തിരുവനന്തപുരം : സംസ്ഥാനത്തെ സ്ത്രീ തൊഴിലാളികൾക്ക് തൊഴിലിടങ്ങളിൽ നേരിടുന്ന പ്രശ്നങ്ങൾ തൊഴിൽ വകുപ്പിനെ അറിയിക്കാൻ കോൾ സെന്റർ സംവിധാനം–‘സഹജ’– വനിതാ ദിനമായ ഇന്ന് നിലവിൽ വരും. 180042555215 ആണ് ടോൾ ഫ്രീ നമ്പർ. രാവിലെ 10 മുതൽ വൈകിട്ട് 5 വരെ വിളിക്കാം. 

കോൾ സെന്റർ എക്സിക്യൂട്ടീവ് ആവശ്യമായ നിർദേശങ്ങൾ നൽകും. പരാതി ബന്ധപ്പെട്ട തൊഴിൽ വകുപ്പ് ഉദ്യോഗസ്ഥന് കൈമാറിയതിന്റെ വിവരങ്ങൾ മെസേജായി ലഭ്യമാക്കുകയും ചെയ്യും. തൊഴിലാളി ആഗ്രഹിക്കുന്ന പക്ഷം അവരുടെ വിവരങ്ങൾ വെളിപ്പെടുത്താതെ തന്നെ പരിഹാര നടപടികൾ സ്വീകരിക്കുമെന്ന് മന്ത്രി വി. ശിവൻകുട്ടി അറിയിച്ചു. 

കഴിഞ്ഞ സർക്കാരിന്റെ കാലത്ത് കൊണ്ടുവന്ന നിയമ ഭേദഗതി അനുസരിച്ച് തൊഴിലിടങ്ങളിൽ തൊഴിലാളികൾക്ക് ഇരിപ്പിടങ്ങൾ ലഭ്യമാക്കുന്നുണ്ടെന്ന് ഉറപ്പാക്കാനായി പരിശോധനകൾ ഊർജിതമാക്കുമെന്നും മന്ത്രി അറിയിച്ചു. ഇതുമായി ബന്ധപ്പെട്ട ബോധവൽക്കരണ പരിപാടിക്കും സർക്കാർ ഇന്ന് തുടക്കം കുറിക്കും. 

ഗാർഹിക മേഖലയിലെ തൊഴിലാളികളെ അസംഘടിത തൊഴിലാളി സാമൂഹിക സുരക്ഷാ ബോർഡിൽ രജിസ്റ്റർ ചെയ്യിപ്പിക്കാനുള്ള പരിപാടികളും നടപ്പാക്കും. ഈ മേഖലയിൽ തൊഴിലാളികളെ റിക്രൂട്ട് ചെയ്യുന്ന സ്ഥാപനങ്ങൾ തൊഴിൽ വകുപ്പ് ഉദ്യോഗസ്ഥർ സന്ദർശിച്ച് രജിസ്ട്രേഷന് ശ്രമം നടത്തും. നിലവിൽ അംഗങ്ങളായ തൊഴിലാളികൾക്ക് കുടിശികയായ അംഗത്വം തുക ഗഡുക്കളായി അടയ്ക്കാനും സൗകര്യം ഏർപ്പെടുത്തി.