കണ്ണൂർ: ഫോണില്ലാത്തതുകൊണ്ടുമാത്രം തന്റെ കുഞ്ഞുങ്ങൾ ‘ഓൺലൈൻ ക്ലാസിന്പുറത്താകുമോ’ എന്ന വേവലാതി അമ്മയുടെ ഉറക്കം കെടുത്തി. കോവിഡ് കാലത്ത് വരുമാനമില്ലാതായ ഭർത്താവിനോട് സങ്കടം പറഞ്ഞിട്ട് കാര്യമില്ല. അവസാനം ജില്ലാ പഞ്ചായത്ത് ജൻഡർ ഹെൽപ് ഡെസ്കിലേക്ക് വിളിച്ചു. ദിവസങ്ങൾക്കുള്ളിൽ ഫോൺ വീട്ടിലെത്തി. കോവിഡ് കാല പ്രതിസന്ധികളിൽ തളർന്നുപോയ അനേകം സ്ത്രീകളുടെ കണ്ണീർ തുടയ്ക്കുകയാണ് ജൻഡർ ഹെൽപ് ഡെസ്ക് . സുശീലാ ഗോപാലൻ ലീഗൽ സെല്ലുമായി ചേർന്ന് ജില്ലാ പഞ്ചായത്ത് തുടങ്ങിയ ഹെൽപ് ഡെസ്കിലേക്ക് ഒരുമാസം തികയും മുമ്പ് നൂറിലധികം വിളികളാണെത്തിയത്.

“സർക്കാരിന്റെ കിറ്റ് കിട്ടുന്നതുകൊണ്ട് പട്ടിണിയില്ല , എന്നാലും കറിവെയ്‌ക്കാൻ എന്തെങ്കിലും വേണ്ടേ … പുറത്ത് പറയാൻ മടിച്ചാണ് നിങ്ങളെ വിളിക്കുന്നത് ’ ഹെൽപ് ഡെസ്കിലേക്ക് വിളിച്ച വീട്ടമ്മയുടെ പ്രയാസം പരിഹരിച്ചത് മണിക്കൂറുകൾക്കുള്ളിലാണ്. ലോക്‌ഡൗൺ കാരണം കഷായവും അരിഷ്ടവും തേച്ചുകുളിയുമെല്ലാം മുടങ്ങുമെന്ന് വേവലാതിപ്പെട്ട് വിളിച്ച വയോധികർക്കും ഡെസ്കിന്റെ സേവനമെത്തി. സാമ്പത്തിക പ്രയാസം കാരണം മരുന്ന് വാങ്ങാൻ കഴിയാത്തവരും ഹെൽപ് ഡെസ്കിലേക്ക് വിളിച്ചു.

കോവിഡിന് ശേഷമുള്ള മാനസിക സമ്മർദങ്ങൾ താങ്ങാനാവാതെയാണ് വീട്ടമ്മ ഹെൽപ് ഡെസ്കിലേക്ക് വിളിച്ചത്. താൻ കാരണം കോവിഡ് ബാധിച്ച് അടുത്ത ബന്ധു മരിച്ചതിലുള്ള മാനസിക സംഘർഷം താങ്ങാവുന്നതിലും അപ്പുറമായിരുന്നു അവർക്ക്. മാനസിക രോഗവിദഗ്ധയുടെ സേവനം ലഭ്യമാക്കിയതോടെ അവർ ജീവിതത്തിലേക്ക് തിരിച്ചുവന്നു. സ്മാർട്ട് ഫോണില്ലാത്തതിനാൽ ഓൺലൈനായി വാക്സിൻ രജിസ്റ്റർ ചെയ്യാനാവാത്തതിനാൽ വിഷമിച്ചവരെയും പ്രാദേശിക വളണ്ടിയർമാർ സഹായിച്ചു.

കോവിഡ് കാലത്ത് ഒറ്റപ്പെട്ടുപോകുന്ന സ്ത്രീകൾക്ക് വിളിക്കാനാണ് ഹെൽപ് ഡെസ്ക് ഒരുക്കിയതെങ്കിലും പലവിധ ആവശ്യങ്ങൾ പറഞ്ഞ്‌ വിളിച്ചവരെയെല്ലാം സഹായിക്കാനായി. സ്ത്രീകൾക്ക് സധൈര്യം വിളിക്കാനുള്ള നമ്പർ എന്നതാണ് ജൻഡർ ഹെൽപ് ഡെസ്കിന്റെ സവിശേഷതയെന്ന് ജില്ലാ പഞ്ചായത്ത് പ്രസിഡന്റ് പി.പി. ദിവ്യ പറഞ്ഞു. കൂടുതൽ ആളുകളിലേക്ക് സേവനം എത്തിക്കാനായെന്നും അവർ പറഞ്ഞു. സുശീലാ ഗോപാലൻ ലീഗൽ സെൽ വളണ്ടിയർമാരായ സ്ത്രീകളുടെ കൂട്ടായ്മയാണ് സേവനങ്ങൾ ജനങ്ങളിലെത്തിക്കുന്നത്. ജില്ലാ പഞ്ചായത്തിൽ കെ. ലത, ജൂല അജിത്, സി.കെ. ബിന്ദു എന്നിവരാണ് പ്രവർത്തനം ഏകോപിപ്പിക്കുന്നത്.

ഹെൽപ് ഡെസ്ക് സേവനങ്ങൾക്കായി വിളിക്കാം : 94000 64876, 94000 64877, 94000 648 78.