തിരുവനന്തപുരം : ഭൂവുടമയ്ക്ക് തൽക്കാലം ആവശ്യമില്ലെങ്കിൽ ഭൂമി വിലയുടെ ഒരു വിഹിതം സിൽവർ ലൈൻ പദ്ധതിയിൽ തന്നെ നിലനിർത്താനും പിന്നീട് കൈപ്പറ്റാനും അവസരമുണ്ടാകും. അത്രയും നാൾ വിപണിയിലെ നിരക്ക് അടിസ്ഥാനപ്പെടുത്തി പലിശ നൽകും. പലിശ നൽകേണ്ടിവരുമെങ്കിലും പദ്ധതിക്ക് തുടക്കത്തിലുണ്ടാകുന്ന സാമ്പത്തികച്ചെലവ്‌ കുറയ്ക്കുക കൂടി ലക്ഷ്യമിട്ടാണ്‌ ‘ഡെഫേഡ് പേയ്മെന്റ് സ്കീം’ ഉൾപ്പെടുത്തിയത്. 

ഭൂമിയേറ്റെടുക്കലിന് ആകെ ചെലവാകുന്ന തുകയുടെ 40 % ഈ സ്കീം വഴി ലഭിക്കുമെന്നാണ്‌ സാധ്യതാപഠന റിപ്പോർട്ടിൽ നിർദേശിച്ചതെങ്കിൽ, ഡി.പി.ആറിൽ ഇത് 11.41 % ആയി കുറച്ചു.

ഭൂമിയേറ്റെടുക്കലിന് ആകെ ആവശ്യം 13,362 കോടി രൂപയാണ്. ഭൂവുടമകളുടെ സമ്മതം വാങ്ങിയാൽ ഇതിൽ 1525 കോടി (11%) രൂപയെങ്കിലും ഡെഫേഡ് പേയ്മെന്റ് സ്കീമിൽ ഉൾപ്പെടുത്താനാകുമെന്നാണ്‌ ഡി.പി.ആറിലെ നിഗമനം. 

8.4% വാർഷിക പലിശ നൽകാനായിരുന്നു സാധ്യതാപഠന റിപ്പോർട്ടിലെ ശുപാർശയെങ്കിൽ, ഡി.പി.ആറിൽ പലിശ നിരക്ക് പറയുന്നില്ല. പലിശ ലഭിക്കുന്നതിനു പുറമേ ഈ തുകയ്ക്ക് നികുതിയിളവും ലഭിക്കും. 

അതേസമയം, സിൽവർ ലൈൻ പദ്ധതിക്ക് ഭൂമിയേറ്റെടുക്കുന്നതിനു ഗ്രാമങ്ങളിൽ നാലിരട്ടി വില പ്രഖ്യാപിച്ചെങ്കിലും എല്ലായിടത്തും നാലിരട്ടി ലഭിക്കില്ല. നഗരാതിർത്തി കഴിഞ്ഞുള്ള ദൂരം കണക്കാക്കിയാകും ഗ്രാമങ്ങളിൽ നൽകേണ്ട വില നിശ്ചയിക്കുക. കുറഞ്ഞത് 40 കിലോമീറ്റർ ദൂരെയുള്ള ഭൂമി ഏറ്റെടുക്കുമ്പോൾ മാത്രമേ നാലിരട്ടി വില ലഭിക്കുകയുള്ളൂ. 5 തട്ടുകളിലാക്കിയാകും ഗ്രാമങ്ങളിൽ ഭൂമിയുടെ വിപണി വിലനിർണയം.

കോർപറേഷനെയും മുനിസിപ്പാലിറ്റികളെയുമാണു നഗരങ്ങളായി കണക്കാക്കുന്നത്. ഇവിടെ വിപണിവിലയുടെ ഇരട്ടി ലഭിക്കും. അതേസമയം, ഗ്രാമങ്ങളിൽ 1.2 മുതൽ 2 വരെയാണ്‌ വിപണി വില കണക്കാക്കാനുള്ള ഗുണനഘടകം നിശ്ചയിച്ചിരിക്കുന്നത്. 

നഗരസഭയുടെ അതിർത്തി കഴിഞ്ഞ് 10 കിലോമീറ്റർ വരെ 1.2 ആയിരിക്കും ഗുണനഘടകം. 10–20 കിലോമീറ്ററിൽ 1.4, 20–30 കിലോമീറ്ററിൽ 1.6, 30–40 കിലോമീറ്ററിൽ 1.8, അതിന് മുകളിലേക്കുള്ളതിന് 2 എന്നിങ്ങനെയാണ്‌ ഗുണനഘടകം. 

ഭൂമിയുടെ ന്യായവിലയെ ഗുണനഘടകം കൊണ്ടു ഗുണിച്ച ശേഷം വിപണി വില കണക്കാക്കുകയും ഈ തുക മുഴുവൻ സ്ഥലവിലയായി ഉടമയ്ക്ക് നൽകുകയുമാണ്‌ ചെയ്യുന്നത്. 

നഗരങ്ങളിൽ എല്ലായിടത്തും ഗുണന ഘടകം 1 ആയിരിക്കും. അതായത്, ഭൂമിക്ക് വില നൽകുന്നതിന്റെ മാനദണ്ഡം എല്ലാ നഗരങ്ങളിലും ഒന്നായിരിക്കും. ഭൂമിയിൽ കെട്ടിടങ്ങളും മരങ്ങളുമുണ്ടെങ്കിൽ വിലയിൽ ഏറ്റക്കുറച്ചിലുണ്ടാകും.