കടയ്ക്കൽ : 16 വയസ്സുകാരിയെ വിവിധ സ്ഥലങ്ങളിൽ കൊണ്ടു പോയി പീഡിപ്പിച്ച കേസിൽ ഓയിൽപാം മുൻ ജീവനക്കാരൻ ഉൾപ്പെടെ 4 പേർ പിടിയിൽ. ചിതറ ഓയിൽ പാം എസ്റ്റേറ്റ് മുൻ ജീവനക്കാരൻ വട്ടപ്പാട് വിഷ്ണു ഭവനിൽ മോഹനൻ (59), തുടയന്നൂർ ക്വാർട്ടേഴ്സിൽ സുധീർ (39), ചിതറ കുളത്തറ ഫൈസൽ ഖാൻ മൻസിലിൽ ബഷീർ (52), കടയ്ക്കൽ പള്ളിമുക്കിൽ ബാർബർ ഷോപ്പ് നടത്തുന്ന ചിതറ കിഴക്കുംഭാഗം ചരുവിള പുത്തൻ വീട്ടിൽ മുഹമ്മദ് നിയാസ് (25) എന്നിവരെയാണ് കടയ്ക്കൽ സി.ഐ പി.എസ്. രാജേഷ് അറസ്റ്റ് ചെയ്തത്. 

പെൺകുട്ടി പത്താം ക്ലാസ് വിദ്യാർഥിനിയാണ്. ഇനിയും കൂടുതൽ പേർ കേസിൽ ഉണ്ടെന്ന് പൊലീസ് സംശയിക്കുന്നു. പെൺകുട്ടിയുടെ വീട്ടിലും പ്രതി മോഹനന്റെ വീട്ടിലും വച്ചായിരുന്നു പീഡനമെന്നു പൊലീസ് പറഞ്ഞു. പ്രതികളുമായി പൊലീസ് തെളിവെടുപ്പ് നടത്തി. സ്കൂൾ അധ്യാപകന് സംശയം തോന്നി‍ പെൺകുട്ടിയിൽ നിന്നു വിവരം ശേഖരിച്ച് ശിശുക്ഷേമ സമിതിയെ അറിയിക്കുകയായിരുന്നു. ചൈൽഡ് വെൽഫെയർ കമ്മിറ്റി നൽകിയ വിവരം അനുസരിച്ചാണ് പൊലീസ് അന്വേഷണം നടത്തിയത്.

കടയ്ക്കൽ എസ്ഐമാരായ അജു കുമാർ, എം.എസ്. മനോജ്, എ.എസ്.ഐ ഉണ്ണിക്കൃഷ്ണൻ, യു.എസ്. ബിനിൽ, വനിതാ സിവിൽ പൊലീസ് ഓഫിസർ അജിത, സിവിൽ പൊലീസ് ഓഫിസർമാരായ നിയാസ്, അഭിലാഷ്, രഞ്ജിത്ത്, റോബി എന്നിവരാണ് അന്വേഷണം നടത്തിയത്. പ്രതികളെ കടയ്ക്കൽ കോടതി റിമാൻഡ് ചെയ്തു.