പൗണ്ടിനുള്ളിലെ റോഡുകൾ ആസ്പത്രി ആവശ്യങ്ങൾക്ക് മാത്രം ഉപയോഗിക്കേണ്ടതും പൊതുവഴി ആകാതിരിക്കുകയും ചെയ്യുന്നതിനുള്ള നടപടികൾ സ്വീകരിക്കണം.

3. പുറമ്പോക്ക് ഭൂമിയിൽ പ്രവർത്തിച്ചുവരുന്ന ആസ്പത്രികൾ, ആരോഗ്യവകുപ്പിന്റെ അധീനതയിലുള്ള സ്ഥലമാക്കി മാറ്റുന്നതിനുള്ള നടപടികൾ സ്വീകരിക്കണം.

ഉത്തരവ് സംസ്ഥാനത്തെ മുഴുവൻ ജില്ലാ മെഡിക്കൽ ഓഫീസർമാർക്കും ആരോഗ്യവകുപ്പ് ഡയറക്ടറുടെ ഓഫീസിൽ നിന്നും ലഭിച്ചിട്ടുണ്ട്.