തലശ്ശേരി: തലശ്ശേരി – മൈസൂരു റെയിൽവേക്കായുള്ള മുഖ്യമന്ത്രി പിണറായി വിജയന്റെ ഇടപെടലിൽ പ്രതീക്ഷയർപ്പിച്ച്‌ കേരളം. റെയിൽമന്ത്രിയുമായുള്ള ചർച്ചയോടെ മൈസൂരു റെയിൽപാതക്ക്‌ വീണ്ടും ജീവൻവയ്‌ക്കുകയാണ്‌. കർണാടകവും പച്ചക്കൊടി കാട്ടിയാൽ വർഷങ്ങളായുള്ള വടക്കൻ കേരളത്തിന്റെ സ്വപ്‌നപദ്ധതി യാഥാർഥ്യമാവും.

കേരള റെയിൽ ഡെവലപ്‌‌മെന്റ്‌ കോർപ്പറേഷൻ ലിമിറ്റഡ്‌ ചുമതലപ്പെടുത്തിയ സിസ്‌ട്രാ എന്ന സ്ഥാപനമാണ്‌ വിശദമായ പ്രൊജക്ട്‌ റിപ്പോർട്ട്‌ (ഡിപിആർ) തയാറാക്കുന്നത്‌. കേരളത്തിന്റെ ഭാഗത്ത്‌ കണ്ണൂർ, കോഴിക്കോട്‌ ജില്ലകളിലെ സർവേ പുരോഗമിക്കുകയാണ്‌. തലശ്ശേരിയുടെ കിഴക്കൻ മലയോരവും കടന്ന്‌ കോഴിക്കോട്‌ ജില്ലയിലൂടെയാണ്‌ പാത വയനാട്ടിലേക്ക്‌ കടക്കുക.

തലശ്ശേരി മുതൽ പുൽപ്പള്ളിവരെ 120 കിലോമീറ്റർ ദൂരം കേരളത്തിലൂടെയാണ്‌ റെയിൽ. പശ്‌ചിമഘട്ടത്തിലൂടെയുള്ള പാതയിൽ പലയിടത്തും ടണൽ ആവശ്യമായി വരും. സർവേക്ക്‌ ശേഷം വിശദമായ പ്രൊജക്ട്‌ റിപ്പോർട്ട്‌ തയാറായാൽ മാത്രമേ എത്ര ടണൽ, എവിടെയൊക്കെ എന്ന്‌ കൃത്യമായി പറയാനാവൂ. സർവേക്ക്‌ നൂറുകോടി രൂപ സർക്കാർ അനുവദിച്ചിരുന്നു.

കർണാടകത്തിലെ ബന്ദിപ്പുർ, നാഗർഹോള വനമേഖലയിലൂടെ ഒഴുകുന്ന കബനിനദിക്കടിയിലൂടെ ടണൽവഴി റെയിൽപാത നിർമിക്കാമെന്ന നിർദേശമാണ്‌ കേരളത്തിന്റേത്‌. 11.5 കിലോമീറ്ററാണ്‌ നദിക്കടിയിലൂടെയുള്ള ടണൽ. ഇതിനു മാത്രം 1200 കോടി രൂപ ചെലവ്‌ കണക്കാക്കുന്നു. നിർദിഷ്ട പാതയിലൂടെ 4  മണിക്കൂർകൊണ്ട്‌ മൈസൂരുവിലെത്താം. 8000 കോടി രൂപയാണ്‌ പദ്ധതിയുടെ പ്രതീക്ഷിത ചെലവ്‌.