കതിരൂർ : കേന്ദ്രസർക്കാരിന്റെ കീഴിലുള്ള നാഷണൽ കോ-ഓപ്പറേറ്റീവ് ഡെവലപ്മെന്റ് കോർപ്പറേഷന്റെ പുരസ്കാരം കതിരൂർ സർവീസ് സഹകരണ ബാങ്കിന് ലഭിച്ചു. ദേശീയതലത്തിലെ മികച്ച സംഘങ്ങളെ വിലയിരുത്തിയാണ് കതിരൂർ ബാങ്കിന് ഒന്നാം സ്ഥാനം ലഭിച്ചത്. എട്ടിന് തിരുവനന്തപുരത്ത് നടക്കുന്ന ചടങ്ങിൽ സഹകരണമന്ത്രി വി.എൻ. വാസവനിൽനിന്ന് പുരസ്കാരം ഏറ്റുവാങ്ങും.

എരഞ്ഞോളിയിൽ ആയുർവേദ ചികിത്സാകേന്ദ്രം, സൈക്കിൾ പവലിയൻ, സൈക്കിൾ വാടകകേന്ദ്രം, കണ്ണൂർ ജില്ലയിലെ ഏത് ബാങ്കിന്റെ എ.ടി.എമ്മിൽനിന്നും കതിരൂർ ബാങ്കിന്റെ എ.ടി.എം. കാർഡ് ഉപയോഗിച്ച് പണം പിൻവലിക്കാനുള്ള സംവിധാനം എന്നിവ ഉടൻ ആരംഭിക്കും.

സൈക്കിൾസവാരിക്ക് കൂടുതൽ പ്രാധാന്യം നൽകിക്കൊണ്ടുള്ള ബോധവത്ക്കരണം ബാങ്കിന്റെ പരിധിയിൽ നടത്തും. ഏപ്രിൽ 22 മുതൽ ആഴ്ചയിൽ ഒരുദിവസം സൈക്കിളിൽ യാത്ര ചെയ്ത് മാതൃകയാവുന്നഉദ്യോസ്ഥർക്ക്‌ സമ്മാനം നല്കുമെന്നും പത്രസമ്മേളനത്തിൽ പ്രസിഡന്റ് ശ്രീജിത്ത് ചോയനും സെക്രട്ടറി കെ. അശോകനും പറഞ്ഞു. കെ. രാജക്കുറുപ്പ്, കണ്ട്യൻ ഭാസ്കരൻ, നെഫീസുൽ മിസ്രിയ, കെ. ശോഭ, പി.എം. ഹേമലത എന്നിവരും പങ്കെടുത്തു