പേരാവൂർ : അണ്ടർ 20 ലോക അത്‌ലറ്റിക്സ് ചാംപ്യൻഷിപ്പിൽ വനിതാ വിഭാഗം ലോങ് ജംപിൽ ഇന്ത്യയുടെ ശൈലി സിങ് വെള്ളി മെഡൽ നേടിയതോടെ ബോബി ജോർജിന് അപൂർവ്വ ബഹുമതി.

പേരാവൂർ സ്വദേശിയും ജിമ്മി ജോർജിന്റെ ഇളയ സഹോദരനുമായ റോബർട്ട് ബോബി ജോർജും ഭാര്യയും അത് ലറ്റുമായ
അഞ്ജു ബോബി ജോർജും ബംഗ്ലൂരുവിൽ നടത്തുന്ന അഞ്ജു ബോബി സ്പോർട്സ് അക്കാദമിയിൽ സ്പോർട്സ് അതോറിറ്റി ഓഫ് ഇന്ത്യയുടെ സഹകരണത്തോടെ ബോബി ജോർജ് പരിശീലിപ്പിക്കുന്ന താരമാണ് ശൈലി. മുൻപു പലവട്ടവും ദേശീയ ജൂനിയർ റെക്കോർഡ് ഭേദിച്ചിട്ടുണ്ട്. 6.48 മീറ്ററായിരുന്നു ഇതിനു മുൻപു ശൈലിയുടെ ഏറ്റവും മികച്ച ദൂരം.

ലോക ചാമ്പ്യൻഷിപ്പിൽ ലോങ്ങ്‌ ജമ്പിൽ അണ്ടർ 20 വിഭാഗത്തിൽ ഇന്ത്യയിൽ നിന്നുള്ള ആദ്യ വനിതാ മെഡൽ ജേതാവാണ് ശൈലി സിംഗ്.ലോങ്ങ്‌ ജമ്പിൽ സീനിയർ വേൾഡ് അത്‌ലറ്റിക് വിഭാഗത്തിൽ ഇന്ത്യയിൽ നിന്ന് മെഡൽ നേടിയതാവട്ടെ അഞ്ജു ബോബി ജോർജും.ഇരുവരെയും ലോക ചാമ്പ്യൻഷിപ്പിന് പരിശീലിപ്പിച്ചത് ബോബി ജോർജാണ്. വേൾഡ് അത് ലറ്റിക് ചാമ്പ്യൻഷിപ്പിൽ ജൂനിയറിലും സീനിയറിലും മെഡൽ നേടിയ രണ്ട് അത്‌ലറ്റുകളെ പരിശീലിപ്പിച്ച ഏക കോച്ചെന്ന ബഹുമതിയും ഇനി ബോബി ജോർജിന് സ്വന്തം.

17-കാരിയായ ശൈലിക്ക്‌ സീനിയർ വിഭാഗത്തിൽ മത്സരിക്കാൻ ഇനിയും സാധ്യതകളുണ്ട്.വേൾഡ് ചാമ്പ്യൻഷിപ്പിൽ സീനിയർ വിഭാഗത്തിൽ ഇന്ത്യയിൽ നിന്നുള്ള ഏക മെഡൽ ജേതാവ് അഞ്ജു ബോബി ജോർജ് മാത്രമാണ്.നിലവിൽ ദേശീയ ജൂനിയർ ക്യാംപിലെ കോച്ചാണ് റോബർട്ട്ബോബി ജോർജ്.