പേരാവൂർ:നീർത്തടാധിഷ്ടിത പദ്ധതികളുടെ കാര്യത്തിലും മണ്ണ്,ജല സംരക്ഷണത്തിന്റെ കാര്യത്തിലും പേരാവൂർ കേരളത്തിന് മാതൃകയാവുകയാണെന്ന് തദ്ദേശ സ്വയംഭരണവകുപ്പ് മന്ത്രി എം.ബി.രാജേഷ് പറഞ്ഞു.പേരാവൂർ ബ്ലോക്ക് പഞ്ചായത്ത് നടപ്പാക്കിയ ജലാഞ്ജലി നീരുറവ് പദ്ധതിയുടെ അടിസ്ഥാനത്തിൽ സംസ്ഥാന നീരുറവ് പദ്ധതി പ്രഖ്യാപനം പേരാവൂരിൽ നിർവഹിച്ച് സംസാരിക്കുകയായിരുന്നു മന്ത്രി.

ഈ പദ്ധതിയിലൂടെ പേരാവൂർ കേരളത്തിനും കേരളം ഇൻഡ്യക്കും വഴികാട്ടുകയാണ്.നാടിനെ സംബന്ധിച്ച് ഏറ്റവും പ്രധാനപ്പെട്ട ഒരു പദ്ധതി എങ്ങിനെ നടപ്പാക്കാം എന്ന് പേരാവൂർ ബ്ലോക്കും ഏഴ് പഞ്ചായത്തുകളും സംയുക്തമായി കാണിച്ചു തന്നിരിക്കുകയാണ്.സംസ്ഥാനത്തെ മുഴുവൻ പഞ്ചായത്തുകളിലും ഇതേ മാതൃക പിന്തുടർന്ന് പദ്ധതി നടപ്പിലാക്കും.നവകേരളം കർമപദ്ധതിയുടെ ഭാഗമായി ഹരിതകേരളം മിഷനുംതൊഴിലുറപ്പ് മിഷനും സംയുക്തമായാണ് പദ്ധതി സംസ്ഥാനത്ത് നടപ്പിലാക്കുകയെന്നും മന്ത്രി പ്രഖ്യാപിച്ചു.

തൊഴിലുറപ്പ് മിഷന്റെ ആഭിമുഖ്യത്തിൽ അടുത്ത വർഷം നടപ്പാക്കുന്ന പദ്ധതികൾ,സമഗ്ര നീർത്തട പ്ലാനുകളെ അടിസ്ഥാനമാക്കി വിവിധവകുപ്പുകളുടെ സംയോജനത്തിലൂടെ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ തയ്യാറാക്കുന്നതിനാണ് നീരുറവ് പദ്ധതിയിലൂടെ സർക്കാർ ലക്ഷ്യമിടുന്നതെന്നും മന്ത്രി പറഞ്ഞു.

അഡ്വ.സണ്ണി ജോസഫ് എം.എൽ.എ അധ്യക്ഷത വഹിച്ചു.തദ്ദേശ സ്ഥാപനങ്ങൾക്കുള്ള ആദരം നവകേരളം കർമപദ്ധതി രണ്ട് സംസ്ഥാന കോ-ഓർഡിനേറ്റർ ടി.എൻ.സീമ നിർവഹിച്ചു.ബ്ലോക്ക് പഞ്ചായത്ത് അസോസിയേഷൻ സംസ്ഥാന സെക്രട്ടറി സി.എം.കൃഷ്ണൻ ജല ബാലോത്സവ വിജയികൾക്കുള്ള സർട്ടിഫിക്കറ്റ് വിതരണവും സി.ഡബ്ലിയു.ആർ.ഡിഎം.ഡയറക്ടർ ഡോ. മനോജ് പി സാമുവൽ നീരുറവ് തീം സോങ്ങ് ആൻഡ് ബ്രോഷർ പ്രകാശനവും നടത്തി.തൊഴിലുറപ്പ് മിഷൻ സംസ്ഥാന പോഗ്രാം ഓഫീസർ കെ. ബാലചന്ദ്രൻ റിപ്പോർട്ടവതരിപ്പിച്ചു.