തിരുവനന്തപുരം:സംസ്ഥാനത്ത് വളർത്തു നായകൾക്ക് ലൈസൻസ് , വാക്സിനേഷൻ എന്നിവ നിർബന്ധമാക്കി സർക്കുലർ . തെരുവുനായ ആക്രമണവും പേപ്പട്ടിയുടെ കടിയേറ്റവരുടെ എണ്ണവും വർധിച്ച സാഹചര്യത്തിൽ പഞ്ചായത്ത് ഡയറക്ടറാണ് സർക്കുലർ ഇറക്കിയത്. രണ്ടാഴ്ചക്കുള്ളിൽ മുഴുവൻ വളർത്തു നായകൾക്കും ലൈസൻസ് എടുത്തിട്ടുണ്ടെന്ന് പഞ്ചായത്ത് സെക്രട്ടറിമാർ ഉറപ്പാക്കണമെന്നാണ് നിർദേശം.

പഞ്ചായത്ത് വാർഡു തലത്തിൽ വാക്സിനേഷൻ ക്യാമ്പുകൾ സംഘടിപ്പിച്ച് മുഴുവൻ വളർത്തു നായകൾക്കും വാക്സിനേഷൻ നടത്തിയെന്ന് ഉറപ്പാക്കി റിപ്പോർട്ട് നൽകണമെന്നാണ് സർക്കുലറിൽ പറഞ്ഞിരിക്കുന്നത്. ലൈസൻസിൻ പറഞ്ഞിട്ടുള്ള ചട്ടങ്ങൾ പ്രകാരമുള്ള നിബന്ധനകൾ പാലിക്കാത്ത ഒരു വ്യക്തിക്കും പഞ്ചായത്ത് പ്രദേശത്ത് നായ്ക്കളെ വളർത്താൻ അനുമതി ഉണ്ടാകില്ല. ഇതു സംബന്ധിച്ച് കർശന നിർദേശം നൽകി പഞ്ചായത്ത് സെക്രട്ടറിമാർ നോട്ടീസുകൾ പുറപ്പെടുവിക്കണമെന്നും പഞ്ചായത്ത് ഡയറക്ടറുടെ അറിയിപ്പിൽ പറയുന്നു.