കോട്ടയം: കേരളത്തിൽ ജനകീയ ഹോട്ടലുകളിൽനിന്ന് പ്രതിദിനം ഉച്ചഭക്ഷണം കഴിക്കുന്നത് 1.80 ലക്ഷം പേർ. 1095 ജനകീയ ഹോട്ടലുകളിലൂടെയാണ് ഇരുപത് രൂപയുടെ ഊണിന് ഇത്രയും ഗുണഭോക്താക്കൾ. ഇത്രയും പേർ ശരാശരി അൻപത് രൂപയുടെ ഊണ് ഹോട്ടലിൽ നിന്ന് കഴിച്ചാൽ ചെലവാകുന്നത് 90 ലക്ഷം രൂപയാണ്. ജനകീയ ഹോട്ടലിൽ ഉച്ചയൂണിന് ചെലവാകുന്നത് 36 ലക്ഷം രൂപയും.

ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്‌മെന്റ് ആൻഡ് ടെക്‌നോളജി ഗ്രേഡിങ്ങിനായി നടത്തിയ കണക്കെടുപ്പിലാണ് ജനകീയ ഹോട്ടലുകളുടെ ജനകീയത വെളിവാക്കുന്നത്. എന്നാൽ ജനകീയ ഭക്ഷണശാലകളെല്ലാം മികച്ച നിലവാരം പുലർത്തുന്നില്ലെന്നും ഇനിയും ഭൂരിഭാഗവും മെച്ചപ്പെടേണ്ടതുണ്ടെന്നും ഐ.എച്ച്.എം.ടി. വിലയിരുത്തുന്നു. 266 എണ്ണത്തിന് മാത്രമാണ് എ പ്ലസ് ഗ്രേഡ് ലഭിച്ചത്. എ ഗ്രേഡ്-359, ബി ഗ്രേഡ്-285, സി ഗ്രേഡ്-185 എന്നിങ്ങനെയാണ് മറ്റുള്ളവയുടെ നിലവാരം.

ശുചിത്വം, വിഭവങ്ങളുടെ വൈവിധ്യം, ആഹാരത്തിന്റെ ഗുണമേന്മ, പ്രവർത്തനസമയം, പ്രതിമാസ വിറ്റുവരവ്, സ്ഥാപനം പ്രവർത്തിക്കുന്ന കെട്ടിടത്തിന്റെയും ചുറ്റുപാടുകളുടെയും അവസ്ഥ തുടങ്ങിയ മാനദണ്ഡങ്ങളുടെ അടിസ്ഥാനത്തിലാണ് ഗ്രേഡിങ് പൂർത്തീകരിച്ചത്.

താഴ്ന്ന നിലവാരത്തിലുള്ളവ മികച്ച നിലയിലെത്തുന്നതിനുള്ള പ്രോത്സാഹനം നൽകുന്നതിനാണ് ഗ്രേഡിങ് നടപ്പാക്കിയത്. വിശപ്പുരഹിത കേരളം പദ്ധതിയിൽ കുടുംബശ്രീയുടെ സഹകരണത്തോടെയാണ് എല്ലാ തദ്ദേശസ്ഥാപനങ്ങളിലും ഓരോ ജനകീയ ഹോട്ടലെങ്കിലും തുടങ്ങിയത്. ലോക്ഡൗൺ കാലത്ത് തദ്ദേശസ്ഥാപനങ്ങളുടെ സഹകരണത്തോടെ ആവശ്യക്കാർക്ക് സൗജന്യ ഭക്ഷണം എത്തിക്കുക എന്ന ലക്ഷ്യവുമുണ്ടായിരുന്നു.

2020-21 സാമ്പത്തികവർഷം 23.64 കോടി രൂപയാണ് ജനകീയ ഹോട്ടലുകൾക്കായി തദ്ദേശവകുപ്പ് അനുവദിച്ചത്. ഇത് പൂർണമായും വിനിയോഗിച്ചു. നടപ്പുസാമ്പത്തികവർഷം അനുവദിച്ച 20 കോടി രൂപയിൽ 18.20 കോടി രൂപ റിവോൾവിങ് ഫണ്ടായും സബ്‌സിഡിയായും ഇതുവരെ വിനിയോഗിച്ചിട്ടുണ്ട്. ജനകീയ ഹോട്ടലുകളിലൂടെ 4,895 കുടുംബശ്രീ അംഗങ്ങൾക്ക് സ്ഥിരവരുമാനം ഉറപ്പാക്കാനായെന്നും കണക്കെടുപ്പ് വെളിവാക്കുന്നു.