വാഷിങ്ടൻ: ചൈനീസ് നിർമിത കോവിഡ് വാക്‌സിന്റെ ഉപയോഗം കോവിഡ് വ്യാപനം തടയാനും പുതിയ വകഭേദങ്ങളെ ചെറുക്കാനും കാര്യക്ഷമം ആയേക്കില്ലെന്ന്‌  റിപ്പോർട്ട്. രാജ്യാന്തര വിപണിയിൽ അനായാസം ലഭിക്കുന്ന ചൈനീസ് വാക്‌സിൻ വ്യാപകമായി ഉപയോഗിക്കുന്ന മംഗോളിയ, സീഷെൽസ്, ബഹ്റൈൻ തുടങ്ങിയ രാജ്യങ്ങളിലെ രോഗവ്യാപനത്തിൽ പെട്ടെന്നുണ്ടായ വർധനയുടെ കണക്കുകളും പഠനവുമാണ് റിപ്പോർട്ട് ചൂണ്ടിക്കാട്ടുന്നത്.

സീഷെൽസ്, ചിലെ, ബഹ്റൈൻ, മംഗോളിയ തുടങ്ങിയ രാജ്യങ്ങളിലെ ജനസംഖ്യയുടെ 50–68 ശതമാനം ആളുകൾ ചൈനീസ് നിർമിത വാക്‌സിനാണ് സ്വീകരിച്ചത്. കഴിഞ്ഞ ആഴ്ച വരെയുള്ള കാലയളവിനിടെ കോവിഡ് വ്യാപനം ഏറ്റവും രൂക്ഷമായ 10 രാജ്യങ്ങളിൽ ഇവയും ഉൾപ്പെടുന്നു. 

അതേ സമയം ഏറ്റവും കൂടുതൽ വാക്സിനേഷൻ നിരക്കുള്ള രണ്ടാമത്തെ രാജ്യമായ ഇസ്രയേലിൽ ജർമൻ നിർമിത ഫൈസർ വാക്‌സിനാണ് ഉപയോഗിച്ചത്. 10 ലക്ഷം പേരിൽ 4.95 പുതിയ കോവിഡ് കേസുകൾ മാത്രമാണ് ഇവിടെ സ്ഥിരീകരിക്കുന്നത്. എന്നാൽ ലോകത്ത് ഏറ്റവും കൂടുതൽ വാക്സിനേഷൻ നിരക്കുള്ള സീഷെൽസിൽ ഇത് 716 ആണ്. ചൈനീസ് വാക്സിനായ സിനോഫാമാണ് ഇവിടെ കൂടുതലായും ഉപയോഗിച്ചിരുന്നത്.

ചൈനയിലും ചൈനീസ് നിർമിത വാക്‌സിൻ ഉപയോഗിച്ച തൊണ്ണൂറോളം രാജ്യങ്ങളിലും വാക്സിനേഷൻ നിരക്കിൽ വർധന ഉണ്ടാകുമെങ്കിലും വൈറസിൽനിന്ന്‌ ഭാഗികമായ സുരക്ഷ മാത്രമേ ലഭിക്കൂ എന്നാണ് റിപ്പോർട്ട്.

∙ ആരോപണം നിഷേധിച്ച് ചൈന

ലോകത്തെ ഏറ്റവും സ്വാധീനശേഷിയുള്ള രാഷ്ട്രം ആകാനുള്ള അവസരമായാണ് വാക്‌സിൻ വിതരണത്തെ ചൈന കണ്ടത്. സൂക്ഷിക്കാനും ദൂരെ സ്ഥലങ്ങളിലേക്ക് കൊണ്ടുപോകാനും ഏറെ എളുപ്പമുള്ള വാക്‌സിൻ ലോകത്തെ കോടിക്കണക്കിന് ആളുകൾക്ക് വിതരണം ചെയ്യുമെന്ന്‌ ചൈനീസ് പ്രസിഡന്റ് ഷീ ചിൻപിങ് നേരത്തെ പറഞ്ഞിരുന്നു.

ചൈനയുടെ സഹായം സ്വീകരിച്ച മംഗോളിയ 52 ശതമാനം ആളുകൾക്ക് വാക്സീൻ ലഭ്യമാക്കുകയും നിയന്ത്രണങ്ങളിൽ കൂടുതൽ ഇളവുകൾ അനുവദിക്കുകയും ചെയ്തിരുന്നു. എന്നാൽ കഴിഞ്ഞ ദിവസം 2400 പുതിയ കോവിഡ് കേസുകളാണ് ഇവിടെ റിപ്പോർട്ട് ചെയ്തത്. കഴിഞ്ഞ മാസത്തെക്കാൾ 4 ഇരട്ടി അധികമാണിത്.

രോഗവ്യാപനത്തിൽ ഇപ്പോൾ ഉണ്ടാകുന്ന വർധനയും വാക്‌സിനും തമ്മിൽ ബന്ധമുള്ളതായി തോന്നുന്നില്ലെന്ന്‌ ചൈനീസ് വിദേശ കാര്യ മന്ത്രാലയം പ്രതികരിച്ചു. പല രാജ്യങ്ങളിലെയും വാക്സിനേഷൻ നിരക്ക് രോഗവ്യാപനം തടയാനുള്ള അളവിൽ കുറവാണെന്നും ഇവിടെ നിയന്ത്രണങ്ങൾ തുടരേണ്ടത് ആവശ്യമാണെന്നുമുള്ള ലോകാരോഗ്യ സംഘടനയുടെ മാർഗനിർദേശവും ചൈന ചൂണ്ടിക്കാട്ടി.