മണത്തണ: മണത്തണ ദേശത്തെ പൈതൃക ടൂറിസം പദ്ധതിയിലുൾപ്പെടുത്തണമെന്ന് വ്യാപാരി വ്യവസായി ഏകോപന സമിതി മണത്തണ യൂണിറ്റ് ആവശ്യപ്പെട്ടു. ഹെറിറ്റേജ് ടൂറിസത്തിൽ മണത്തണയുടെ സ്ഥാനമെന്ത് എന്ന വിഷയത്തിൽപ്രമേയവും അതിന്മേൽ സംവാദവും വ്യാപാര ഭവൻ ഹാളിൽ നടന്നു.യൂനിറ്റ് പ്രസിഡന്റ് സി.എം.ജെ മണത്തണ അധ്യക്ഷത വഹിച്ചു.

13ാം നൂറ്റാണ്ടുമുതൽ തന്നെ അതിപ്രാചീന ജനപദം മണത്തണയിൽ ഉണ്ടായിരുന്നതായും ആയിരത്തോളം പടയാളികൾ സേവനമനുഷ്ടിച്ചിരുന്നതായും ചരിത്രരേഖകളെ അവലംബിച്ച് സംവാദത്തിൽ സമർത്ഥിച്ചു.മണത്തണ ദേശത്തിന്റെ ഒരു കിലോമീറ്റർ ചുറ്റളവിൽ 18- ഓളം അതിപുരാതന ക്ഷേത്രങ്ങളും മുപ്പതോളം കുളങ്ങളും ആയിരത്തോളം കിണറുകളുമുണ്ട്. ശ്രീശങ്കരാചാര്യർ ആദ്യമായി ശ്രീചക്ര പ്രതിഷ്ഠ നടത്തിയത് മണത്തണയിലെ ശ്രീചപ്പാരം ക്ഷേത്രത്തിലായിരുന്നുവെന്നും കുണ്ടേൻക്ഷേത്രത്തിൽ അദ്ദേഹം ധ്യാനമിരുന്നതായും കൊട്ടിയുരമ്പലത്തിന്റെ പൂജാവിധികളും ക്രമങ്ങളും നിശ്ചയിച്ചത് ഇവിടെയിരുന്നായിരുന്നുവെന്നും സംവാദത്തിൽ ചർച്ച നടന്നു.

ബ്രിട്ടീഷ് പഴശ്ശി യുദ്ധങ്ങൾ നടന്നിരുന്നതായും കോട്ടക്കുന്ന് എന്ന സ്ഥലത്ത് ബ്രിട്ടിഷ് പട്ടാളത്തിന്റെ റെജിമെന്റ് ഉണ്ടായിരുന്നതായും ആയുധപുരകൾ ഉണ്ടായിരുന്നതായും രേഖകളെ ഉദ്ധരിച്ച് ചർച്ച നടന്നു.മാധ്യമപ്രവർത്തകർ,വ്യാപാരികൾ,സാംസ്‌കാരിക പ്രവർത്തകർ തുടങ്ങിയവർ സംബന്ധിച്ചു.