കൂത്തുപറമ്പ് : കോവിഡ് വ്യാപനം മാറ്റമില്ലാതെ തുടരുമ്പോഴും തിങ്കളാഴ്ച കൂത്തുപറമ്പിലെത്തിയത് ഒട്ടേറെപ്പേർ. രാവിലെ മുതൽ ഇടതടവില്ലാതെ വാഹനങ്ങൾ നിരത്തിലുണ്ടായിരുന്നു. ലോക്‌ഡൗൺ അവസാനിച്ച രീതിയിലായിരുന്നു നഗരത്തിലെ തിരക്ക്. വയോധികർ ഉൾപ്പെടെ നഗരത്തിലെത്തി. തുടർന്ന് കൂത്തുപറമ്പ് പോലീസ് പരിശോധന കടുപ്പിച്ച് നിയന്ത്രണം ലംഘിച്ചവർക്കെതിരെ നടപടി സ്വീകരിച്ചു.

അത്യാവശ്യയാത്രയെന്ന് ബോധ്യപ്പെടുന്ന വാഹനങ്ങളെ യാത്ര തുടരാൻ അനുവദിച്ചു. അല്ലാതെയുള്ളവ പിടിച്ചെടുത്ത് താക്കീത് നൽകി മടക്കിയയച്ചു. പത്തോളം വാഹനങ്ങളാണ് സ്റ്റേഷൻ പരിധിയിൽനിന്ന് പിടിച്ചെടുത്തത്. നാല് വാഹനങ്ങൾക്കെതിരെ കേസ്‌ രജിസ്റ്റർചെയ്തു. സമയപരിധി കഴിഞ്ഞ് പ്രവർത്തിച്ച ഒരു കടയ്ക്കെതിരെയും കേസെടുത്തു.

സ്റ്റേഷൻ പരിധിയിൽ അഞ്ചിടങ്ങളിലായാണ് പോലീസ് പരിശോധന നടത്തുന്നത്. നഗരസഭ സെക്ടറൽ മജിസ്‌ട്രേറ്റ് പി.സരിതയുടെ നേതൃത്വത്തിൽ കടകളിലും മറ്റും പരിശോധന നടത്തി. വളന്റിയർമാരല്ലാതെയെത്തുന്നവർക്ക് സാധനങ്ങൾ നൽകിയ കടകൾക്കെതിരെ നടപടി സ്വീകരിച്ചു. സാധനങ്ങൾ വാങ്ങാനെത്തുന്നവർക്കെതിരെയും നടപടിയെടുത്തിട്ടുണ്ട്. നിയമം ലംഘിക്കുന്നവർക്കെതിരെ കർശന നടപടി സ്വീകരിക്കുമെന്ന് സെക്ടറൽ മജിസ്‌ട്രേറ്റ് പറഞ്ഞു. വരും ദിവസങ്ങളിൽ സമാന സാഹചര്യമുണ്ടാകാതിരിക്കാൻ പരിശോധനകളും നടപടികളും കടുപ്പിക്കാനാണ് അധികൃതരുടെ തീരുമാനം.