പേരാവൂർ: ‘ജലാഞ്ജലി നീരുറവ്’ജല സുരക്ഷ പദ്ധതിയുടെ അവലോകന യോഗം പേരാവൂർ ബ്ലോക്കിൽ നടന്നു.തൊഴിലുറപ്പ് പദ്ധതി സംസ്ഥാന പോഗ്രാം ഓഫീസർ കെ.ബാലചന്ദ്രൻ പദ്ധതി വിശദീകരണവും ഉദ്ഘാടനവും നടത്തി.ബ്ലോക്ക് പ്രസിഡന്റ് കെ.സുധാകരൻ അധ്യക്ഷത വഹിച്ചു. പ്രോജെക്ട് റിപ്പോർട്ട് ബ്ലോക്ക് സെക്രട്ടറി ആർ.സജീവൻ അവതരിപ്പിച്ചു.

പദ്ധതിയുടെ ഡി.പി.ആർ. ഒക്ടോബർ രണ്ടിന് പ്രകാശനം ചെയ്യും. നവകേരളം കർമ്മ പദ്ധതി സംസ്ഥാന കൺസൾട്ടന്റ് ടി.പി.സുധാകരൻ, ജില്ലാ കോർഡിനേറ്റർ ഇ.കെ.സോമശേഖരൻ,എം.എൻ.ആർ.ഇ.ജി ജില്ലാ പോഗ്രാം ഓഫീസർ സുരേന്ദ്രൻ, ജില്ലാ പഞ്ചായത്തംഗം വി.ഗീത,സാം ഐസക്,എ.കെ.സൽമ തുടങ്ങിയവർ സംസാരിച്ചു. പഞ്ചായത്ത് പ്രസിഡന്റുമാർ,പഞ്ചായത്തംഗങ്ങൾ,വിവിധ വകുപ്പ് പ്രതിനിധികൾ എന്നിവർ പങ്കെടുത്തു.

ബ്ലോക്കിലെ മുഴുവൻ നീർത്തടങ്ങളിലും പഠനം നടത്തി മാസ്റ്റർ പ്ലാൻ തയ്യാറാക്കുന്ന സംസ്ഥാനത്തെ മാതൃക പദ്ധതിയാണ് ‘ജലാഞ്ജലി നീരുറവ്’ ജല സുരക്ഷ പദ്ധതി. ഈ പ്രവർത്തനത്തെ അടിസ്ഥാനമാക്കി സംസ്ഥാനത്തെ മുഴുവൻ നീർത്തടങ്ങളിലും തൊഴിലുറപ്പ് പദ്ധതിയിൽപെടുത്തി മണ്ണ് ജല സംരക്ഷണപ്രവർത്തികൾ നടപ്പിൽ വരുത്തും.

ഹരിതകേരള മിഷന്റെയും സി.ഡബ്ല്യു.ആർ.ഡി.എമ്മിന്റെയും സാങ്കേതിക സഹായത്തോടെ പേരാവൂർ ബ്ലോക്ക് പഞ്ചായത്ത് നടപ്പിലാക്കുന്ന ജലാഞ്ജലി പദ്ധതിയെ നീരുറവ് പദ്ധതിയുമായി കൂട്ടി യോജിപ്പിച്ചാണ് ജലാഞ്ജലി നീരുറവ് പദ്ധതി നടപ്പിലാക്കുന്നത്.പദ്ധതി നടപ്പിലാക്കുന്ന സംസ്ഥാനത്തെ ഏക ബ്ലോക്ക് പഞ്ചായത്താണ് പേരാവൂർ.