ഏലപ്പീടിക: വാനരസംഘം വീട്ടുപകരണങ്ങളും ഭക്ഷ്യവസ്തുക്കളും സ്ഥിരമായി നശിപ്പിക്കുന്നതുമായി ബന്ധപ്പെട്ട് കർഷകൻ ആത്മഹത്യ ഭീഷണി മുഴക്കിയ സംഭവത്തിൽ അധികൃതർ സ്ഥലത്തെത്തി അന്വേഷണം നടത്തി.ഏലപ്പീടികയിലെ വെള്ളക്കല്ലിങ്കൽ സ്റ്റാൻലിയുടെ വീട്ടിലാണ് ഭൂരേഖാ തഹസിൽദാർ,കൊട്ടിയൂർ ഫോറസ്റ്റ് ഉദ്യോഗസ്ഥർ,കണിച്ചാർ പഞ്ചായത്ത് അധികൃതർ എന്നിവിരടങ്ങുന്ന സംഘമെത്തി സംയുക്തമായി വിവരം ശേഖരിച്ചത്.

സ്റ്റാൻലിയുടെ വീട്ടിലും കൃഷിയിടത്തിലുമുണ്ടായനാശനഷ്ടത്തിന്റെ കണക്കുകൾ,സ്റ്റാൻലിയുടെ കൃഷിഭൂമി കയ്യേറി വനവകുപ്പധികൃതർ ജണ്ട കെട്ടിയത് എന്നിവ സംഘം പരിശോധിച്ചു.സ്റ്റാൻലിക്കുണ്ടായ മുഴുവൻ നഷ്ടവും ലഭ്യമാക്കാൻ നടപടി സ്വീകരിച്ചിട്ടുണ്ടെന്ന് പഞ്ചായത്ത് പ്രസിഡന്റ് ആന്റണി സെബാസ്റ്റ്യൻ പറഞ്ഞു.

സ്റ്റാൻലിയുടെ വീടിനുള്ളിൽ കുരങ്ങുകൾ അതിക്രമിച്ചു കടക്കാതിരിക്കാനും വീടിന്റെ സുരക്ഷ ഉറപ്പാക്കാനും ആവശ്യമായ ഇടങ്ങളിൽ ഇരുമ്പു നെറ്റ്സ്ഥാപിച്ചു നല്കി.കുരങ്ങുകളെ പിടികൂടി വനത്തിലേക്ക്വിടാൻ സ്റ്റാൻലിയുടെ വീട്ടുമുറ്റത്ത് ഇരുമ്പ്‌കെണി സ്ഥാപിച്ചു.കഴിഞ്ഞ ദിവസം സ്ഥാപിച്ച കൂട്ടിൽ അകപെട്ട ഒരു കുരങ്ങിനെ വനപാലകർ പിടികൂടി വനത്തിനുള്ളിലേക്ക് വിട്ടു.

ഇരിട്ടി താലൂക്ക് ഭൂരേഖ തഹസിൽദാർ എം.ലക്ഷ്മണൻ,ഡെപ്യൂട്ടി തഹസിൽദാർമാരായ കെ.ജോൺസൺ,കെ.ഷീന,കൊട്ടിയൂർ സെക്ഷൻ ഫോറസ്റ്റ് ഓഫീസർ കെ.സി.രാജീവൻ,വനപാലകരായ കെ.ഷൈജു,കെ.സി.ബിനോയി,വി.എ.തോമസ്,കണിച്ചാർ പഞ്ചായത്ത് പ്രസിഡന്റ്ആന്റണി സെബാസ്റ്റ്യൻ,വൈസ്.പ്രസിഡന്റ് ഷാന്റി തോമസ്,പഞ്ചായത്തംഗങ്ങളായ ജിമ്മി അബ്രഹാം,വിജി അബ്രഹാം തുടങ്ങിയവരാണ് പരിശോധന സംഘത്തിലുണ്ടായിരുന്നത്.