തിരുവനന്തപുരം: കോൺഗ്രസ്​ പാർട്ടിയിൽ സമ്പൂർണ്ണ അഴിച്ചുപണി നടത്തുമെന്ന്​ കെ.പി.സി.സി. പ്രസിഡന്‍റ്​ കെ. സുധാകരൻ. ജംബോ കമ്മിറ്റികൾ പൊളിച്ചെഴുതുമെന്ന്​ അദ്ദേഹം പറഞ്ഞു. ഭാരവാഹികൾ ഉൾപ്പടെ 51 അംഗ കമ്മിറ്റിയാണ്​ ഉണ്ടാവുക. 3 വൈസ്​ പ്രസിഡന്‍റ്​മാരും 15 ജനറൽ സെക്രട്ടറിമാരും ഉൾപ്പെടുന്നതായിരിക്കും നേതൃത്വം.

സംസ്ഥാന നേതൃത്വം, അതിന്​ താഴെ ജില്ലാ കമ്മിറ്റികൾ, നിയോജക മണ്ഡലം കമ്മിറ്റി, ബ്ലോക്ക്​ കമ്മിറ്റി എന്നിങ്ങനെയായിരിക്കും കോൺഗ്രസ്​ പ്രവർത്തിക്കുക. ഏറ്റവും താഴെ തട്ടിൽ അയൽക്കൂട്ടങ്ങളുമുണ്ടാവും. ദളിതർക്കും സ്​ത്രീകൾക്കും സംവരണം നൽകണമെന്ന്​ കോൺഗ്രസ്​ ഭരണഘടന പറയുന്നുണ്ട്​ . അത്​ ഉറപ്പാക്കുമെന്ന്​ സുധാകരൻ പറഞ്ഞു.

പാർട്ടിയിൽ അച്ചടക്കം ഉറപ്പാക്കുന്നതിനായി സംസ്ഥാനതലത്തിലും ജില്ലയിലും സംവിധാനം ഉറപ്പാക്കും. തെരഞ്ഞെടുപ്പിലെ പരാജയകാരണം പഠിക്കാൻ അഞ്ച്​ മേഖല കമ്മിറ്റികൾ ഉണ്ടാവും. കെ.പി.സി.സി. തലത്തിൽ മീഡിയ സെല്ലുണ്ടാകും. ചാനൽ ചർച്ചയിൽ ഉൾപ്പടെ ആര്​ പ​ങ്കെടുക്കണമെന്ന്​ മീഡിയ സെൽ തീരുമാനിക്കും.