തലശ്ശേരി: മട്ടന്നൂർ ജുമാമസ്ജിദിന്റെ പുനർനിർമാണവുമായി ബന്ധപ്പെട്ട് സാമ്പത്തിക ക്രമക്കേടുണ്ടായെന്ന കേസിൽ പള്ളി കമ്മിറ്റി ഭാരവാഹികളായ മൂന്നുപേർക്ക് കോടതി മുൻകൂർ ജാമ്യമനുവദിച്ചു.

തലശ്ശേരി അഡീഷണൽ ജില്ലാ സെഷൻസ് കോടതി (ഒന്ന്) ജഡ്ജി എ.വി.മൃദുലയാണ് ഉപാധികളോടെ മുൻകൂർ ജാമ്യം അനുവദിച്ചത്.

മട്ടന്നൂർ മഹല്ല് കമ്മിറ്റി മുൻ പ്രസിഡൻറും മുസ്‌ലിം ലീഗ് സംസ്ഥാന സെക്രട്ടറിയുമായ അബ്ദുറഹ്‌മാൻ കല്ലായി, മഹല്ല് കമ്മിറ്റി പ്രസിഡൻറും കോൺഗ്രസ് നേതാവുമായ എം.സി.കുഞ്ഞമ്മദ്, സെക്രട്ടറി യു.മഹറൂഫ് എന്നിവർക്കാണ് മുൻകൂർ ജാമ്യം അനുവദിച്ചത്. 26-ന് രാവിലെ എട്ടിന് പ്രതികൾ പോലീസ് സ്റ്റേഷനിൽ ഹാജരാകണം.

വൈകിട്ട് ഏഴുവരെ ചോദ്യംചെയ്യാം. പാസ്പോർട്ട്‌ അന്വേഷണ ഉദ്യോഗസ്ഥൻ മുമ്പാകെ ഹാജരാക്കണം. അന്വേഷണ ഉദ്യോഗസ്ഥൻ ആവശ്യപ്പെട്ടാൽ ഹാജരാകണമെന്നും കോടതി ഉത്തരവിട്ടു. പള്ളി കമ്മിറ്റിയംഗമായ മട്ടന്നൂർ നിടുവോട്ടുംകുന്നിലെ എം.പി.ഷെമീറിന്റെ പരാതിയിൽ മട്ടന്നൂർ പോലീസാണ് കേസെടുത്തത്.

വഖഫ് ബോർഡിന്റെ അനുമതിയും ടെൻഡറും ഇല്ലാതെ 9.78 കോടി രൂപ പള്ളിനിർമാണത്തിനായി ചെലവഴിച്ചെന്നും ബില്ലുകളിൽ കൃത്രിമം കാണിച്ചെന്നുമാണ് പരാതി.

നിലവിലുള്ള പള്ളി പൊളിക്കാൻ 8,80,000 രൂപ ചെലവഴിച്ചു. ഷോപ്പിങ് കോംപ്ലക്സ് നടത്താൻ നിക്ഷേപമായി സ്വീകരിച്ച ഒരു കോടി രൂപ തിരിമറി നടത്തിയെന്നുമാണ് പരാതി.