തലശ്ശേരി: സിനിമാ നിർമ്മാണത്തിന്റെ പേരിൽ സാമ്പത്തിക തട്ടിപ്പുകളും, അനാശാസ്യ പ്രവർത്തനങ്ങളും നടത്തുന്നവർക്കെതിരെ കർശനമായ നിയമനടപടികൾ വേണമെന്ന് കേരള സ്റ്റേറ്റ് ചലച്ചിത്ര അക്കാദമി ജനറൽ കൗണ്സിൽ അംഗവും, മലബാർ ഫിലിം ഡയറക്ടേഴ്‌സ് ക്ലബ് പ്രസിഡന്റുമായ പ്രദീപ് ചൊക്ലി ആവശ്യപ്പെട്ടു. കോളയാട് സ്വദേശി മോദി രാജേഷ്, ഉരുവച്ചാൽ സ്വദേശി ചോതി രാജേഷ്, പേരാവൂർ സ്വദേശി മനോജ് താഴെപുരയിൽ എന്നിവർ പേരാവൂരിലെ ‘ഭീഷ്മ കലാ സാംസ്കാരിക വേദി’യുടെ പേരിൽ സിനിമയിൽ അവസരം വാഗ്ദാനം ചെയ്ത് അനേകം പേരിൽ നിന്നും ലക്ഷക്കണക്കിന് രൂപ തട്ടിപ്പ് നടത്തിയത് സംബന്ധിച്ച് പോലീസ് അന്വേഷണം നടന്നുവരികയാണ്. ഈ വ്യക്തികൾക്ക് ചലച്ചിത്ര രംഗത്തെ ഏതെങ്കിലും ഔദ്യോഗിക സംഘടനയുമായി ബന്ധമില്ല എന്ന് ഫെഫ്ക ഭാരവാഹികൾ അറിയിച്ചിട്ടുണ്ട്.

ആയിരക്കണക്കിന് കലാകാരന്മാരും ചലച്ചിത്ര പ്രവർത്തകരും ഉപജീവനവും ആത്മാവിഷ്‌ക്കാരവും നടത്തുന്ന മേഖലയാണ് സിനിമ. ചില സാമൂഹ്യ വിരുദ്ധർ അവരുടെ തട്ടിപ്പിന്റെ താവളമായി സിനിമയെ ഉപയോഗിക്കുന്നത് മാന്യമായി കലാപ്രവർത്തനം നടത്തുന്നവർക്ക്കൂടി അപമാനവും ബുദ്ധിമുട്ടും ആണ്. ഈ വ്യക്തികൾ മുൻപും പലതരത്തിലുള്ള കബളിപ്പിക്കലുകൾ നടത്തിയിട്ടുള്ളതായി അന്വേഷണത്തിൽ നിന്നും വ്യക്തമായിട്ടുണ്ട്. തട്ടിപ്പുകൾക്ക് കൂടുതൽ സൗകര്യപ്രദമായ സ്ഥലമായാണ് ഇവർ ചലച്ചിത്രമേഖലയെ വേദിയാക്കിയിട്ടുള്ളത്. ലക്ഷക്കണക്കിന് രൂപ സ്ത്രീകളടക്കമുള്ള അഭിനേതാക്കളിൽ നിന്നും കൈപ്പറ്റിയിട്ടും പലപ്പോഴും ഭക്ഷണമോ നല്ല താമസസൗകര്യങ്ങളോ അവർക്ക് നൽകിയിട്ടില്ല. കൃത്യമായ തിരക്കഥപോലും ഇല്ലാതെയാണ് ചിത്രീകരണം. തങ്ങൾ സംവിധാനം ചെയ്തു എന്നവകാശപ്പെടുന്ന ഒരു ചിത്രം പോലും ഷൂട്ടിങ് പൂർത്തീകരിക്കുകയോ, പോസ്റ്റ് പ്രൊഡക്ഷൻ വർക്കുകൾ ആരംഭിക്കുകയോ ചെയ്തിട്ടില്ല. ഒരു ചിത്രം പോലും പുറത്തിറക്കാതെയാണ് അടുത്ത സിനിമയുടെ പരസ്യം കൊടുത്ത് പണത്തിനായി ആളുകളെ സമീപിക്കുന്നത്. പോസ്റ്ററുകളും ഫോട്ടോകളും മാത്രമാണ് പുറത്തിറങ്ങുന്നത്. മന്ത്രിമാർ, രാഷ്ട്രീയ നേതാക്കൾ, ചലച്ചിത്ര താരങ്ങൾ എന്നിവർക്കൊപ്പമുള്ള ഫോട്ടോകൾ കാണിച്ചു വിശ്വസിപ്പിച്ചാണ് ഇവർ ആളുകളെ തങ്ങളുടെ ഇരകളാക്കിയത്.

സിനിമ, ഷോർട്ട് ഫിലിം, വെബ് സീരീസ്, സീരിയൽ എന്നിങ്ങനെ വിവിധ രൂപത്തിൽ നിരവധി ആളുകൾ വ്യാജബാനറുകളും കടലാസ് സംഘടനകളുമായി രംഗത്തുണ്ട്. ഇവരുടെ സാമ്പത്തികവും ലൈംഗികവുമായുള്ള ചൂഷണങ്ങൾക്ക് ഇരകളാക്കപ്പെടുന്ന പലരും മാനഹാനി ഭയന്ന് പുറത്തു പറയാൻ മടിക്കുന്നത് സമൂഹത്തിൽ ഇത്തരത്തിലുള്ള സാമൂഹ്യവിരുദ്ധർ വളരാൻ സഹായകമാവും. അതിനാൽ ഇത്തരത്തിലുള്ള വഞ്ചനകൾക്ക് നേരെ പൊതുസമൂഹവും ജാഗ്രതപാലിക്കണം. ഇപ്പോൾ പുറത്തുവന്നതിനെക്കാൾ ആഴവും പരപ്പുമുള്ള കബളിപ്പിക്കലാണ് നടന്നിട്ടുള്ളത്. പരാതിപ്പെട്ടവരുടെ കുട്ടികളെ പ്രതികളാക്കി കേസ് കൊടുക്കുമെന്ന ഭീഷണി ഉണ്ടെന്നും, ഒരു കലാ-വ്യവസായ മേഖലയിലെ മുഴുവൻ പ്രവർത്തകരെയും സംശയത്തിന്റെ നിഴലിലാക്കിയ ഇവർക്കെതിരെ എത്രയും വേഗം നിയമനടപടികൾ സ്വീകരിക്കണമെന്നും പ്രദീപ് ചൊക്ലി ആവശ്യപ്പെട്ടു.