പേരാവൂർ: താലൂക്കാസ്പത്രി വളപ്പിലെ റോഡിന്റെ അവകാശത്തർക്കത്തിന് പരിഹാരമായി.പ്രസ്തുത റോഡ് പേരാവൂർ ഗ്രാമപ്പഞ്ചായത്തിന്റെയോ ബ്ലോക്ക് പഞ്ചായത്തിന്റോ ആസ്തിയിൽ ഉൾപ്പെട്ടിട്ടില്ലെന്നും ആരോഗ്യവകുപ്പിന്റെ കൈവശമാണെന്നും ബ്ലോക്ക് പഞ്ചായത്ത് പ്രസിഡന്റ് കെ.സുധാകരൻ വ്യക്തമാക്കി.

തങ്ങളുടെ വീടുകളിലേക്കുള്ള വഴി ആസ്പത്രി അധികൃതർ തടയുന്നുവെന്ന് കാണിച്ച് പരിസരവാദികളായ ചിലർ ഹൈക്കോടതിയിൽ കേസ് നല്കിയ പശ്ചാത്തലത്തിലാണ് ബ്ലോക്ക് പഞ്ചായത്ത് നിലപാട് വ്യക്തമാക്കിയത്.ബ്ലോക്ക് പഞ്ചായത്തിന്റെ ആസ്തിയിൽ ആസ്പത്രി റോഡ് ഉൾപ്പെട്ടിട്ടില്ലെന്ന് വിശദീകരിച്ച് ഹൈക്കോടതിയിൽ സത്യവാങ്മൂലം നല്കിയിട്ടുണ്ടെന്നും പ്രസിഡന്റ് പറഞ്ഞു.

പേരാവൂർ താലൂക്കാസ്പത്രി സ്‌പെഷാലിറ്റി ആസ്പത്രിയാക്കുന്നതിന് ബഹുനില കെട്ടിടം നിർമിക്കാൻ കിഫ്ബി ഫണ്ടിൽ 53 കോടി രൂപ സർക്കാർ അനുവദിച്ചിരുന്നു.ഇതിനുള്ള മാസ്റ്റർപ്ലാൻ കിഫ്ബി അംഗീകരിക്കുകയും പ്രവൃത്തി തുടങ്ങുകയും ചെയ്ത ഘട്ടത്തിലാണ് സമീപവാസികളായ ഡോ.എ.സദാനന്ദൻ,ലത രവീന്ദ്രൻ എന്നിവർ മാസ്റ്റർ പ്ലാൻ പ്രാവർത്തികമാക്കുന്നതിനെതിരെ 2021 ജൂലായിൽ ഹൈക്കോടതിയിൽ നിന്ന് ഇടക്കാല സ്റ്റേ സമ്പാദിച്ചത്.

മാസ്റ്റർ പ്ലാൻ പ്രാവർത്തികമാക്കിയാൽ തങ്ങളുടെ വീടുകളിലേക്കുള്ള വാഹന ഗതാഗതം തടസ്സപ്പെടുമെന്ന് കാണിച്ചാണ് സ്റ്റേ വാങ്ങിയത്.ഇതോടെ ആസ്പത്രി കെട്ടിട നിർമാണം നിലക്കുകയും ചെയ്തു.ആസ്പത്രി വളപ്പിലെ റോഡ് പൊതുവഴിയാണെന്നും ഗ്രാമപ്പഞ്ചായത്തിൽ നിക്ഷിപ്തമാണെന്നും കാണിച്ച് പേരാവൂർ പഞ്ചായത്ത് സെക്രട്ടറി പ്രീത ചെറുവളത്ത് 2021 മേയിൽ നല്കിയ കത്ത് കോടതിയിൽ ഹാജരാക്കിയാണ് സ്റ്റേ സമ്പാദിച്ചത്.

സ്റ്റേക്കെതിരെ അധികൃതർ നടപടി സ്വീകരിക്കാത്തതിനാൽ പൊതുപ്രവർത്തകനായ ബേബി കുര്യൻ കേസിൽ കക്ഷി ചേർന്ന് ആസ്പത്രി റോഡിന്റെ യഥാർഥ അവകാശി ആരോഗ്യവകുപ്പാണെന്ന് വാദിക്കുകയും രേഖകൾ ഹാജരാക്കുകയും ചെയ്തു.ഇതേത്തുടർന്ന് ബ്ലോക്ക് പഞ്ചായത്തിനോടും ഗ്രാമപ്പഞ്ചായത്തിനോടും റോഡിന്റെ ഉടമസ്ഥതയുമായി ബന്ധപ്പെട്ട് സത്യവാങ്മൂലം സമർപ്പിക്കാൻ കോടതി ആവശ്യപ്പെടുകയായിരുന്നു.

റോഡ് തങ്ങളുടെ ആസ്തി രജിസ്ട്രറിൽ ഉൾപ്പെട്ടിട്ടില്ലെന്ന് കാണിച്ച് ഗ്രാമപ്പഞ്ചായത്തും കോടതിയിൽ സത്യവാങ്ങ് മൂലം നല്കിയിട്ടുണ്ടെന്ന് പ്രസിഡന്റ് പി.പി.വേണുഗോപാലൻ പറഞ്ഞു.