കണ്ണൂർ: ഹർത്താൽ അക്രമങ്ങളുടെ മറവിൽ കണ്ണൂർ നഗരത്തിലെ വ്യാപാര സ്ഥാപനങ്ങളിൽ പോലീസ് നടത്തുന്ന റെയ്ഡ് ആർ.എസ്.എസ്സിനെ പ്രീതിപ്പെടുത്താനാണന്ന്എസ്.ഡി.പി.ഐ ജില്ലാ കമ്മിറ്റി പ്രസ്താവിച്ചു. ഹർത്താലിൽ അനിഷ്ട സംഭവങ്ങൾ ഉണ്ടാവുന്നത് സംസ്ഥാനത്തും പ്രത്യേകിച്ച് കണ്ണൂരിലും ആദ്യ സംഭവമല്ല.കഴിഞ്ഞ ദിവസത്തെ ഹർത്താലിൽ ഒറ്റപ്പെട്ട ചിലഅനിഷ്ട സംഭവങ്ങൾ ഉണ്ടായത് ഖേദകരമാണ് .എന്നാൽ കഴിഞ്ഞ കാലങ്ങളിൽ സിപിഎം ആർ എസ് എസ് നടത്തിയ ഹർത്താലുകളിൽ കോടികളുടെ നാശ നഷ്ടങ്ങളാണ് പലപ്പോഴും ഉണ്ടായിട്ടുള്ളത്.

ഒരു ഹർത്താൽ ദിനത്തിലാണ് ചാവശ്ശേരിയിൽ ബസ് കത്തിച്ച് മനുഷ്യരെ ജീവനോടെ ചുട്ടു കൊന്നത് .പി ജയരാജന്റെ അറസ്റ്റുമായി ബന്ധപ്പെട്ട ഹർത്താൽ കണ്ണുർ ജില്ലയിൽ കലാപത്തിന്റെ പ്രതീതിയുണ്ടാക്കി .ഇത്തരം അക്രമങ്ങൾക്ക് കാലാകാലങ്ങളിൽ നേതൃത്വം നൽകിയവരാണ് കഴിഞ്ഞ ദിവസത്തെ ഹർത്താലിന്റെ പേരിൽ ഒരു സമൂഹത്തെ വേട്ടയാടുന്നത് .ഹർത്താൽ തുടങ്ങി മണിക്കൂറുകൾക്കകം തന്നെ സി പി എം ജില്ലാ സെക്രട്ടറി വ്യാപക അക്രമം നടക്കുന്നുവെന്ന് പ്രചരിപ്പിച്ചത് തന്നെ ഉന്നതതല ഗൂഢാലോചന വെളിപ്പെടുത്തുന്നതാണ്.

ലാവലിൻ കേസ് പരിഗണക്കാനിരിക്കെ ആർ എസ് എസിനെ തൃപ്തിപ്പെടുത്താൻ വേണ്ടിയുള്ള വ്യഗ്രതയിലാണ് മുസ്‌ലിംകൾ നടത്തുന്ന വ്യാപാര സ്ഥാപനങ്ങളിൽ അതിക്രമിച്ചു കയറി റെയ്ഡ് നടത്തിയതെന്ന് വ്യക്തമാണ്. ആഭ്യന്തര വകുപ്പ് ഭരിക്കുന്ന മുഖ്യമന്ത്രിയാണോ അതോ പോലീസിലെ ഉന്നത സ്ഥാനത്തുള്ള ആർ എസ് എസ്സുകാരാണോ ഇതിന് നിർദേശം നൽകിയത് എന്ന് സി പി എം ജില്ലാ സെക്രട്ടറി വെളിപ്പെടുത്തണം. മുസ്‌ലിംകളുടെ സ്ഥാപനങ്ങളെ തകർക്കുകയെന്ന ആർഎസ്എസ് അജണ്ടയ്ക്ക് കേരളാ പോലീസും സി പി എമ്മും വളംവെച്ച് കൊടുക്കുകയാണ്.

ഹർത്താലിൽ അക്രമം നടത്തിയവരെ നിഷ്പക്ഷമായ അന്വേഷണത്തിലൂടെ കണ്ടെത്തി അറസ്റ്റ് ചെയ്യുന്നതിന് പകരം നിരപരാധികളെ വേട്ടയാടാനും സ്ഥാപനങ്ങളെ തകർക്കാനുമാണ് ലക്ഷ്യമിടുന്നത്. നിരപരാധികളെ വേട്ടയാടുന്നത് പോലിസ് അവസാനിപ്പിക്കണമെന്നും അല്ലാത്തപക്ഷം ശക്തമായ പ്രക്ഷോഭത്തിന് എസ് ഡി പി ഐ നേതൃത്വം നൽകുമെന്നും ജില്ലാ ജനറൽ സെക്രട്ടറി ബഷീർ കണ്ണാടിപ്പറമ്പ് പ്രസ്താവനയിൽ വ്യക്തമാക്കി.