പേരാവൂർ: വിവിധ ആവശ്യങ്ങളുന്നയിച്ച് പേരാവൂർ താലൂക്കാസ്പത്രിയിലേക്ക് ആസ്പത്രി സംരക്ഷണസമിതിയും ജനകീയസമിതിയും മാർച്ച് നടത്തി.ആസ്പത്രിക്കനുവദിച്ച ഓക്‌സിജൻ പ്ലാന്റ് ഉടൻ സ്ഥാപിക്കുക,ആസ്പത്രി ഭൂമി ചുറ്റുമതിൽ കെട്ടി സംരക്ഷിക്കുക,ബഹുനില കെട്ടിട നിർമാണം ഉടനാരംഭിക്കുക,അടിയന്തരമായി അനസ്‌തേഷ്യ ഡോക്ടർമാരെ നിയമിക്കുക,പ്രസവ ചികിത്സ പുനരാരംഭിക്കുക,താലൂക്കാസ്പത്രിയെ നശിപ്പിക്കുന്ന എച്ച്.എം.സി അംഗങ്ങളെ കമ്മറ്റിയിൽ നിന്ന് പുറത്താക്കുക,വികസന വിരോധികളെ ഒറ്റപ്പെടുത്തുക എന്നീ പ്ലക്കാർഡുകളുമായാണ് ജനകീയ മാർച്ച് നടത്തിയത്.

പേരാവൂർ ടൗൺ ചുറ്റി ബ്ലോക്ക് ഓഫീസിനു മുന്നിലെത്തിയ മാർച്ച് ഗേറ്റിനു സമീപം പോലീസ് തടഞ്ഞു.പൊതുപ്രവർത്തകനായ ബേബി കുര്യൻ മാർച്ച് ഉദ്ഘാടനം ചെയ്തു.കെ.സതീശൻ,തെയ്യമ്പാടി രാജു,വി.സുനിൽ കുമാർ,ആനന്ദൻ,ചക്ക്യത്ത് കൃഷ്ണൻ,പി.പി.അനിൽ കുമാർ,അശോകൻ മട്ടാങ്കോട്ട്,കെ.അജിത്ത്കുമാർ,സുനീർ കാഞ്ഞിരപ്പുഴ,എം.വത്സൻ ഞണ്ടാടി,ഹരി,വിജേഷ്,ചക്ക്യത്ത് അനിൽ കുമാർ തുടങ്ങിയവർ നേതൃത്വം നല്കി.

ആസ്പത്രി മാനേജിംഗ് കമ്മറ്റിയിലെ ചിലർ ചേർന്ന് ആസ്പത്രി വികസനം അട്ടിമറിക്കുന്നതിനെതിരെ മുഖ്യധാര രാഷ്ട്രീയ പാർട്ടികളും സംഘടനകളും രംഗത്ത് വരാതിരിക്കുന്ന സാഹചര്യത്തിലാണ് നാട്ടുകാർ സംഘടിച്ച് ബ്ലോക്ക് പഞ്ചായത്തിലേക്ക് ജനകീയ മാർച്ച് നടത്തിയത്.