ഇരിട്ടി: ഇരിട്ടി താലൂക്ക് ആശുപത്രി ഒ.പിയുടെ പ്രവർത്തനം അവതാളത്തിലാണെന്ന് ആക്ഷേപം. കോവിഡ് രോഗികൾക്കും രോഗലക്ഷണമുള്ളവർക്കും മറ്റ് രോഗമുള്ളവർക്കും എല്ലാം ഒ.പി. ടിക്കറ്റിനായി ഒരേ ക്യൂവാണുള്ളത്.
കോവിഡ് നിയന്ത്രണങ്ങളില്ലാതെ ക്യൂ നിന്നു ടോക്കൺ എടുത്ത രോഗികൾ ചീട്ട് എടുത്ത് ആദ്യം ഇതിന് സമീപം പ്രവർത്തിക്കുന്ന പനി കോവിഡ് ഹെൽപ് ഡസ്‌കിൽ എത്തണം. അവിടെ ഉള്ളവരുടെ നിർദ്ദേശപ്രകാരമാണ് ഡോക്ടറെ കാണാൻ പോകേണ്ടത്. അതിനാൽ തന്നെ ഇവിടെ കൂടുതൽ ആളുകൾ കൂട്ടം കൂടി നിൽക്കും.
ഡോക്ടറെ കാണാൻ ആളുകൾ കാത്ത് നിൽക്കുന്ന സ്ഥലത്ത് കൂടിയാണ് കോവിഡ് പോസിറ്റീവായവരും ലക്ഷണം ഉള്ളവരും ഒക്കെ കടന്നു പോകുന്ന വഴി. 

സ്ത്രീകളും കുട്ടികളും വയോധികരും ഉൾപ്പെടെയുള്ള ആളുകളാണ് മറ്റ് പല രോഗങ്ങളുമായി വിവിധ സ്ഥലങ്ങളിൽ നിന്ന് താലൂക്കാശുപത്രിയിൽ എത്താറുള്ളത്. ഭീഷണി സാഹചര്യം ഉണ്ടായിട്ടും ഒ.പി.യിൽ ഉൾപ്പെടെ പ്രവർത്തിക്കുന്ന ജീവനക്കാർ പി.പി.ഇ. കിറ്റ് പോലും ധരിക്കാറുമില്ല. കഴിഞ്ഞ ദിവസമാണ് ആശുപത്രിയിലെ ക്ലീനിങ്ങ് സ്റ്റാഫിന് കോവിഡ് സ്ഥിരീകരിച്ചത്. മുൻപും ജീവനക്കാർക്ക് കോവിഡ് ബാധിച്ചിട്ടുണ്ട്. ഡയാലിസിസ് രോഗികളും ഈ വഴിയാണ് കടന്നു പോകുന്നത്.

ഒ.പി.യിൽ രണ്ട് കൗണ്ടർ ഉണ്ടെങ്കിലും ഒരു കൗണ്ടർ മാത്രമേ ഇപ്പോൾ പ്രവർത്തനം ഉള്ളൂ. ദിനം പ്രതി 500 ലധികം രോഗികൾ എത്തുന്ന ഇവിടെ കോവിഡിനു മുൻപ് രണ്ട് കൗണ്ടർ പ്രവർത്തിച്ചിടത്താണ് ഇപ്പോൾ ഒരു കൗണ്ടറായി പരിമിതപ്പെടുത്തിയത്. 500 ൽ അധികം ആളുകൾക്ക് ഒരു ജീവനക്കാരി മാത്രമാണ് ഒ.പി ടിക്കറ്റ് കൊടുക്കുന്നത്. രോഗികളുടെ കാത്തിരിപ്പും പകർച്ച വ്യാധി വ്യാപന ഭീഷണിയും നേരത്തെ പരാതിയായി ഉയർന്നിരുന്നെങ്കിലും യാതൊരു നടപടിയും ഉണ്ടായില്ല. ഇപ്പോൾ ഒ.പി.യിൽ ക്യൂ നിൽക്കുന്നവരിൽ നിന്നു കോവിഡ് പോസിറ്റീവ് ആയവരെയും കണ്ടെത്താറുണ്ടെന്നും പറയുന്നു. മറ്റു രോഗവുമായി എത്തുന്നവർ കോവിഡ് പോസിറ്റീവും ആയി പോകേണ്ട ഗുരുതര സാഹചര്യം ആണുള്ളത്. ആരോഗ്യ വകുപ്പും നഗരസഭയും ഇടപെട്ട് അടിയന്തര ക്രമീകരണങ്ങൾ ഏർപ്പെടുത്തണമെന്നാണ് ജനങ്ങളുടെ ആവശ്യം.