കണ്ണൂർ: ഫണ്ടിന്റെ അപര്യാപ്തതയ്ക്ക് പുറമേ, സാങ്കേതികപ്രശ്നങ്ങളും കെ-ഫോൺ പദ്ധതിയുടെ പൂർത്തീകരണത്തിന് തടസ്സമാകുന്നു. ഈ ഡിസംബറിൽ ആദ്യഘട്ടം കമ്മിഷൻ ചെയ്യാനാണ് ലക്ഷ്യമിട്ടതെങ്കിലും പൂർത്തിയാകുമെന്ന് ഉറപ്പില്ല.

ഇതുവരെ 8500 സ്ഥാപനങ്ങളിൽ കെ-ഫോണിന്റെ സേവനം ലഭിക്കുന്നുണ്ട്. കണക്‌ഷനുകളുടെ എണ്ണം ഈ മാസം അവസാനത്തോടെ 15,000-ഉം ഡിസംബർ അവസാനത്തോടെ 28,000-ഉം ആയി ഉയർത്താനാണ് ലക്ഷ്യമിട്ടിരുന്നത്.

അതേസമയം, തടസ്സങ്ങൾ ഉണ്ടെങ്കിലും നിശ്ചിതസമയത്തിനുള്ളിൽ ലക്ഷ്യം പൂർത്തിയാക്കാനുള്ള പ്രവർത്തനം നടക്കുന്നുണ്ടെന്ന് മുതിർന്ന ഉദ്യോഗസ്ഥൻ പറഞ്ഞു.

ദേശീയപാതാവികസനം, റെയിൽവേയുടെ അനുമതി നിഷേധിക്കൽ, വനമേഖലകളിൽ കേബിൾ സ്ഥാപിക്കാൻ കഴിയാത്തത്, വിദഗ്ധ തൊഴിലാളികളുടെ അഭാവം എന്നിവയാണ് പദ്ധതിക്ക് മുന്നിലെ പ്രധാന തടസ്സങ്ങൾ.

ദേശീയപാതയോരത്ത് സ്ഥാപിച്ചിട്ടുള്ള വൈദ്യുതത്തൂൺ വഴിയാണ് കേബിൾ സ്ഥാപിക്കുന്നത്. ദേശീയപാതാ വികസനത്തിന്റെ ഭാഗമായി വൈദ്യുതത്തൂണുകൾ മാറ്റിസ്ഥാപിച്ചപ്പോൾ കേബിളും മാറ്റേണ്ടിവന്നു. കാസർകോട് ജില്ലയിലാണ് ഇത്തരത്തിൽ ഏറെയും മാറ്റേണ്ടിവന്നത്.

കേബിൾ സ്ഥാപിക്കേണ്ട 28,000 കിലോമീറ്റർ ദൂരത്തിൽ മുന്നൂറോളം കിലോമീറ്റർ വനമേഖലയാണ്. വയനാട്, പത്തനംതിട്ട, ഇടുക്കി ജില്ലകളിലാണ് ഇതിൽ ഏറെയും. ഈ പ്രദേശത്തുകൂടി കേബിൾ സ്ഥാപിക്കുന്നതും കൂട്ടിച്ചേർക്കുന്നതുമായ ഉപകരണം കൊണ്ടുപോകാൻ കഴിയില്ല.

റെയിൽവേ ക്രോസിങ്ങുള്ള സ്ഥലങ്ങളിൽ തുരങ്കങ്ങളുണ്ടാക്കി കേബിൾ സ്ഥാപിക്കാൻ റെയിൽവേയുടെ അനുമതി കിട്ടിയിട്ടില്ല. പകരം സംവിധാനമുണ്ടാക്കുന്നതിന് പുതിയ സർവേ വേണ്ടിവരും. കേബിൾ നേരത്തേ നിശ്ചയിച്ചതിന്റെ എത്രയോ മടങ്ങ് ദൂരത്തിൽ സ്ഥാപിക്കേണ്ടിയും വരും.

കെ.എസ്.ഐ.ടി.ഐ. (കേരളാ സ്റ്റേറ്റ് ഐ.ടി. ഇൻഫ്രാസ്ട്രക്ചർ ലിമിറ്റഡ്), സംസ്ഥാന വൈദ്യുതി ബോർഡ് എന്നീ സ്ഥാപനങ്ങളുടെ നേതൃത്വത്തിലുള്ള പദ്ധതി കേന്ദ്രപൊതുമേഖലാസ്ഥാപനമായ ‘ഭെൽ’ (ഭാരത് ഇലക്ടോണിക്സ് ലിമിറ്റഡ്) ആണ് നടപ്പാക്കുന്നത്.

മറ്റൊരു പൊതുമേഖലാ സ്ഥാപനമായ ‘റെയിൽടെൽ’, എസ്.ആർ.ഐ.ടി., എൽ.എസ്. കേബിൾ എന്നീ സ്ഥാപനങ്ങളും നിർദിഷ്ട ജോലികൾ ഭെല്ലിന്റെ മേൽനോട്ടത്തിൽ ചെയ്യുന്നുണ്ട്.

ഇന്റർനെറ്റ് ശൃംഖലയുടെ അടിസ്ഥാന സൗകര്യമൊരുക്കുന്ന ‘ഫ്രീ ഫാബ്രിക്കേറ്റ് ഷെൽട്ടർ’ ഒരുക്കുന്നത് എസ്.ആർ.ഐ.ടി.യാണ്.