പേരാവൂർ: കണിച്ചാർ ഉരുൾപൊട്ടൽ ബാധിതർക്ക്നഷ്ടപരിഹാരം വേഗത്തിലാക്കണമെന്നാവശ്യപ്പെട്ടും പ്രത്യേക പാക്കേജ് പ്രഖ്യാപിക്കണമെന്നാവശ്യപ്പെട്ടും എൽ.ഡി.എഫ് കണിച്ചാർ പഞ്ചായത്ത്കമ്മിറ്റി ജില്ലാ കലക്ടറേറ്റിലേക്ക്മാർച്ച് നടത്തും.വ്യാഴാഴ്ച രാവിലെ പത്തിന് സി.പി.എം ജില്ലാ സെക്രട്ടറി എം.വി.ജയരാജൻ മാർച്ച് ഉദ്ഘാടനം ചെയ്യും.എൽ.ഡി.എഫ് ജില്ലാ നേതാക്കൾ സംബന്ധിക്കും.

ഉരുൾപൊട്ടലുണ്ടായി നൂറു ദിവസം കഴിഞ്ഞിട്ടും ഉദ്യോഗസ്ഥരുടെ അലംഭാവം മൂലം മേഖലയിലുണ്ടായ നാശനഷ്ടം പൂർണമായി തിട്ടപ്പെടുത്തിയിട്ടില്ലെന്ന് നേതാക്കൾ ആരോപിച്ചു.ദുരന്തനിവാരണ പ്രവർത്തനങ്ങളിൽ ഉദ്യോഗസ്ഥരുടെ ഭാഗത്ത് നിന്ന് മെല്ലെപ്പോക്ക് നയമാണുണ്ടാവുന്നതെന്നും ഇതിനെതിരെയാണ് കലക്ട്രേറ്റ് മാർച്ച് നടത്തുന്നതെന്നും നേതാക്കൾ പറഞ്ഞു.

എല്ലാ വകുപ്പ് മേധാവികളെയും വിളിച്ച് ചേർത്ത് കലക്ടറുടെ നേതൃത്വത്തിൽ യോഗം നടത്തി നാശനഷ്ടം വിതരണം ചെയ്യുന്നതിലെ തടസ്സങ്ങൾ പരിഹരിക്കണം.ദുരന്തബാധിതർക്ക് സമയബന്ധിതമായി നഷ്ടപരിഹാരം ലഭിക്കാത്തത് ഉദ്യോഗസ്ഥർ തുടരുന്ന അവഗണന മൂലമാണ്.ഇത് ബന്ധപെട്ട അധികൃതർ മുന്നാകെ എത്തിക്കുന്നതിനാണ് വ്യാഴാഴ്ച കലക്ട്രേറ്റിലേക്ക് മാർച്ച് നടത്തുന്നതെന്നും നേതാക്കൾ പറഞ്ഞു.ദുരന്തനിവാരണ സമിതിയുടെ റിപ്പോർട്ട് ഉടൻ പ്രതീക്ഷിക്കുന്നതായും റിപ്പോർട്ടിന്റെ അടിസ്ഥാനത്തിൽ വേണ്ട നടപടികൾ സ്വീകരിക്കുമെന്നും പഞ്ചായത്ത് പ്രസിഡന്റ് പറഞ്ഞു.

പത്രസമ്മേളനത്തിൽ സി.പി.എം പേരാവൂർ ഏരിയാക്കമ്മറ്റിയംഗം പി.വി.പ്രഭാകരൻ,കണിച്ചാർ പഞ്ചായത്ത് പ്രസിഡന്റ് ആന്റണി സെബാസ്റ്റ്യൻ,ബ്രിട്ടോ ജോസ്,ജോഷി കുന്നേൽ എന്നിവർ സംസാരിച്ചു.