പേരാവൂർ : കോവിഡ് സമയത്ത് ഗർഭിണിക്ക് പേരാവൂർ താലൂക്കാസ്പത്രിയിൽ അടിയന്തര ശസ്ത്രക്രിയ നടത്തി. ഉളിക്കൽ സ്വദേശിയായ 28 കാരിക്കാണ് അടിയന്തര ശസ്ത്രക്രിയ നടത്തിയത്. വയറ് വേദനയും രക്തസ്രാവവുമായി ഇരിട്ടിയിലെ സ്വകാര്യ ആസ്പത്രിയിൽ പോവുകയും ശസ്ത്രക്രിയയുടെ ചിലവ് കൂടുതൽ ആയതിനാൽ പേരാവൂർ താലൂക്ക് ആശുപത്രിയിൽ വരികയുമായിരുന്നു. അത്യാഹിത വിഭാഗത്തിൽ പരിശോധനക്ക് വിധേയയായ ഗർഭിണിയുടെ വയറിന്റെ സ്കാൻ ചെയ്തു നോക്കിപ്പോൾ ട്യൂബിലെ ഗർഭം പൊട്ടി വയറിന്റെ ഉള്ളിൽ അമിത രക്ത സ്രാവം ഉണ്ടായതായി കണ്ടു.

തുടർന്ന് ഗൈനക്കോളജിസ്റ്റുകളായ ഡോ. രേഷ്മ, ഡോ. രചന , മയക്ക് ഡോക്ടർ ബിജുകുമാർ, സ്റ്റാഫ് നഴ്സ് സിന്ധു എന്നിവരുടെ നേതൃത്തിൽ അടിയന്തര ശസ്ത്രക്രിയ നടത്തുകയും രോഗിയുടെ ജീവൻ രക്ഷിക്കുകയും ചെയ്തു . കോവിഡ് കാലത്ത് ഇത് പോലെ ചികിത്സാ ചിലവുള്ള അടിയന്തിര സേവനങ്ങൾ പേരാവൂർ ആശുപത്രിയിൽ നിന്ന് ലഭിക്കുന്നത് മലയോര മേഖലയിലെ ജനങ്ങൾക്ക് വളരെയധികം ഉപകാരപ്രദമാണ്.