പേരാവൂർ : പുതുശേരി-കാളിക്കുണ്ട് മുത്തപ്പൻ മടപ്പുര തിരുവപ്പന മഹോത്സവത്തോടനുബന്ധിച്ച് നടന്ന താലപ്പൊലി ഘോഷയാത്ര മതസൗഹാർദ്ദത്തിന്റെ വേറിട്ട കാഴ്ചയായി.ഘോഷയാത്രയ്ക്കെത്തിയ ഭക്തജനങ്ങളെ മധുരം നൽകിയാണ് പേരാവൂർ കൊളവഞ്ചാൽ അബുഖാലിദ് മസ്ജിദ് ഭാരവാഹികൾ സ്വീകരിച്ചത്.

പള്ളി കമ്മിറ്റിയും ക്ഷേത്ര കമ്മിറ്റിയും ഒരുമിച്ചെടുത്ത തീരുമാനമനുസരിച്ച് പള്ളിക്ക് മുന്നിൽ വച്ചാണ് താലപ്പൊലി ഘോഷയാത്ര ആരംഭിച്ചത്.രാത്രി എട്ടോടെ ഘോഷയാത്രയ്ക്ക് എത്തിയവർക്ക് പള്ളിക്കമ്മിറ്റി വക ലഡുവും ദാഹജലവും ഒരുക്കിയിരുന്നു.

മതത്തിനുമപ്പുറം മനുഷ്യർ തമ്മിലുള്ള ഇഴയടുപ്പത്തെ ഓർമ്മിപ്പിക്കത്തക്ക വിധത്തിലായിരുന്നു ഘോഷയാത്രയും ഒരുക്കങ്ങളും . പുതുതലമുറയുടെ മനസ്സുകളിൽ മതത്തെക്കുറിച്ചും മതസൗഹാർദ്ദത്തെ കുറിച്ചും അവബോധം സൃഷ്ടിക്കാൻ ഇത്തരം കൂട്ടായ പ്രവർത്തനങ്ങൾക്ക് കഴിയുമെന്ന് പള്ളി ഭാരവാഹികൾ പറഞ്ഞു.കൊളവഞ്ചാൽ പള്ളി ഇമാം അലി നിസാമി,പള്ളി കമ്മിറ്റി ഭാരവാഹികളായ എ.കെ ഇബ്രാഹിം,യു.വി.റഹീം,കെ.പി അബ്ദുൾ റഷീദ്,ഉമ്മർ പൊയിൽ ,വി കെ റഫീക്ക്, സി. മായൻ, കെ. റഹീം എന്നിവർ സ്വീകരണത്തിന് നേതൃത്വം നല്കി.

ക്ഷേത്ര കമ്മിറ്റി ഭാരവാഹികളായ മണക്കടവൻ രാഘവൻ ,കെ. എ. രജീഷ്,കെ.സന്തോഷ്,മനീഷ് തുടങ്ങിയവരും സംബന്ധിച്ചു.

കൊളവഞ്ചാൽ പള്ളിക്ക് സമീപത്തു നിന്നുമാരംഭിച്ച താലപ്പൊലി ഘോഷയാത്ര കാളിക്കുണ്ട് ക്ഷേത്രസന്നിധിയിൽ സമാപിച്ചു.