തിരുവനന്തപുരം: ഓൺലൈൻ പഠനോപകരണങ്ങൾ വാങ്ങാൻ സഹകരണ ബാങ്കുകൾ വഴി പലിശരഹിത വായ്പ നൽകാനുള്ള നിർദേശത്തിൽ ബാങ്കുകളിൽ ആശയക്കുഴപ്പം. രണ്ടു സർക്കുലറുകളാണ് ഇതുസംബന്ധിച്ച് സഹകരണ സംഘം രജിസ്ട്രാർ ഇറക്കിയത്. ഇതിനുപിന്നാലെ ജില്ലാ ജോയന്റ് രജിസ്ട്രാർമാർക്ക് മറ്റൊരു സർക്കുലറും നൽകി. ഇതിലുള്ള വൈരുദ്ധ്യമാണ് ബാങ്കുകളെ കുഴക്കുന്നത്.

ജൂലായ് 31 വരെയാണ് പുതിയ വായ്പ നൽകാൻ നിർദേശിച്ചിട്ടുള്ളത്. 10,000 രൂപവരെ നൽകും. 24 തവണകളായി പലിശയില്ലാതെ തിരിച്ചടയ്ക്കാം. തിരിച്ചടച്ചില്ലെങ്കിൽ ബാക്കി തുകയ്ക്ക് എട്ട് ശതമാനം പലിശ ഈടാക്കുമെന്നായിരുന്നു രജിസ്ട്രാറുടെ നിർദേശം.

ഇതിനിടെ പല ബാങ്കുകളും അപേക്ഷ സ്വീകരിക്കുന്നില്ലെന്ന പരാതിയുയർന്നു. വായ്പകൾക്ക് ജാമ്യം ഉറപ്പാക്കണോയെന്ന് ബാങ്കുകളും സംശയമുന്നയിച്ചു. തുടർന്നാണ് രണ്ടാമത്തെ സർക്കുലർ ഇറക്കിയത്. ബാങ്ക് അപേക്ഷ നിരസിച്ചാൽ അപേക്ഷകന് ജില്ലാ ജോയന്റ് രജിസ്ട്രാറെ സമീപിക്കാമെന്നാണ് ഇതിലെ നിർദേശം. വായ്പയെടുക്കുന്നയാളുടെ ജാമ്യത്തിൽത്തന്നെ നൽകാമെന്നും വ്യക്തത വരുത്തി.

ഇതിനിടെ, വോട്ടവകാശമുള്ള അംഗങ്ങൾക്ക് (എ-ക്ലാസ്) മാത്രമേ വായ്പ നൽകാൻ പാടുള്ളൂവെന്ന മറ്റൊരു നിർദേശം വന്നു. ഇതോടെ പലർക്കും വായ്പ നൽകാനാകാത്ത സ്ഥിതിയുണ്ടായി.

വായ്പ നൽകും മുമ്പ് വോട്ടവകാശമുള്ള എ-ക്ലാസ് അംഗത്വം നൽകണം. ഓഹരിത്തുകയും വാങ്ങണം. ഓഗസ്റ്റിലെ യോഗത്തിൽ അംഗത്വ അപേക്ഷയിൽ തീരുമാനമെടുക്കാനാണ് നിർദേശം. ജൂലായ് 31 വരെയാണ് വായ്പ നൽകാനുള്ള കാലാവധി.

1000 വായ്പകൾ കേരള ബാങ്ക് നൽകുമെന്ന് മന്ത്രി വി.എൻ. വാസവൻ പ്രഖ്യാപിച്ചിരുന്നു. എ-ക്ലാസ് അംഗങ്ങൾക്ക് മാത്രമേ വായ്പ നൽകാവൂ എന്ന രജിസ്ട്രാറുടെ നിർദേശം അനുസരിച്ചാൽ കേരള ബാങ്കിന് വായ്പ നൽകാനാവില്ല. കേരള ബാങ്കിന്റെ എ-ക്ലാസ് അംഗങ്ങൾ വ്യക്തികളല്ല, പ്രാഥമിക സഹകരണ ബാങ്കുകളാണ്. പരാതി കൂടിയതോടെ ഓരോ ജില്ലയിലും പ്രത്യേകം നോഡൽ ഓഫീസർമാരെ സഹകരണ സംഘം രജിസ്ട്രാർ നിയോഗിച്ചിട്ടുണ്ട്.

•നോഡൽ ഓഫീസർമാരുടെ ഫോൺ

തിരുവനന്തപുരം  –  9496244135,

കൊല്ലം                 –  9447071484

പത്തനംതിട്ട             –   9446462192

ആലപ്പുഴ              –  8547967873

കോട്ടയം                      –  8943835082

ഇടുക്കി                 –  9400232504

എറണാകുളം        –  8547437293

തൃശ്ശൂർ                 –  9497800091

പാലക്കാട്             –  9745468960

മലപ്പുറം               –  9846400076

കോഴിക്കോട്         –  9446066685

വയനാട്                –  9447849038

കണ്ണൂർ                  –  9847605858

കാസർകോട്          –  9495645354