കണ്ണൂർ : നാടിനും നാട്ടാർക്കും “ഏറിയോര് ഗുണം വരുത്തി’ ഉറഞ്ഞാടിയ ചിലമ്പൊലി നിലച്ചിട്ട് രണ്ട് വർഷം. കോവിഡ്‌ കാലത്തെ അടച്ചിരിപ്പിൽ ജീവിതതാളം പാടേ തെറ്റിയവരുടെ കൂട്ടത്തിലാണ്‌ തെയ്യം കലാകാരന്മാർ. വരുമാനവും ജീവിതചര്യയും മാറിമറിഞ്ഞ മഹാമാരിക്കാലം വിവരണാതീതമായ ദുരിതമാണ്‌ കലാകാരന്മാർക്ക്‌ സമ്മാനിച്ചത്‌.

തുലാം ഒന്നിന് തുടങ്ങി ഇടവപ്പാതിയിൽ അവസാനിക്കുന്ന തെയ്യാട്ടക്കാലം തെയ്യം കലാകാരന് ഒരു വർഷത്തേക്കുള്ള ജീവിതമാണ് ഉറപ്പാക്കുന്നത്‌. കോവിഡ് കാലത്ത് തെയ്യം മേഖലയിലെ വരുമാനം പൂർണമായും നിലച്ചു. വീടുകളിൽ നേർച്ചയായി കെട്ടിയാടിയിരുന്ന മുത്തപ്പനും കോവിഡ് നിയന്ത്രണങ്ങളിൽ നിലച്ചതോടെ വരുമാന മാർഗങ്ങളെല്ലാം അടഞ്ഞു. ജീവിത പ്രതിസന്ധിയെ എങ്ങനെ തരണം ചെയ്യണമെന്നറിയാതെ പകച്ചു നിൽക്കുകയാണ് തെയ്യം കലാകാരന്മാർ. സർക്കാർ നൽകിയ 2000 രൂപ ധനസഹായം മാത്രമായിരുന്നു കലാകാരന്മാർക്ക് ലഭിച്ച ആശ്വാസം. എല്ലാവർഷവും കളിയാട്ടം ഉണ്ടാകാറുള്ള ചില തറവാടുകളും ക്ഷേത്രകമ്മിറ്റികളും ധനസഹായമെത്തിച്ചതും ചെറിയ ആശ്വാസമായി.

കാൽചിലമ്പും ചമയങ്ങളും അഴിച്ച് വെച്ച് തെയ്യക്കോലങ്ങൾ പള്ളിയുറക്കത്തിലായപ്പോൾ നിനച്ചിരിക്കാതെ വന്ന മഹാമാരി തെയ്യം കലാകാരൻമാരുടെ ജീവിതത്തെ ഇരുട്ടിലാക്കിയിരിക്കുകയാണ്. പച്ചയായ മനുഷ്യരൂപത്തിൽ ദൈവീകസാന്നിധ്യത്തെ ആവാഹിച്ച് ഉറഞ്ഞാടുമ്പോൾ തൻ്റെ മുന്നിൽ തൊഴുത് നില്ക്കുന്ന ഭക്തരുടെ തലയിൽ കൈവെച്ച് അനുഗ്രഹം ചൊരിഞ്ഞ ആ നാളുകൾ തിരിച്ച് വരട്ടെ.  അടുത്ത വർഷമെങ്കിലും തെയ്യാട്ടക്കാവുകൾ ഉണരുമെന്ന പ്രതീക്ഷയിലാണ് വടക്കെ മലബാറിലെ ആയിരക്കണക്കിന് തെയ്യം കലാകാരന്മാർ.