പേരാവൂർ: ഇടപാടുകാരെ പറ്റിച്ച് കോടികൾ കൈക്കലാക്കിയ പേരാവൂർ സഹകരണ ഹൗസ് ബിൽഡിങ്ങ് സൊസൈറ്റി സെക്രട്ടറിയുടെയും ഭരണസമിതിയുടെയും ഇടപാടുകൾ വിജിലൻസ് അന്വേഷിക്കണമെന്ന് കർമസമിതി ഭാരവാഹികൾ പത്രസമ്മേളനത്തിൽ ആവശ്യപ്പെട്ടു.ചിട്ടി തട്ടിപ്പുമായി ബന്ധപ്പെട്ട് സെക്രട്ട്രറി പി.വി.ഹരിദാസൻ ഇടപാടുകാർക്കെതിരെ നടത്തിയ വ്യാജ ആരോപണങ്ങൾ അടിസ്ഥാനരഹിതമാണ്.

കോവിഡ് ലോക്ഡൗൺ മൂലമുള്ള പ്രതിസന്ധി കാരണം സംസ്ഥാനത്ത് ഒരു സഹകരണ സ്ഥാപനവും തകർന്നില്ലെന്നിരിക്കെ,പേരാവൂരിലെ സൊസൈറ്റിക്ക് മാത്രം കോടികളുടെ പ്രതിസന്ധിയുണ്ടായെന്ന സെക്രട്ടറിയുടെയും ഭരണസമിതിയുടെയും വാദം വ്യാജമാണ്.

സൊസൈറ്റിയുടെ 2017 മുതലുള്ള മുഴുവൻ ഇടപാടുകളും അധികൃതർ അന്വേഷിച്ച് തട്ടിപ്പ് നടത്തിയവരെ നിയമത്തിനു മുന്നിൽ കൊണ്ടുവരികയും മുഴുവൻ നിക്ഷേപകരുടെയും പണം തിരിച്ചു നൽകുകയും വേണം.തിങ്കളാഴ്ച സൊസൈറ്റിക്ക് മുന്നിൽ തുടങ്ങുന്ന റിലേ നിരാഹാര സമരംസൂചന മാത്രമാണ്.അഞ്ച് ദിവസത്തിനകം ഇടപാടുകാരുടെ പ്രശ്‌നങ്ങൾക്ക് പരിഹാരമായില്ലെങ്കിൽ സമരമുഖവും സമര രീതിയും മാറ്റുമെന്നും കർമസമിതി മുന്നറിയിപ്പ് നല്കി.

ചിട്ടിയിൽ ചേർന്നവരിൽ 432 പേർക്ക് ഒരു കോടി 87 ലക്ഷം രൂപ പണമായി ലഭിക്കാനുണ്ട്.ചിലരുടെ ചിട്ടിപ്പണം സൊസൈറ്റിയിൽ തന്നെ സ്ഥിരനിക്ഷേപമായും സേവിങ്ങ്‌സ് അക്കൗണ്ടായും മാറ്റി നിക്ഷേപിപ്പിക്കുകയും ചെയ്തിട്ടുണ്ട്.ഇത് കൂടാതെ വിവിധ ലേല ചിട്ടികളുടെയും പണം ഇടപാടുകാർക്ക് ലഭിക്കാനുണ്ട്.മൊത്തത്തിൽ സാധാരണക്കാരുടെ നാലര കോടിയോളം രൂപ നാലു വർഷം കൊണ്ട് തട്ടിയെടുത്തിട്ടുണ്ട്.

പത്രസമ്മേളനത്തിൽ കർമസമിതി കൺവീനർ സിബി മേച്ചേരി,സെക്രട്ടറി ടി.ബി.വിനോദ്,മാത്യു തോട്ടത്തിൽ,കെ.വി.മോഹനൻ എന്നിവർ സംബന്ധിച്ചു.