കണ്ണൂർ: മയക്കവും ലഹരിയും ഉണ്ടാക്കുന്ന മരുന്നുകൾ കുട്ടികൾക്ക് വിതരണം ചെയ്യുന്നത് ശ്രദ്ധയിൽപ്പെട്ടതിനെത്തുടർന്ന് രാജ്യത്തെ മരുന്നുകടകളിൽ സി.സി.ടി.വി. ക്യാമറകൾ സ്ഥാപിക്കണമെന്ന് ദേശീയ ബാലാവകാശ കമ്മിഷന്റെ നിർദേശം. വിവിധ സംസ്ഥാനങ്ങൾ നിർദേശം ഇതിനകം നടപ്പാക്കിത്തുടങ്ങി. തുടക്കത്തിൽ രാജ്യത്തെ 155 ജില്ലകൾ കേന്ദ്രീകരിച്ചാണ് നടപടി. കേരളത്തിൽ കൊല്ലം ഉൾപ്പെടെ അഞ്ച് ജില്ലകളിൽ കളക്ടർമാരാണ് ഇക്കാര്യം നടപ്പാക്കേണ്ടത്.

പുതുച്ചേരിയിലെ ഡ്രഗ്‌സ് കൺട്രോൾ അഡ്മിനിസ്‌ട്രേഷൻ വിഭാഗം നാല് മേഖലകളിലെ എല്ലാ മരുന്നുകടകളിലും സി.സി.ടി.വി. ക്യാമറകൾ സ്ഥാപിക്കാൻ ആവശ്യപ്പെട്ടിട്ടുണ്ട്.

മാനസികനിലയിൽ മാറ്റമുണ്ടാക്കുന്ന സൈക്കോട്രോപിക് മരുന്നുകളും മയക്കമുണ്ടാക്കുന്ന മരുന്നുകളും കുട്ടികൾക്ക് വിൽക്കുന്നത് നിരീക്ഷിക്കുകയാണ് ലക്ഷ്യം. സി.സി.ടി.വി. ദൃശ്യങ്ങൾ എൻഫോഴ്സ്മെന്റ് ഉദ്യോഗസ്ഥർ പരിശോധിക്കും. പുതുച്ചേരി, യാനം, കാരയ്ക്കൽ, മാഹി എന്നീ നാല് മേഖലകളിലായി ആയിരത്തോളം റീട്ടെയിൽ മരുന്നുകടകളുണ്ട്‌. രണ്ടാഴ്ചയ്ക്കുള്ളിൽ എല്ലാ റീട്ടെയിൽ യൂണിറ്റുകളും ക്യാമറ നിരീക്ഷണത്തിന് കീഴിലാകും.

മാഹിയിൽ 23 മരുന്നുകടകളും ഒരു ജൻ ഔഷധി സ്റ്റോറും 24 മണിക്കൂറും പ്രവർത്തിക്കുന്നുണ്ട്. സി.സി.ടി.വി. നിരീക്ഷണത്തിനുപുറമെ മരുന്നുകടകളിൽ ഷെഡ്യൂൾ എച്ച് വൺ രജിസ്റ്റർ സൂക്ഷിക്കാനും നിർദേശമുണ്ട്. പഞ്ചാബ്, ഡൽഹി എന്നിവിടങ്ങളിലെ ചില മരുന്നുകടകളിൽനിന്ന് കുട്ടികൾതന്നെ തുടർച്ചയായി ചില മയക്കംവരുന്ന മരുന്നുകൾ വാങ്ങിക്കൊണ്ടുപോകുന്നതായുള്ള പരാതിയെത്തുടർന്നാണ് ഇക്കാര്യത്തിൽ അന്വേഷണം നടന്നത്.

കഴിഞ്ഞ അഞ്ചുവർഷത്തിനിടെ കുട്ടികളിലെ ലഹരി ഉപയോഗം നൂറുശതമാനത്തോളം വർധിച്ചതായി പറയുന്നു.

സി.സി.ടി.വി. ക്യാമറകളുടെ ആവശ്യകതയെക്കുറിച്ച് ഡ്രഗ് കൺട്രോളർ ഡിപ്പാർട്ട്‌മെന്റ് റീട്ടെയിൽ കെമിസ്റ്റുകൾക്കായി ശില്പശാല സംഘടിപ്പിക്കുന്നുണ്ട്.