പേരാവൂർ: കണിച്ചാർ,കോളയാട് പഞ്ചായത്തുകളിലുണ്ടായ ഉരുൾപൊട്ടലുമായി ബന്ധപ്പെട്ട് സംസ്ഥാന ദുരന്ത നിവാരണ സമിതി ദുരന്തബാധിത മേഖലകളിൽ നടത്തിയ പഠനങ്ങളുടെ റിപ്പോർട്ട് സർക്കാരിന് സമർപ്പിച്ചു.ഹസാർഡ് ആൻഡ് റിസ്‌ക് അനലിസ്റ്റ് ജി.എസ്.പ്രദീപിന്റെ നേതൃത്വത്തിൽ സംസ്ഥാന ദുരന്തനിവാരണ സമിതി സീനിയർ കൺസൾട്ടന്റ് ഡോ.എച്ച്.വിജിത്ത്,ജി.ഐ.എസ് സ്‌പെഷലിസ്റ്റ് ഡോ.എസ്.രവീന്ദ്രൻ എന്നിവരടങ്ങുന്ന സംഘം നടത്തിയ പഠന റിപ്പോർട്ടാണ് ചീഫ് സെക്രട്ടറിക്ക് സമർപ്പിച്ചത്.

ഉരുൾപൊട്ടലുണ്ടായതിന്റെകാരണങ്ങൾ, പ്രദേശത്തെ ഭൂപ്രകൃതി, ഭൂഘടന,മറ്റു അനുബന്ധഘടകങ്ങൾ എന്നിവയെക്കുറിച്ച് സെപ്തംബർ 22 മുതൽ 25 വരെയാണ് സംഘം പഠനം നടത്തിയത്.കണിച്ചാർ പഞ്ചായത്തിലെ പൂളക്കുറ്റി പ്രദേശത്തോട് ചേർന്ന് പ്രവർത്തിക്കുന്ന രണ്ട് പാറമടകളിലൊന്ന് പൂർണമായും അടച്ചുപൂട്ടാൻ റിപ്പോർട്ടിൽ പരാമർശമുണ്ട്.

റിപ്പോർട്ട് ശനിയാഴ്ച ജില്ലാ ദുരന്ത നിവാരണ സമിതിക്ക് മുന്നിലെത്തും.രാവിലെ 10.30ന് നടക്കുന്ന ജില്ലാ ദുരന്ത നിവാരണ സമിതി യോഗത്തിൽ കണിച്ചാർ പഞ്ചായത്ത് പ്രസിഡന്റ് ആന്റണി സെബാസ്റ്റ്യനും സംബന്ധിക്കും.യോഗത്തിന് ശേഷം റിപ്പോർട്ടിന്റെ പകർപ്പ് മാധ്യമങ്ങൾ മുഖേന പ്രസിദ്ധീകരിക്കും.ദുരന്തത്തിനിരയായവരടക്കമുള്ള പൂളക്കുറ്റി,നെടുംപുറംചാൽ പ്രദേശവാസികൾക്ക് ആശ്വാസം പകരുന്നതാണ് റിപ്പോർട്ടിലെ പരാമർശങ്ങളും നിർദ്ദേശങ്ങളും.