ഇരിട്ടി : ആക്രമണകാരികളാവുന്ന വൻ തേനീച്ചകളും കടന്നലുകളും സ്വൈര്യ ജീവിതത്തിനു ഭീഷണിയാവുന്നു. രണ്ട് മാസത്തിനിടെ 3 പേരാണ് മേഖലയിൽ തേനീച്ചയുടെ ആക്രമണത്തിൽ കൊല്ലപ്പെട്ടത്.  നിരവധി പേർക്ക് പരിക്കേൽക്കുകയും ചെയ്തു. ഇരിട്ടി മേഖലയിൽ കഴിഞ്ഞ രണ്ട് ദിവസത്തിനകം രണ്ട് പേർ കൊല്ലപ്പെട്ടു. രണ്ടാംകടവിൽ വീടിന് സമീപം വിറക് ശേഖരിക്കാൻ പോയ പന്തലാടിയിൽ സിസിലിയും ഊവ്വാപ്പള്ളിയിൽ പശുവിനെ മോയ്ക്കുകയായിരുന്ന ചെങ്കഴിക്കുന്നേൽ സ്കറിയയുമാണു തേനീച്ചയുടെ ആക്രമണത്തിൽ അടുത്തടുത്ത ദിവസങ്ങളിൽ മരിച്ചത്. ഒരുമാസം മുൻപ് കേളകം ഇല്ലിമുക്കിൽ കശുവണ്ടി പെറുക്കുകയായിരുന്ന ചന്ദ്രോത്ത് തോമസും തേനീച്ചയുടെ ആക്രമണത്തിൽ കൊല്ലപ്പെട്ടു. 

മുൻ വർഷങ്ങളിലും തേനീച്ചയുടെയും കടന്നലുകളുടെയും ആക്രമണത്തിൽ പരിക്കേൽക്കുന്ന സംഭവം ഉണ്ടാവാറുണ്ടെങ്കിലും ഇത്തവണ സ്ഥിതി ഗുരുതരമാവുകയാണ്. കഴിഞ്ഞ ദിവസം ഈന്തുംകരിയിൽ 5 പേരാണ് കടന്നലിന്റെ ആക്രമണത്തിൽ പരുക്കേറ്റ് ചികിത്സ തേടിയത്. ഉളിക്കലിൽ തേനീച്ചയുടെ ആക്രമിച്ചതിനെ തുടർന്ന് ജീവൻ രക്ഷിക്കാൻ കിണറ്റിൽ ചാടിയ യുവാവിനെ അഗ്നിരക്ഷാ സേനയെത്തിയാണു രക്ഷിച്ചത്. നഗര–ഗ്രാമ വ്യത്യാസമില്ലാതെ നൂറ് കണക്കിന് തേനീച്ച കോളനികളാണ് കൂടു കൂട്ടിയിട്ടുള്ളത്. ഇരിട്ടി നഗരത്തിലെ വലിയ കെട്ടിടങ്ങളും പഴയപാലത്തിന് അടിവശവും കോളിക്കടവ് പാലത്തിലും ഇവ കൂട്ടമായി കൂടു കൂട്ടിയിരിക്കുകയായാണ്.

മറ്റ് വന്യ ജീവികൾ ആക്രമിച്ചാൽ കണ്ട് നിൽക്കുന്നവർക്ക് ജീവികളുടെ ശ്രദ്ധ തിരിച്ച് ആക്രമണത്തിന് ഇരയാവുന്നവരെ രക്ഷപ്പെടുത്താൻ കഴിയും. വൻ തേനീച്ചകളും കടന്നലുകളും ആക്രമണം ആരംഭിച്ചാൽ ഇവയെ  പിന്തിരിപ്പിക്കുക ദുഷ്ക്കരമാണ്. നൂറ് കണക്കിന് ഈച്ചകൾ ഒരേ സമയത്താണ് ആക്രമിക്കുക. ഉയരമുള്ള മരങ്ങളും വലിയ കെട്ടിടങ്ങൾക്ക് മുകളിലും കൂടു കൂട്ടുന്ന ഇവയുടെ ആക്രമണം നിനച്ചിരിക്കാത്ത നേരത്തായിരിക്കും. പലപ്പോഴും ശാന്തരായി കഴിയുന്ന ഇവയെ പരുന്ത്, കാക്കകൾ തുടങ്ങിയവ ശല്യം ചെയ്യുമ്പോഴാണ് ആക്രമണകാരികളാവുന്നത്. തേനും പുഴുവും മുട്ടയുമായ് കഴിയുന്ന ഇവയുടെ കൂടുകൾ പരുന്തുകളും കാക്കകളുമാണ് പ്രധാനമായും ആക്രമിക്കുക. പരുന്തും കാക്കകളും പറന്ന് രക്ഷപ്പെടുമെങ്കിലും  ഇവയുടെ ദേഷ്യം മുഴുവൻ സമീപത്ത് കാണുന്ന മനുഷ്യരോടും മൃഗങ്ങളോടുമാണ് തീർക്കുക.