പേരാവൂർ: കണിച്ചാർ പഞ്ചായത്തിലെ ഉരുൾപൊട്ടൽ ദുരന്തബാധിതർക്ക് നഷ്ടപരിഹാരം ലഭ്യമാകും വരെ കോൺഗ്രസ് കണിച്ചാർ മണ്ഡലം കമ്മിറ്റിപ്രക്ഷോഭസമരങ്ങൾനടത്തുമെന്ന് നേതാക്കൾ പറഞ്ഞു.സമരങ്ങൾക്ക് തുടക്കം കുറിച്ച് വെള്ളിയാഴ്ച വൈകിട്ട് നാലിന് പൂളക്കുറ്റിയിൽ സായാഹ്ന ധർണ നടത്തും.

മുന്ന് ജീവനുകൾ നഷ്ടപ്പെടുകയും 175 കോടിയോളം രൂപയുടെ നാശനഷ്ടമുണ്ടാവുകയും ചെയ്ത പ്രദേശത്ത് ഉരുൾപൊട്ടലുണ്ടായി നൂറുദിവസങ്ങൾ കഴിഞ്ഞിട്ടും അർഹമായ സഹായം എത്തിക്കാൻ സർക്കാരിനോ പഞ്ചായത്തിനോ സാധിച്ചിട്ടില്ലെന്ന് നേതാക്കൾ ആരോപിച്ചു.പഞ്ചായത്ത് ഭരിക്കുന്ന എൽ.ഡി.എഫ്,ദുരന്തബാധിതർക്കാവശ്യമായ സഹായങ്ങൾ എത്തിക്കുന്നതിൽ വീഴ്ച വരുത്തുകയാണെന്നും സ്വന്തം സർക്കാരിനെതിരെ സമരം നടത്താനുള്ള നീക്കം അപഹാസ്യമാണെന്നും നേതാക്കൾ പറഞ്ഞു.

ദുരന്തബാധിതർക്ക് പ്രത്യേക പാക്കേജ് പ്രഖ്യാപിക്കാൻ സംസ്ഥാനം ഭരിക്കുന്ന എൽ.ഡി.എഫ് സർക്കാരിന് കഴിഞ്ഞിട്ടില്ല.സർക്കാരിന്റെ വീഴ്ചകൾ മറയ്ക്കാനും ദുരന്തമനുഭവിക്കുന്ന സാധാരണക്കാരുടെ കണ്ണിൽപ്പൊടിയിടാനുമാണ്എൽ.ഡി.എഫ് കണിച്ചാർ പഞ്ചായത്ത് കമ്മറ്റികലക്ട്രേറ്റ് മാർച്ച് എന്ന സമരവുമായി രംഗത്ത് വന്നത്.ഇത് പൊതുജനം മനസിലാക്കുമെന്നും നേതാക്കൾ പറഞ്ഞു.

പത്രസമ്മേളനത്തിൽ ഡി.സി.സി ജനറൽ സെക്രട്ടറി ബൈജു വർഗീസ്,പേരാവൂർ ബ്ലോക്ക് കോൺഗ്രസ് പ്രസിഡന്റ് സുരേഷ് ചാലാറത്ത്,കണിച്ചാർ മണ്ഡലം പ്രസിഡന്റ് ചാക്കോ തൈക്കുന്നേൽ,മൈക്കിൾ.ടി.മാലത്ത് എന്നിവർ സംസാരിച്ചു.