കണ്ണൂർ: ഓട്ടത്തിനിടെ വൈദ്യുതവാഹനത്തിന്റെ ബാറ്ററിയുടെ ചാർജ് പോയാൽ ഇനി പേടിക്കേണ്ട. കെ.എസ്.ഇ.ബി. സ്ഥാപിക്കുന്ന വൈദ്യുതത്തൂണുകളിലുറപ്പിച്ച ചാർജിങ് സ്റ്റേഷനുകൾ ജൂലായോടെ സംസ്ഥാനത്ത് പ്രവർത്തനസജ്ജമാകും. ഇത്തരം 1140 ചാർജിങ് സ്റ്റേഷനുകളാണ് സ്ഥാപിക്കുന്നത്. കണ്ണൂർ ജില്ലയിലാണ് പദ്ധതി ആദ്യം പൂർത്തീകരിക്കുക. സംസ്ഥാനത്ത്് കെ.എസ്.ഇ.ബി. തുടങ്ങിയ വൈദ്യുതവാഹന ചാർജിങ് സ്റ്റേഷനുകൾക്ക് പിന്നാലെയാണ് വൈദ്യുതത്തൂണിലുറപ്പിച്ച സംവിധാനം വരുന്നത്.

കോഴിക്കോട് ജില്ലയിൽ 2021 ഒക്ടോബറിലാണ് ഇതിന്റെ പൈലറ്റ് പദ്ധതി തുടങ്ങിയത്. കെ.എസ്.ഇ.ബി.യുടെ റെന്യൂവബിൾ എനർജി ആൻഡ് എനർജി സേവിങ്‌സിനാണ് മേൽനോട്ടം. സ്വകാര്യ ഏജൻസികളാണ് ചാർജിങ് സ്റ്റേഷൻ പ്രവർത്തിപ്പിക്കുക. ഒരു നിയോജകമണ്ഡലത്തിൽ അഞ്ചെണ്ണം വീതവും കോർപ്പറേഷൻ പരിധിയിൽ 15 എണ്ണവും സ്ഥാപിക്കും. വൈദ്യുതിയിൽ പ്രവർത്തിക്കുന്ന ഓട്ടോകൾക്കും സ്കൂട്ടറുകൾക്കും പ്രധാനമായും ഇവിടെ ചാർജ് ചെയ്യാം. ചാർജ് ചെയ്ത ശേഷം തുക മൊബൈൽ ആപ്പ് വഴി വഴി ക്യു.ആർ. കോഡ് സ്കാൻ ചെയ്ത് അടയ്ക്കാം. കാറുകൾ ഫാസ്റ്റ് ചാർജിങ് സ്റ്റേഷനിൽ പോകുന്നതാണ് ഉചിതം.

ആദ്യം പൂർത്തീകരിക്കുക കണ്ണൂരിൽ

കണ്ണൂർ ജില്ലയിലാണ് പദ്ധതി ആദ്യം പൂർത്തീകരിക്കുക. 89 ചാർജിങ് സ്റ്റേഷനുകളാണ് ജില്ലയിൽ വരുന്നത്. കണ്ണൂർ വൈദ്യുതി സർക്കിളിന് കീഴിൽ 56-ഉം ശ്രീകണ്ഠപുരം സർക്കിളിനുകീഴിൽ 33-ഉം. ജെനിസിസ് എന്ന കമ്പനിയാണ് ടെൻഡർ എടുത്തത്. കണ്ണൂർ കോർപ്പറേഷൻ പരിധിയിൽ 16 എണ്ണമുണ്ട്. ഓരോ നിയോജകമണ്ഡലത്തിലും അഞ്ചുവീതവും. കണ്ണൂർ തെക്കിബസാറിലുള്ള ചാർജിങ് സ്റ്റേഷന്റെ പണി പൂർത്തിയായി. ചുരുങ്ങിയത് രണ്ട് ഓട്ടോകൾക്ക് ചാർജ് ചെയ്യാനുള്ള സൗകര്യമുണ്ട്. ഇത്‌ ഏപ്രിലിൽ തുറക്കും.

ഒരുയൂണിറ്റിന് 9.30 രൂപ

വൈദ്യുതത്തൂണുകളിൽനിന്ന് വാഹനം ചാർജ് ചെയ്യാൻ ഒരു യൂണിറ്റിന് ജി.എസ്.ടി. അടക്കം 9.30 രൂപയാണ് വേണ്ടത്. ഒരു ബൈക്ക് പൂർണമായും ചാർജ് ചെയ്യാൻ രണ്ട്-നാല് യൂണിറ്റ് വൈദ്യുതി വേണം. ഒാട്ടോറിക്ഷയ്ക്ക് നാല്-ഏഴ് യൂണിറ്റും. പൂർണമായി ചാർജ് ചെയ്താൽ 120 കിലോമീറ്റർ ഓടുമെന്നാണ് പറയുന്നത്. ഒരു പെട്രോൾ ഓട്ടോ 120 കിലോമീറ്റർ ഓടാൻ ആറുലിറ്റർ പെട്രോൾ വേണ്ടിവരും. ഡീസൽ ഓട്ടോയ്ക്ക് ശരാശരി നാലുലിറ്റർ ഡീസലും. എന്നാൽ ഇത്രയും ദൂരം ഓടാൻ ഒരു ഇലക്ട്രിക് ഓട്ടോയ്ക്ക് ശരാശരി ഏഴ് യൂണിറ്റ് വൈദ്യുതി മതിയാകും. അതായത് 65 രൂപ.