മാഹി: പതിനേഴ് ദിവസം നീണ്ടു നിൽക്കുന്ന ആവില മാതാവിന്റെ തിരുനാൾ മഹോത്സവത്തിന് ഒക്ടോബർ 5 ന് കൊടിയേറും. മയ്യഴി ഭരണകൂടത്തിന്റെ കൊവിഡ് നിയന്ത്രണങ്ങളെ പൂർണ്ണമായി അനുസരിച്ചാണ് പെരുന്നാൾ കൊണ്ടാടുകയെന്ന് ഇടവക വികാരി ഫാ. വിൻസെന്റ് പുളിക്കൽ വാർത്താസമ്മേളനത്തിൽ അറിയിച്ചു. തിരുനാൾ ആഘോഷം 22 ന് ഉച്ചയോടെ അവസാനിക്കും.

5 ന് രാവിലെ 11.30 ന് ഇടവക വികാരി കൊടിയേറ്റും. തുടർന്ന് 12 മണിക്ക് ആൾത്താരയിലെ രഹസ്യ അറയിൽ സൂക്ഷിച്ച വിശുദ്ധ അമ്മ ത്രേസ്യ പുണ്യവതിയുടെ തിരുസ്വരൂപം വിശ്വാസികൾക്ക് പൊതുവണക്കത്തിനായി പ്രതിഷ്ഠിക്കുന്നതോടെ ആഘോഷങ്ങൾക്ക് തുടക്കമാവും. വൈകുന്നേരം 6 ന് കണ്ണൂർ രൂപതാ മെത്രാൻ ഡോ.അലക്സ് വടക്കുംതലയുടെ കാർമ്മികത്വത്തിൽ ദിവ്യബലി, നൊവേന എന്നിവ നടക്കും ദിവ്യബലിയിൽ പങ്കെടുക്കുവാൻ ദേവാലയത്തിനകത്ത് കോവിഡ് മാനദണ്ഡങ്ങൾ പ്രകാരം 40 തീർഥാടകർക്ക് അനുമതിയുണ്ടായിരിക്കും.
തുടർന്നുള്ള ദിവസങ്ങളിൽ വിവിധ റീത്തുകളിൽ രാവിലെ 7നും വൈകുന്നേരം 6 നും ദിവ്യബലിയും നൊവേനയും ദേവാലയത്തിനകത്ത് നടക്കും.

10 ന് വൈകുന്നേരം 6 ന് തലശേരി അതിരൂപത മെത്രപ്പൊലീത്ത മാർ ജോർജ്ജ് ഞരളക്കാട്ടിന്റെ കാർമ്മികത്വത്തിൽ ദിവ്യബലി. തിരുനാൾ ആഘോഷത്തിന്റെ പ്രധാന ദിവസങ്ങളായ 14 ന് തിരുനാൾ ജാഗരവും 15 ന് തിരുനാൾ ദിന ആഘോഷങ്ങളും നടക്കും.14 ന് 6 ന് കൊല്ലം രൂപതാ മെത്രാൻ ഡോ. പോൾ മുല്ലശ്ശേരിയുടെ കാർമ്മികത്വത്തിൽ ദിവ്യബലി. രാത്രി 8 ന് വിശുദ്ധ അമ്മത്രേസ്യയുടെ തിരുസ്വരൂപം വഹിച്ചു കൊണ്ടുള്ള നഗര പ്രദക്ഷിണം. കൊവിഡ് പശ്ചാത്തലത്തിൽ തിരുസ്വരൂപത്തിൽ മാല ചാർത്തുവാൻ അനുവാദമുണ്ടാകില്ല.

15 ന് തിരുനാൾ ദിനത്തിൽ രാവിലെ 7 ന് ദിവ്യബലി, 10 ന് കോഴിക്കോട് രൂപതാ മെത്രാൻ റവ. ഡോ. വർഗീസ് ചക്കാലക്കലിന്റെ കാർമ്മികത്വത്തിൽ സാഘോഷ ദിവ്യബലി. പാരിഷ് പാസ്റ്റർ കൗൺസിൽ നേതൃത്വം നൽകും. പുലർച്ചെ നടക്കേണ്ട ഉരുളൽ നേർച്ചയും, വിജയദശമി നാളിലെ എഴുത്തിനിരുത്തും കൊവിഡ് പശ്ചാത്തലത്തിൽ ഉണ്ടായിരിക്കില്ലെന്ന് ഇടവക വികാരി അറിയിച്ചു.

22 ന് സമാപന ദിവസം വരെ എല്ലാ ദിവസവും രാവിലെയും വൈകുന്നേരവും ദിവ്യബലി ഉണ്ടായിരിക്കും. സമാപന ദിവസം രാവിലെ 10 ന് ദേവാലയ ഇടവക വികാരി: ഫാ വിൻസെന്റിന്റെ കാർമ്മികത്വത്തിൽ ദിവ്യബലി. 22 ന് ഉച്ചയോടെ തിരുസ്വരൂപം ആൾത്താരയിലെ രഹസ്യ അറയിലേക്ക് മാറ്റും. വാർത്താ സമ്മേളനത്തിൽ സഹവികാരി ഫാ.ജോസഫ് ഷിബു, പാരിഷ് കൗൺസിൽ സെക്രട്ടറി സജി സാമുവൽ, ആഘോഷക്കമ്മിറ്റി കൺവീനർ ഡിക്സൺ വർഗീസ്, സാജു ജോസഫ്, അഗസ്റ്റിൻ ആന്റണി, ലിജോയ്, എറിക്ക് സാംസൺ, ക്രിസ്റ്റഫർ ആന്റണി എന്നിവരും പങ്കെടുത്തു.