കണ്ണൂർ : റെയിൽവേ സ്റ്റേഷൻ പരിസരത്ത് നിർത്തിയിട്ട വാഹനത്തിൽ നിന്ന് ചെക്ബുക് കവർന്ന് ട്രഷറിയിൽ നിന്ന് പണം പിൻവലിച്ച 2 പേർ അറസ്റ്റിൽ. ചെറുവത്തൂർ കയ്യൂർ സ്വദേശി എം.അഖിൽ (34), കണ്ണൂർ സിറ്റി സ്വദേശി കെ.ഖാലിദ് (37) എന്നിവരെയാണ് ടൗൺ ഇൻസ്പെക്ടർ ശ്രീജിത്ത് കൊടേരിയും സംഘവും അറസ്റ്റ് ചെയ്തത്. ഇക്കഴിഞ്ഞ ഫെബ്രുവരി ആദ്യവാരം പുലർച്ചെ എറണാകുളത്ത് ഇന്റർവ്യൂവിൽ പങ്കെടുക്കാൻ ട്രെയിനിൽ പോകാനായി റെയിൽവേ സ്റ്റേഷനിലെത്തിയ ഇരിക്കൂർ സ്വദേശി റംഷാദിന്റെ ജീപ്പിൽ നിന്നാണ് ഇരുവരും ഒപ്പിട്ട ചെക്ബുക് മോഷ്ടിച്ചത്.

റംഷാദിന്റെ മാതാവിന്റെ പെൻഷനാണ് മോഷ്ടിച്ച ചെക്ക് ഉപയോഗിച്ച ഇവർ തട്ടിയത്. ഇന്റർവ്യൂവിനു ശേഷം മട്ടന്നൂർ ട്രഷറിയിൽ എത്തി റംഷാദ് പണം പിൻവലിക്കാൻ നോക്കിയപ്പോഴാണ് തട്ടിപ്പ് നടന്നതായി മനസ്സിലായത്. തുടർന്ന് നടത്തിയ അന്വേഷണത്തിൽ പയ്യന്നൂർ ട്രഷറിയിൽ നിന്ന് 19,000 രൂപ പിൻവലിച്ചതായി കണ്ടെത്തി. തുടർന്ന് ടൗൺ പൊലീസിൽ പരാതി നൽകുകയായിരുന്നു. റെയിൽവേ സ്റ്റേഷനു സമീപത്തെ സി.സി.ടി.വി പരിശോധിച്ചതിൽ ഇരുവരും ചേർന്ന് ജീപ്പിന്റെ ചില്ല് തകർത്ത് ചെക്ബുക് കവരുന്നതായി വ്യക്തമായി. കേസിൽ ഒരാൾ കൂടി പിടിയിലാകാനുണ്ടെന്ന് പൊലീസ് അറിയിച്ചു.