കേളകം: ശാന്തിഗിരി കൈലാസം പടിയിൽ ഭൂമിക്ക് വിള്ളൽ വീണ പ്രദേശത്തെ ഏഴ് കുടുംബങ്ങൾക്ക് സ്ഥലം വാങ്ങി വീടു വെക്കുന്നതിന് 10 ലക്ഷം രൂപ വീതം അനുവദിച്ചുകൊണ്ടുള്ള സർക്കാർ ഉത്തരവ് പുറത്തിറങ്ങി.കേളകംപഞ്ചായത്ത് ഭരണസമിതിയുടെ തുടർച്ചയായ ഇടപെടലിന്റെ ഭാഗമായാണ് അടിയന്തരമായി മാറ്റി താമസിപ്പിക്കേണ്ട ഏഴ് കുടുംബങ്ങൾക്ക് 10 ലക്ഷം രൂപ വീതം അനുവദിച്ചുള്ള ഉത്തരവിറങ്ങിയത്. മറ്റ് കുടുംബങ്ങളുടെ കാര്യം വിശദമായ പരിശോധനക്ക് ശേഷം പരിഗണിക്കാം എന്നും ഉത്തരവിലുണ്ട്.

2003 ലാണ് പ്രദേശത്ത് ഭൂമിയിൽ വിള്ളൽ പ്രത്യക്ഷപ്പെട്ട് തുടങ്ങിയത്.2018-ലെ പ്രളയത്തോടെ പ്രശ്‌നം രൂക്ഷമാവുകയും ചില വീടുകൾ പൂർണമായി തകരുകയും ചെയ്തു.പ്രളയത്തിന് ശേഷം മൂന്ന് കുടുംബങ്ങൾക്ക് 10 ലക്ഷം വീതം നൽകി മാറ്റി താമസിപ്പിച്ചു. പിന്നീട് നടത്തിയ വിദഗ്ധ പരിശോധനയിൽ സോയിൽ പൈപ്പിങ്ങ് പ്രതിഭാസമാണ് ഭൂമി വിണ്ടുകീറലിന് കാരണമെന്ന് കണ്ടെത്തി.

തുടർന്ന് മഴക്കാലങ്ങളിൽ ഈ പ്രദേശത്തെ ജനങ്ങളെ ശാന്തിഗിരി സ്‌കൂളിലേക്ക് മാറ്റി താമസിപ്പിക്കുകയാണ് ചെയ്തു വരുന്നത്.ശാശ്വത പരിഹാരം വേണമെന്നും അടിയന്തരമായി 15 കുടുംബങ്ങളെ മാറ്റി താമസിപ്പിക്കണമെന്നും പഞ്ചായത്ത് ഭരണസമിതി ആവശ്യപ്പെട്ടു.ഇതിന്റെ ഭാഗമായി രണ്ടു തവണ വിദഗ്ധർ ഇവിടം സന്ദർശിച്ച് റിപ്പോർട്ട് നൽകി.

തുടർന്ന് സംസ്ഥാന ദുരന്ത നിവാരണ അതോറിറ്റി നേരിട്ട് ഇടപെടുകയും പഞ്ചായത്ത്, റവന്യു, ദുരന്തനിവാരണ രംഗത്തെ വിദഗ്ധർ, പാലക്കാട് ഐ ഐ ടി തുടങ്ങിയവരുടെ യോഗം വിളിച്ച് വിഷയം വിശദമായി ചർച്ച ചെയ്യുകയും ചെയ്തിരുന്നു.വിശദ പഠനത്തിനായി പാലക്കാട് ഐ .ഐ .ടിയെ സംസ്ഥാന ദുരന്ത നിവാരണ അതോറിറ്റി ചുമതലപ്പെടുത്തിയിട്ടുമുണ്ട്.