തലശ്ശേരി : തലശ്ശേരി നഗരസഭ സ്റ്റേഡിയത്തിന്റെ നടത്തിപ്പ് സംബന്ധിച്ച് തീരുമാനമായതോടെ സ്റ്റേഡിയം തുറന്നു കൊടുക്കാൻ നടപടി സ്വീകരിക്കണമെന്ന ആവശ്യമുയരുന്നു.

നടത്തിപ്പിനുള്ള അവകാശം സംബന്ധിച്ച് നഗരസഭയും റവന്യു അധികൃതരും തമ്മിലുള്ള തർക്കം പലപ്പോഴും പ്രവർത്തനത്തെ ബാധിച്ചു. സ്റ്റേഡിയത്തിന്റെ നവീകരണം തുടങ്ങിയതോടെയാണ് തർക്കം രൂക്ഷമായത്. കഴിഞ്ഞ ആഴ്ച കായികമന്ത്രി വി. അബ്ദുറഹ്‌മാന്റെ അധ്യക്ഷതയിൽ ചേർന്ന യോഗത്തിലാണ് തർക്കത്തിന് പരിഹാരം കണ്ടത്. 

സ്റ്റേഡിയത്തിന്റെ നവീകരണ പ്രവൃത്തി തുടങ്ങിയിട്ട് അഞ്ചുവർഷമായി. അന്നു മുതൽ സ്റ്റേഡിയം അടഞ്ഞുകിടക്കുകയാണ്. 2016-ന്റെ അവസാനത്തിലാണ് നവീകരണം തുടങ്ങിയത്. സ്റ്റേഡിയം അടച്ചതോടെ കായികമത്സരങ്ങൾ നടത്താനോ കായികതാരങ്ങൾക്ക് പരിശീലനം നടത്താനോ കഴിയാത്ത അവസ്ഥയാണ്. സ്റ്റേഡിയം തുറന്നു കൊടുത്താൽ കായികതാരങ്ങൾക്ക് ഗുണകരമാകും.

ഉടമസ്ഥാവകാശം റവന്യു വകുപ്പിനാണങ്കിലും നഗരസഭ സ്റ്റേഡിയം എന്നാണ് അറിയപ്പെടുന്നത്. റവന്യു വകുപ്പിൽനിന്ന് കായികവകുപ്പ്‌ സ്റ്റേഡിയം നിൽക്കുന്ന ഭൂമി പാട്ടത്തിനെടുക്കാനാണ് തീരുമാനം.

കായികവകുപ്പ്‌ ഡയറക്ടറെ ഇതിനായി കഴിഞ്ഞദിവസം നടന്ന യോഗം ചുമതലപ്പെടുത്തി. കായിക യുവജന കാര്യാലയം കിഫ്ബി സഹായത്തോടെയാണ് രണ്ടാംഘട്ട നിർമാണം നടത്തിയത്. രണ്ടാംഘട്ട നിർമാണ പ്രവർത്തനം പൂർത്തിയായിവരികയാണ്.

400 മീറ്റർ എട്ടുവരി സിന്തറ്റിക് ട്രാക്കിന്റെ നിർമാണം അവസാനഘട്ടത്തിലാണ്. സ്റ്റേഡിയത്തിന്റെ തുടർപരിപാലനം കായിക യുവജന കാര്യാലയത്തിനു കീഴിൽ സർക്കാർ രൂപവത്കരിച്ച സ്പോർട്‌സ് കേരള ലിമിറ്റഡ് എന്ന പൊതുമേഖല കമ്പനിക്കാണ്. കമ്പനിക്ക് ലഭിക്കുന്ന ലാഭത്തിൽനിന്ന് 40 ശതമാനം തുക നഗരസഭയ്ക്ക് നൽകണം.

സ്റ്റേഡിയത്തിന്റെ നടത്തിപ്പിന് സ്റ്റേഡിയം മാനേജ്‌മെന്റ് കമ്മിറ്റി രൂപവത്കരിക്കും. എം.എൽ.എ. ചെയർമാനായ കമ്മിറ്റിയിൽ നഗരസഭ ചെയർമാൻ, കളക്ടർ, കായിക യുവജനകാര്യ വകുപ്പ്‌ അഡീഷണൽ ഡയറക്ടർ, സ്പോർട്‌സ് സ്ഥിരംസമിതി ചെയർമാൻ, ജില്ലാ സ്പോർട്‌സ് കൗൺസിൽ പ്രസിഡന്റ് എന്നിവർ അംഗങ്ങളാവും. ഒന്നാംഘട്ട നവീകരണം 2018 ഡിസംബറിൽ പൂർത്തിയായി. മൈതാനം പുല്ലുവെച്ചു പിടിപ്പിക്കൽ, ഓവുചാൽ, ഗാലറി നവീകരണം, ബാസ്കറ്റ് ബോൾ മൈതാനം നിർമ്മാണം എന്നിവയാണ് ആദ്യഘട്ടത്തിൽ ചെയ്തത്. ആറുകോടി രൂപയാണ് ഇതിന് ചെലവായത്.

ഇതിൽ പുല്ല് വെച്ചുപിടിപ്പിച്ചത് ഉണങ്ങിപ്പോയത് വിവാദമായി. പുല്ല് വീണ്ടും വെച്ചു പിടിപ്പിക്കാൻ കരാറുകാർ സമ്മതിച്ചിരുന്നു. സംരക്ഷണം സംബന്ധിച്ച തീരുമാനമാകാത്തതിനാൽ പുല്ല് വെച്ചുപിടിപ്പിച്ചില്ല.

രണ്ടാംഘട്ട നവീകരണത്തിൽ 13 കോടി രൂപയാണ് ചെലവ് പ്രതീക്ഷിക്കുന്നത്. 400 മീറ്റർ എട്ടുവരി സിന്തറ്റിക് ട്രാക്ക്, വാണിജ്യാടിസ്ഥാനത്തിലുള്ള കെട്ടിട സമുച്ചയം, കെട്ടിടത്തിൽ കായികക്ഷമതാ പരിശീലനഹാൾ, ശൗചാലയം, വസ്ത്രം മാറുന്നതിനുള്ള മുറി എന്നിവയാണ് രണ്ടാംഘട്ടത്തിലുള്ളത്.