പേരാവൂർ: പേരാവൂർ താലൂക്കാസ്പത്രിക്കെതിരെ അനാവശ്യ കേസുകൾ നല്കി ആസ്പത്രി വികസനം തടസ്സപ്പെടുത്തുന്നവർ സ്വയം പിന്മാറണമെന്നും അല്ലെന്നുണ്ടെങ്കിൽ ഇക്കാര്യത്തിൽ ആരോഗ്യവകുപ്പ് ശക്തമായ ഇടപെടൽ നടത്തുമെന്നും മന്ത്രി വീണ ജോർജ്.പേരാവൂർ താലൂക്കാസ്പത്രിയിൽ വിവിധ വാർഡുകളുടെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.

ആസ്പത്രിയുടെ വികസനം തടസ്സപ്പെടുത്തുന്നത് ഒന്നോ രണ്ടോ പേരാണെന്ന് ശ്രദ്ധയിൽപ്പെട്ടിട്ടുണ്ട്.ഈ പ്രദേശത്തെ സാധാരണക്കാരായ മുഴുവനാളുകളുടെയും ആരോഗ്യത്തിനും പൊതുനന്മക്കും വേണ്ടിയാണ് ആസ്പത്രി പ്രവർത്തിക്കുന്നത്.ഇതിനെതിരെ നീതിപൂർവമല്ലാത്തതും ന്യായകേസുമായി പോകുന്നത് തെറ്റായ കാര്യമാണ്.ഇതിനെ വളരെ ഗൗരവതരമായിട്ടാണ് ആരോഗ്യവകുപ്പ് കാണുന്നത്.

ആസ്പത്രിയുടെ വികസനത്തിനും ബഹുഭൂരിപക്ഷം ജനങ്ങൾക്കും നാടിനും വേണ്ടി അനാവശ്യ വ്‌കേസുകൾ ഒഴിവാക്കണം.കിഫ്ബി ഫണ്ടിൽ 53 കോടിയുടെ പദ്ധതി ഉടൻ യാഥാർത്യമാവുമെന്നും മന്ത്രി പറഞ്ഞു.

സണ്ണി ജോസഫ് എം.എൽ.എ അധ്യക്ഷത വഹിച്ചു.ജില്ലാ പഞ്ചായത്ത് വൈസ്.പ്രസിഡന്റ് ബിനോയ് കുര്യൻ,ബ്ലോക്ക് പ്രസിഡന്റ് കെ.സുധാകരൻ,ഡി.എം.ഒ.നാരായണ നായ്ക്ക്,ഡി.പി.എം.അനിൽ കുമാർ,ആസ്പത്രി സൂപ്രണ്ട് ഡോ.ഗ്രിഫിൻ സുരേന്ദ്രൻ,വിവിധ പഞ്ചായത്ത് പ്രസിഡന്റുമാർ,ജില്ലാ പഞ്ചായത്തംഗങ്ങൾ,ജനപ്രതിനിധികൾ,സംഘടന നേതാക്കൾ തുടങ്ങിയവർ സംസാരിച്ചു.ആരോഗ്യവകുപ്പ് ഒന്നേമുക്കാൽ കോടി രൂപ ചിലവിട്ടാണ് ഐ.പി.വാർഡ്,ലിഫ്റ്റ്,താത്കാലിക ഒപി-അത്യാഹിത വിഭാഗം എന്നിവ നിർമിച്ചത്.