പേരാവൂർ: കക്കൂസ് മാലിന്യം പുഴയിൽ ഒഴുക്കുന്നതിനെതിരെയും പാർക്കിംഗ് ഏരിയ മറ്റാവശ്യങ്ങൾക്ക് ഉപയോഗിക്കുന്നതിനെതിരെയും നല്കിയ പരാതിയിൽ നടപടി വൈകുന്നത് അന്വേഷിക്കാൻ തദ്ദേശ സ്വയംഭരണ സ്ഥാപന ഓംബുഡ്‌സ്മാന്റെ ഉത്തരവ്.തൊണ്ടിയിൽ സ്വദേശി കെ.എം.സ്റ്റാനി നല്കിയ പരാതിയിൽ പേരാവൂർ പഞ്ചായത്ത് സ്വീകരിച്ച നടപടികൾ അന്വേഷിച്ച് റിപ്പോർട്ട് സമർപ്പിക്കാൻ പഞ്ചായത്ത് ജില്ലാ ജോയന്റ് ഡയറക്ടർക്കാണ് ജസ്റ്റിസ് പി.എസ്.ഗോപിനാഥൻ ഉത്തരവ് നല്കിയത്.

നിലവിലെ സെക്രട്ടറി,മുൻ സെക്രട്ടറിമാരായ ടി.പി.ശശീന്ദ്രൻ,പ്രീത ചെറുവളത്ത് എന്നിവരാണ് എതിർകക്ഷികൾ.തൊണ്ടിയിൽ ടൗൺ പാലത്തിന് സമീപത്തെ സ്വകാര്യ കെട്ടിടത്തിലെ കക്കൂസ് മാലിന്യം കാഞ്ഞിരപ്പുഴയിലേക്കൊഴുക്കിവിടുന്നതായാണ് സ്റ്റാനി പേരാവൂർ പഞ്ചായത്തിൽ നല്കിയ പ്രധാന പരാതി.ഈ പുഴയിലെ വെള്ളമാണ് പേരാവൂർ പഞ്ചായത്തിലെ കുടിവെള്ള വിതരണത്തിനുപയോഗിക്കുന്നത്.

2018-ലുണ്ടായ പ്രളയത്തിൽ ശൗചാലയങ്ങളുടെ സംഭരണി തകർന്നതിനാൽ മാലിന്യം പുഴയിലേക്ക് ഒഴുക്കിവിടുന്നുവെന്ന് കാണിച്ച് 2019-ൽ പഞ്ചായത്തിൽ പരാതി നല്കിയിട്ടും നടപടിയില്ലെന്ന് കാണിച്ചാണ് സ്റ്റാനി ഓംബുഡ്‌സ്മാനെ സമീപിച്ചത്.

2019-ൽ നല്കിയ പരാതിയിൽ പഞ്ചായത്തധികൃതർ തയ്യാറാക്കിയിട്ടും ബന്ധപ്പെട്ട അധികൃതർക്ക് കൈമാറാതിരുന്ന റിപ്പോർട്ടിന്റെ കോപ്പി പരാതിക്കാരന് ഉടൻ നല്കണമെന്നും ഓംബുഡ്‌സ്മാന്റെ ഉത്തരവിൽ പറയുന്നു.തൊണ്ടിയിൽ ടൗണിൽ പാർക്കിംഗിന് മാറ്റിവെച്ച സ്വകാര്യ കെട്ടിടത്തിലെ പാർക്കിംഗ് ഏരിയ ഒഴിവാക്കി മറ്റാവശ്യങ്ങൾക്ക് ഉപയോഗിക്കുന്നതിനെതിരെയും അന്വേഷിക്കണമെന്നും ഉത്തരവിലുണ്ട്.