പടിഞ്ഞാറത്തറ: പുതുശേരിയിൽ കടുവ ആക്രമിച്ചു പരുക്കേൽപിച്ച കർഷകൻ പള്ളിപ്പുറത്ത് സാലു (52) മരിച്ചു. ഇന്നു രാവിലെ 11 മണിയോടെയാണ് തൊണ്ടർനാട് പുതുശേരിയിൽ വീടിനടുത്ത് ഇറങ്ങിയ കടുവ സാലുവിനെ ആക്രമിച്ചത്. ഉടനെ കൽപറ്റയിലെ സ്വകാര്യ ആശുപത്രിയിലെത്തിച്ചെങ്കിലും വൈകിട്ടോടെ മരിച്ചു. കാലിനു ഗുരുതര പരുക്കേറ്റ സാലുവിന് ആശുപ്രതിയിലേക്കുകൊണ്ടുപോകുന്നതിനിടെ ഹൃദയാഘാതവുമുണ്ടായി.

ജനവാസകേന്ദ്രത്തിലിറങ്ങിയ കടുവ കർഷകന്റെ ജീവനെടുത്തതിൽ പുതുശേരിയിൽ നാട്ടുകാരുടെ ശക്തമായ പ്രതിഷധം. കടുവ ഇറങ്ങിയ വിവരം അറിഞ്ഞിട്ടും വനപാലകർ സ്ഥലത്തെത്താൻ വൈകിയെന്നു നാട്ടുകാർ പറയുന്നു. കാൽപാട് കണ്ട ഭാഗത്തു തിരച്ചിൽ നടത്താതെ വനപാലകർ തിരിച്ചുപോയി. കടുവയെ എത്രയും വേഗം കണ്ടെത്തി വെടിവച്ചുകൊല്ലണമെന്നും ഭീതി അകറ്റണമെന്നും നാട്ടുകാർ ആവശ്യപ്പെട്ടു.

അതേസമയം, കടുവയ്ക്കായുള്ള തിരച്ചിൽ തുടരുകയാണ്. കടുവയെ ഇതുവരെ പിടികൂടാനാകാത്ത സാഹചര്യത്തിൽ നാട്ടുകാർക്ക് ജാഗ്രതാനിർദ്ദേശം നൽകിയിട്ടുണ്ട്.