കണ്ണൂർ : ഡി.വൈ.എഫ്.ഐ നേതാക്കൾക്കെതിരെ വിമർശനവുമായി രംഗത്തെത്തിയ ഷുഹൈബ് വധക്കേസ് പ്രതി ആകാശ് തില്ലങ്കേരിക്കെതിരെ ഡി.വൈ.എഫ്.ഐ കണ്ണൂർ ജില്ലാ കമ്മിറ്റി. പൊതുശല്യങ്ങളെ ഒറ്റപ്പെടുത്തണമെന്നും ഡി.വൈ.എഫ്.ഐ നേതാക്കളെ അധിക്ഷേപിക്കുന്ന ക്വട്ടേഷൻ, സ്വർണക്കടത്ത് സംഘത്തെ പ്രതിരോധിക്കുമെന്നും കമ്മിറ്റി അറിയിച്ചു. ആകാശ് തില്ലങ്കേരിക്കെതിരെ നിയമനടപടി സ്വീകരിക്കുമെന്നും ഡി.വൈ.എഫ്.ഐ വ്യക്തമാക്കി.

ആകാശ് തില്ലങ്കേരിയെ ക്വട്ടേഷൻ രാജാവ്’ എന്ന് വിശേഷിപ്പിച്ച സി.പി.എം ജില്ലാ സെക്രട്ടറി എം.വി.ജയരാജൻ, ഷുഹൈബ് വധത്തിൽ മാപ്പുസാക്ഷി ആകാനുളള ശ്രമമാണ് ആകാശിന്റേതെന്നു പറഞ്ഞു. ഷുഹൈബ് വധത്തിൽ പങ്കില്ലെന്ന് സി.പി.എം നേരത്തേ പറഞ്ഞതാണ്. ആകാശിന്റെ പ്രതികരണത്തിനു പിന്നിൽ ഗൂഢാലോചനയാണെന്നും എം.വി.ജയരാജൻ ആരോപിച്ചു.

പാർട്ടിക്കുവേണ്ടി കുറ്റങ്ങൾ ചെയ്തെന്നു സൂചിപ്പിക്കുന്ന ഫെയ്സ്ബുക് കമന്റിലൂടെയാണ് ആകാശ് സി.പി.എം-ഡി.വൈ.എഫ്.ഐ നേതൃത്വത്തിനെതിരെ രംഗത്തു വന്നത്. പല കാര്യങ്ങളിലും കുഴിയിൽ ചാടിച്ചത് ഡി.വൈ.എഫ്.ഐ മട്ടന്നൂർ ബ്ലോക്ക് സെക്രട്ടറി സരീഷ് ആണെന്ന് ആകാശ് തില്ലങ്കേരി ആരോപിച്ചു. ആഹ്വാനം ചെയ്തവർക്കു സഹകരണ സ്ഥാപനങ്ങളിൽ ജോലി കിട്ടി. നടപ്പാക്കിയവർക്ക് പട്ടിണിയും പടിയടച്ച് പിണ്ഡംവയ്ക്കലും. പാർട്ടി സംരക്ഷിക്കാതിരിക്കുമ്പോൾ പലവഴിക്ക് സഞ്ചരിക്കേണ്ടി വരുമെന്നും ഫെയ്സ്ബുക് കമന്റിൽ ആകാശ് പറഞ്ഞു.