പേരാവൂർ: താലൂക്കാസ്പത്രി ഭൂമി ചുറ്റുമതിൽ കെട്ടി സംരക്ഷിച്ച ശേഷം പുതിയ കെട്ടിട നിർമ്മാണം നടത്തിയാൽ മതിയെന്ന് കിഫ്ബിയുടെ നിർദ്ദേശം. കഴിഞ്ഞ മാസം ആസ്പത്രി സന്ദർശിച്ച കിഫ്ബി സംഘമാണ് ഇത് സംബന്ധിച്ച് ബഹുനില കെട്ടിടം നിർമ്മിക്കുന്ന വാപ്കോസ് അധികൃതർക്ക് നിർദ്ദേശം നല്കിയത്. കിഫ്ബിയുടെ നിർദ്ദേശത്തെ തുടർന്ന് ആസ്പത്രി ഭൂമി ചുറ്റുമതിൽ കെട്ടി സംരക്ഷിക്കാനാവശ്യമായ നടപടികൾ സ്വീകരിക്കാൻ വാപ്കോസ് അധികൃതർ സൂപ്രണ്ടിനോട് രേഖാമൂലം ആവശ്യപ്പെട്ടിട്ടുണ്ട്.

പേരാവൂർ താലൂക്കാസ്പത്രിക്ക് ബഹുനില കെട്ടിടം നിർമ്മിക്കാൻ 53 കോടി രൂപയാണ് കിഫ്ബി അനുവദിച്ചത്. ഇതിൽ ഒന്നാം ഘട്ടത്തിൽ 25 കോടി രൂപയുടെ നിർമ്മാണ പ്രവർത്തനത്തിനാണ് അനുമതി കിട്ടിയത്. കഴിഞ്ഞ സർക്കാരിൻ്റെ കാലത്ത് ആരോഗ്യ മന്ത്രി കെ.കെ.ശൈലജ ടീച്ചർ നിർമ്മാണ പ്രവൃത്തി ഉദ്ഘാടനം ചെയ്തെങ്കിലും പഴയ കെട്ടിടം പൊളിക്കുന്നത് ഇനിയും വൈകുകയാണ്. ഇതിനിടയിലാണ് പുതിയ കെട്ടിടം നിർമ്മിക്കണമെങ്കിൽ ആസ്പത്രിക്ക് ചുറ്റുമതിൽ നിർമ്മിക്കണമെന്ന് കിഫ്ബി അധികൃതർ ആവശ്യപ്പെട്ടത്.

ആസ്പത്രി ഭൂമിക്ക് ചുറ്റുമതിൽ കെട്ടാതിരിക്കാനും ആസ്പത്രി കോമ്പൗണ്ടിനകത്തു കൂടി പൊതുവഴിയാക്കാനും ഏതാനുമാളുകൾ വർഷങ്ങളായി ശ്രമിക്കുകയാണ്. ഇതിനെതിരെ ശബ്ദമുയർത്താൻ ഒരു സംഘടനയും രംഗത്തില്ലെന്നതാണ് ശ്രദ്ധേയം.

ആസ്പത്രി ഭൂമി കൈയ്യേറ്റം തിരിച്ചു പിടിക്കാനും ചുറ്റുമതിൽ കെട്ടി സംരക്ഷിക്കാനും സംസ്ഥാന ആരോഗ്യ വകുപ്പ് ഡയറക്ടർ, കണ്ണൂർ ജില്ലാ കലക്ടർ, ഇരിട്ടി തഹസിൽദാർ എന്നിവർ നിരവധി തവണ ആവശ്യപ്പെട്ടിരുന്നു. എന്നാൽ നടപടി സ്വീകരിക്കാൻ ബാധ്യസ്ഥരായ പേരാവൂർ വില്ലേജ് അധികൃതരും ആസ്പത്രി അധികൃതരും ഇക്കാര്യത്തിൽ ഒളിച്ചുകളി തുടരുകയാണ്. ഇനിയും ചുറ്റുമതിൽ കെട്ടാൻ വൈകുന്ന പക്ഷം കിഫ്ബി ഫണ്ട് നഷ്ടപ്പെടാനും ആസ്പത്രിയുടെ നവീകരണം തടസ്സപ്പെടാനും സാധ്യതയുണ്ട്.