പേരാവൂർ: കോവിഡ് വ്യാപനം രൂക്ഷമായ പേരാവൂർ പഞ്ചായത്തിൽ നിലവിൽ 430 ആക്ടീവ് കോവിഡ് കേസുകൾ. അഞ്ഞൂറിലധികം ആളുകളാണ് ക്വാറന്റൈനിൽ കഴിയുന്നത്. പഞ്ചായത്തിൽ ഇതുവരെ ഒൻപത് പേർ കോവിഡ് ബാധിച്ച് മരിച്ചു.

ഞായറാഴ്ചയോടെ പ്രവർത്തനമാരംഭിച്ച പേരാവൂരിലെ സി.എഫ്.എൽ.ടി.സി.യിൽ ഇതിനകം 12 പേർ ചികിത്സയിൽ കഴിയുന്നുണ്ട്.പഞ്ചായത്തിലെ പത്ത് വാർഡുകൾ(2,3,6,8,9,10,11,12,14,15) നിലവിൽ കണ്ടെയ്‌മെന്റ് സോണിലാണ്. കണ്ടെയ്‌മെന്റ് സോണുകളായ വാർഡുകളിൽ നിയന്ത്രണം ശക്തിപ്പെടുത്താത്തതാണ് രോഗവ്യാപനത്തിന് കാരണമാവുന്നത്.

പഞ്ചായത്ത് സേഫ്റ്റിക്കമ്മിറ്റി ഇടക്കിടെ യോഗം ചേർന്ന് നിയന്ത്രണം ശക്തിപ്പെടുത്താൻ തീരുമാനമെടുക്കാറുണ്ടെങ്കിലും രോഗവ്യാപനം കുറയുന്നില്ല. കണ്ടെയ്‌മെന്റ് സോണുകളാകുന്ന വാർഡുകളിലെ റോഡുകൾ ഭാഗികമായിഅടച്ച് ഗതാഗതം നിയന്ത്രിക്കാറുണ്ടെങ്കിലും പേരാവൂരിൽ ഇതൊന്നും പ്രാവർത്തികമാവുന്നില്ല. കോവിഡ് ഒന്നാം ഘട്ടത്തിൽ ഏർപ്പെടുത്തിയ നിയന്ത്രണങ്ങളുടെ പകുതി പോലും ഇപ്പോളില്ല.

പഞ്ചായത്തിലെ വിവിധ ടൗണുകളിലുള്ള വ്യാപാര സ്ഥാപനങ്ങളോട് ഹോം ഡെലിവറി നടത്താൻ സേഫ്റ്റിക്കമ്മിറ്റി ആവശ്യപ്പെട്ടെങ്കിലും നടപ്പിലായിട്ടില്ല. മാത്രവുമല്ല, കടകൾ തുറക്കുന്നതിന് ഏർപ്പെടുത്തിയ ക്രമീകരണവും പാലിക്കപ്പെടുന്നില്ല. ഈ രീതി തുടർന്നാൽ പഞ്ചായത്തിലെ പേരാവൂർ, തൊണ്ടിയിൽ, മുരിങ്ങോടി, മണത്തണ എന്നീ ടൗണുകളുൾപ്പെടുന്ന വാർഡുകൾ കണ്ടെയ്‌ന്മെന്റ് സോണിൽ നിന്ന് ഒഴിവാകാൻ കാലതാമസമെടുക്കും. കണ്ടെയ്‌ന്മെന്റ് സോണുകളായതിനാൽ ഏപ്രിൽ 30നാണ് 4 ടൗണുകളിലും അവശ്യസാധന വില്പന കടകൾ ഒഴികെയുള്ളവ അടച്ചിട്ടത്.

സംസ്ഥാന സർക്കാർ പ്രഖ്യാപിച്ച ലോക്ഡൗൺ മെയ് 16ന് അവസാനിക്കുമെങ്കിലും പേരാവൂരിലെ കണ്ടെയ്‌ന്മെന്റ് സോണുകൾ എന്ന് ഒഴിവാകുമെന്ന് പറയാൻ പറ്റാത്ത അവസ്ഥയാണ്. നിരവധി വ്യാപാരികളാണ് ഇത് മൂലം ദുരിതത്തിലായത്. മലഞ്ചരക്ക് കടകൾ അടച്ചിട്ട കാരണം ചെറുകിട കർഷകരും കാർഷികോല്പന്നങ്ങൾ വില്ക്കാൻ കഴിയാതെ പട്ടിണിയിലേക്ക് നീങ്ങുകയാണ്.